لاعبكم بتحرسوه بي (بودي قارد) ولاعبنا بنحرسه بالشرط الجزائي (مليون دولار)
صابنها
محمد عبد الماجد
لاعبكم بتحرسوه بي (بودي قارد) ولاعبنا بنحرسه بالشرط الجزائي (مليون دولار)
· في السنوات الماضية تعودنا على ان كل محترف يغادر الهلال يكلف خزينة الهلال اموال طائلة تفرضها (الفيفا) وتجبره عليها.
· يبقى لينا في رقبتنا.
· امبومبو.
· عماد محسن.
· بولعويدات.
· شهاب بن فرج.
· حتى كاديو لم نسلم منه ، بعد انهاء التعاقد معه تم دفع مستحقاته على دائر المليم.
· اللاعب المشطوب في الهلال بندفع فيه قروش اكتر من القروش التى دفعت حينما تم تسجيله في الهلال.
· الشطب في الهلال اغلى من التسجيل.
· حقوق المدرب الفرنسي كافالي جعلت الفيفا تخصم (6) نقاط من رصيد الهلال افقدته بطولة الممتاز في 2018م.
· كافالي شال (6) نقاط من الهلال ومائة الف دولار.
· قطع نفسنا.
· الآن الهلال يحمي تعاقداته بشروط جزائية ، وصل احدها الى (مليون دولار) يدفعها المحترف العاجي والقادم من الوداد محمد اوتارا في حال اختياره لفسخ تعاقده مع الهلال.
· محترف شرطه الجزائي مليون دولار – دا يا ربي سجلوه بي كم؟
· جنسو شنو دا؟
· وجايبنو من وين؟
· مدافع شرطه الجزائي كدا – يا ربي دا كورتو كيف؟
· