كلام في الخاطر

نبض المدرجات الزرقاء

كلام في الخاطر 

بقلم / عسجد عصام

– في مقالي امس بديت اتكلم عن اهميه الاستفاده من اللعيبه الجدد لأنو كل ماالشباب استفادو منهم بكون احسن ويكسبو منهم خبرات

– يعني مثلآ نرجع وراء شويه كدا ( رغم انو رجوع للخلف في الوقت الراهن ماينفع لكن بقول الحاجه دي لي قدام )
المهم عايزه اقول انو لو كان لعيبتنا السودانيين الزمان ديك بدون زكر اسماء لعيبه كبار ومعروفين افريقيآ وعربيآ  انهم لو لعبو معاهم الكانو في فريق الشباب ان شاء الله محلي ساي وشويه شويه استفادو منهم وبقوهم في التيم الأول والتحتهم كان يصعدو حتي لو صغار في العمر كدا بستوعبو اكتر  المهم كان ديل علمو ديل والبعدهم والبعدهم والبعدهم  والحكايه تستمر كدا يعني ماكان بحتاجو لأجانب وتجنيس والحاجات دي كلها كان حصل العكس و ( صدرنا لعيبه كمان )

– هسه ماشفتو المصريين والجزائريين لما الاهلي المصري شال كأس الابطال كان اغلبية الفريق محليين  مااجانب

عشان كدا ياريت تركزو علي المحليين اكتر
– ماشاء الله هسه في الدافوري دا في اولاد لعابين عديل كدا
لكن…
مالاقيين فرص في الفرق الكبيره
المهم يعني انا عندي اقتراح انو المحترفين ديل لو ضروري جربو لينا بتاعين شمال افريقيا  كويسين ولعبهم حلو ومافيهم كلام ومابتخسرو

– نبض اخير :-

عندي ملاحظه بسيطه داخل الموضوع دا زاتو  .. انو حتي اللعيبه الافارقه لما يجو يختاروهم بعض الاختيارات بتم بالمظهر فقط

– يعني يقولو ليك مثلآ اللاعب فلان داك كان بلعب في الفريق الفلاني  طويل وبنيته الجسمانيه كويسه ينفع يلعب دفاع ولا اقول ليك هو في فريقو كان بلعب وسط لكن نلعبو هجوم عشان يقلع كورتو

– ياخ هي كوره ولا ( ضرس )  عشان يقلعوها الشغله تكتيك ما قلع
يعني بدل مايركزو لينا في طريقه لعبو وكدا يركزو في حاجات تانيه  ودا سبب رئيسي في عدم نجاح الاجانب معانا
رغم انو الواحد يكون جايبنو من فريق معروف  وهو زاتو كويس يجي عندنا يبقي ماسوره

– مدرج ايجابي :-

– نأخد الجانب الايجابي شويه انو في محترفين كانوا كويسين جدآ ومابننكر اننا استفدنا منها  ومن الاسماء الفي زاكرتي ومابقدر انساها نهائي وكمان بتمنى عودتهم ( ساساسا دومبا وامبيلي )

– ملحوظه :-

عارفه انو في ناس مستغربين من كلامي دا بس صراحه مع كل تسجيلات انا بتزكرو وخوفي بكون اكبر من القادم والله يكضب الشينه

.- عمومآ بالتوفيق سواء كان بالمحليين او الاجانب