(كهربتنا ومن مويتنا وطيرت حمامتنا)

من خلف الكواليس

عصام هجو

(كهربتنا ومن مويتنا وطيرت حمامتنا)

*الحمدلله هذه المرة الهلالاب ماقالوا حاجة عن الحكم وأهداف الأهلي مافيها كلمة لا تسلل ولا ضربة جزاء من خيال الحكم يعني المهم والاهم في كرة القدم داخل المستطيل الأخضر (لا شق ولا طق ) ونسوا لاراش ونسوا معه او تناسوا جمال الثعلب وهدفه الجميل كما سبق لهم نسوا وتناسوا فضيحة ( 2و12 ) وفضائح الحكام الهجين والبنية او اللكمة التي تلقاها الحكم الجزائري جمال الحمودي في ممر استاد الهلال (الزريبة سابقا) يعني باختصار (الصفراب ديل) اكثر ناس عارفين الصفر دة راكز وثابت مابتحول ولا بتحور لذلك طوالي الاحتياطي المركزي من الحجج الواهية والمبررات الانصرفية متوفرة عندهم واصبحوا يتفنون في (حبك السيناريوهات ) بدرجة يحسدهم عليها أسامة أنور عكاشة في كل سيناريوهاته وحبكاته وخياله (غير المريض) في كل مسلسلاته وأفلامه وكل درامياته.
*نادي الهلال اكثر من يمارس التخدير على وجه الأرض وفي كل سنة تنجح محاولاته في إقناع جمهوره بالتخدير و(السواقة بالخلاء) ونفس الأشخاص والاقلام التي رفعت أحلام ظلوت واشبعت الجمهور من حلاوة قطن وأوقعته ( داونز ) و(دق الدلجة) بعد ماوقع من غيبوبة طابق ضربة جزاء (صن جنوب أفريقيا) كعادته في سنة وموسم وبطولة ورغم أن الأمر ليس غريب ولا هو بالجديد الا انهم رفعوا سقف (أحلام ظلوت) بانهم سيفوزون على الأهلي المصري في قلب القاهرة وصوروا للصابرين القبض على جمر الصبر لأن الهلال يلعب بثلاثة فرص والجماعة كبرت معاهم القصة وقالوا 3 فرص الأمل كبير وكل المساكين والمنتظرين ليهم سنيين والماتوا وفاتوا ليهم قريب قرن تقريبا واقفين منتظرين في محطة صابرين وكلهم بدأوا يأملوا وطبعا من حقهم لانهم موعودين بإنجاز.
*اذا عدنا الى الوراء قليلا أولا : تاهل الهلال الى المجموعات وومن البداية كان باطلا ومابني على باطل فهو باطل لان الهلال تاهل بضربة جزاء ظالمة والظلم كان واضحا وبائنا ببينونة كبرى هل تتذكرون ضربة الجزاء التي تأهل بها على حساب سانت جورج الاثيوبي ؟ ومن هنا يستحق الهلال ان ينطبق عليه قول التسوي كريتن في القرض تلقاهو وين ياجماعة الخير (تلقاهو في جلدها ) والهلال (لقاهو مرتين) فالمرة الأولى كانت اهدار ضربة الجزاء المؤهلة للهلال والتي أضاعها (أطهر) والمرة الثانية كانت الضربة الموجعة بخسارة صاحب الفرص (الثلاثة ) من الأهلي (بالثلاثة) وهي أيضا خسارة بائنة بكل أنواع البينونات (كبرى وصغرى ووسطى ).
*طيب نجي لجمهور الهلال الصابر والصامد بالالتفاف والدعم والمساندة ولتشجيع لفريق لاحول ولاقوة له في الدنيا في حصد الاصفار واختلاق الاعذار وبصراحة في السنوات السابقة شخصيا كنت الوم اعلام الهلال وادارات الهلال لانها تمارس التخدير وترفع من سقف الطموحات وفي النهاية كما ظلت تجري العادة خروج وخسارة وصفر جديد وينهد المعبد على رؤوس الجميع ولكن هذه المرة كل اللوم يقع على الجمهور الهلالي (أنصار الأصفار )الذي يعتبر الجمهور الوحيد الذي ظل يلدغ من جحر التخدير (مش عشرات المرات) بل مئات المرات.
*معقولة يا جمهور الهلال فريقكم كان متقدم بفارق 7 نقاط على الأهلي التعبان والكحيان وفريق القرن في أسوأ موسم له منذ أن تم تأسيسه وتعرض لخسارة (مازيمبية) مع الرأفة من صن دوانز وواقع من الطابق الخامس وقالوا لكم أنتم (السابقون ونحن اللاحقون) أقصد في الخسارة بالرقم (المازيمبي) بس الحق يقال الأهلي خسر خارج الديار والهلال خسر بالخمسة جوة الزريبة آنذاك وأمل الأهلي كان أوهى من خيط العنكبوت واحياها تعادل صن داونز معكم وأنعشها وقدمها مقشرة وملعوبة وعلى طبق من ذهب هو الهلال بذات نفسه عبر (أطهر) لاعب في تاريخ المستديرة المجنونة (وبعد دة كلو) الهلالاب يتحججون بشتمونا ونبذونا وقالوا لينا وما احترمونا المهم في الموضوع الكلام داخل المستطيل الأخضر .
*حصل الهلال على فرصة ذهبية للإطاحة بالاهلي وفعلا وعمليا الأهلي المصري كان خارج نطاق الخدمة وتاهله الى المرحلة القادمة كان شبه معدوم ومن اهداه التاهل هو الهلال واتعجب لماذا وعلى ماذا يتباكى الهلالاب وأسمعوا وأعوا لقد خدمتكم الصدف والظروف وجاءتكم فرصة تاريخية لن تتكرر وفوتوها (وتاني مابتلقوها ووين تلقوها ) فالصدف لاتتكرر فقد خدمت الصدف الهلال كثيرا ووصل النهائي عام 1987 وخسر بهدف عكسي للثعلب ووصل نهائي 1992 وخسرعلى يد الست وداد المغربية يعني باختصار الهلال ماداير او ماقادر يفوز وفي نفس عايز فريق يجي يخسر ليهو ويقول ليهو اتفضل يا ابوالهل والكلام دة طبعا مابحصل أيها الصفراب .
*إذا تريدون تخدير جمهور الهلال بحق وحقيقة ممكن تقنعوه أن الهلال ماخسر ولكنه تعرض لصعق كهربائي (جامد أوي) من الود محمود (أه والله ياعمي الحاق) بس في الحقيقة ممكن تتحججوا بان التيار الكهربائي المصري بتاع السد العالي اللي هجروا ليه أهلنا الحلفاويين تيار (جامد أوي ) (شفت الزاي) ياعمي الصفرابي لذلك مطلوب من جماعة (أبوالهل) عدم الاعتماد على كهراباء المولدات (الجنريترات) التي تشتغل بالجازولين يا سعادة المهندس العليقي وأيضا كهرباء (نهر السوباط) أحيانا بتقطع وعندما يكون التيار غير مستقر عادي (أطهر) يكون ماشايف ويضيع الضربة وطبيعي هيثم يكون مامركز ويقول الهلال سيهزم الأهلي بعد سنتين لان للهلال مشروع سياتي أكله بعد سنتين.
*احسبوا معي منذ عام 1934 كم رئيس وكم عضو مجلس إدارة وكم مدير كرة وكم قطاع رياضي وكم لاعب وكم مشطوب وكم كابتن وكم مشجع وكم كم ثم كم كم ثم كم ثم كم كم بطولة شارك فيها الهلال وحتى تاريخه والتو واللحظة الهلال محاصر بالاصفار ومن يعرف الأرقام الصحيحة .
*اللهم ارحم عبدالحميد الضو حجوج رحمة واسعة وادخله فسيح جناتك.
*ومطلوب من الهلالاب انتظار أنتاج مشروع (سنابل الخير ) بعد سنتين كما وعد الكابتن هيثم مصطفى لاعب نادي المريخ السابق الذي كان ظهوره كمحلل فني (للمشاريع) أقصد للمباريات اقل من مستوى انجازات الهلال في المحفل الافريقي.
*ياترى أي مشروع يقصد لاعب المريخ السابق سندس الزراعي أم مشروع الجزيرة أم مشروع السوكي الزراعي أو احتمال يكون يقصد مشاريع النيل الأبيض ناس (أم جر وشبشة) وكلام الجغرافيا الزمان ام ياترى يقصد مشروع الجازولين القطع كهرباء عيون (أطهر) لحظة التسديد.
*عنوان وبالبنط العريض : الهلال يلعب دور الثمانية في ليبيا
*المشكلة ليبيا (فتحت في مصر) وجن ماشات تلاتة والتالتة حلاتة ماشية بالكهرباء ذاتا.
*وتعال شوف (وداد) وشوف ديك (رجاء) وديك ترجي وكمان ديك (مطابع) المطبعة الصومالي للتذكير.
*غايتو لو كان قاصد مشروع البابور جاز خلو يشتغل و(الصفر ) بالجاز مثلما يغنن القونات والبنات (الصفر بالجاز ) متحمدكم طوالي وننصح كل الهلالاب والاهلة والصفراب بعدم الاقتناع بمشروع (كهرباء الجازولين) لانه لن يات أكله خصوصا (ياجماعة براكم (شفتو وسمعتو) لسعة وضربة كهرباء (السد العالي) قاتلة ومميتة.
*ننصحكم بكهرباء السد العالي على الأقل فيها ريحة تهجير أهلنا أهالي حلفا بس طلعت كهرباء خاينة والمزعلنا في الموضوع دة كلو (كهربتنا ومن مويتنا وطيرت حمامتنا ) والعاقبة عندكم في الأصفار القادمة.
*للأسف نحن معتمدين على التوليد بالجازولين … صرفنا كم على جيوش اللاعبين الافارقة وهل المصروف والخسارة يوازيان المحصلة التي تعتبر من دون شك ومن غير نقاش صفر دولي كبير متزايد متراكم ومش كدة وبس بل انه على الشمال ومش كدة كمان في العرضة شمال.
*ورقصني ياجدع على (تلاتة ونص) بصراحة النص عندي أنا الدنيا رمضان مابنكضب ومابنزيد.
*مسؤولين من الخير اخبار وفد اليوفي والبايرن والانتر وميلان واجاكس والريال وبرشلونة الذين حضروا للتعاقد مع لاعي الهلال عقب نهاية مباراة الأقمار مع الأهلي في القاهرة شنو…؟
*لاحول ولاقوة الا بالله العلي العظيم واللهم لاتمحنا ولاتبلينا.
*رمضان كريم وتصوموا وتفطروا على خير.
*بالله عليكم كم رمضان مر وراح والهلال بهذه الحالة.
*ثلاثية نظيفة بيضاء مكوية بمكواة كهرباء وليس بخارية والهلال دخل بثلاث فرص بشوقي مروية .
*أيهما (أطهر) كهرباء محمود؟ أم محمود كهرباء؟ أم كهرباء الجازولين؟
*آخر تخديرة للجماعة : الهلال يشتكي الجنوب أفريقي لأن اسمه(صن) يعني (شمس) والشمس جهرت (أطهر ) واللاعب عند التسديد أصبح (أجهر) وماكان شايف الزاوية اليسرى فلعبها بالزاوية اليمنى.
*حركات (شناوية) وكدة يعني مش محمد الشناوي قال الأهلي فريق كبير ويفترض الا يلعب الشمس بتجهرني.
*الموية مويتنا والكهرباء كهربتنا وبرضو طيرت حمامتنا.
*اندية أوروبية تراقب طيران الحمام من برج المراقبة في مطار القاهرة الدولي الى ان ركب الحمام التونسية ووصل الحمام بامان الى مطار الخرطوم الدولي.
*(الحمام حاضن) ومن تحته أصفار بالجملة والكيمان.
*المشروع القصود ود من هيثم لاعب المريخ السابق هو (مشروع التفقيس) وموعدكم معه في القرن القادم.
*مسؤولين من الخير : الهلال سيلعب دور الثمانية في ليبيا متين ؟
عصام هجو
esamhajo@gmail.com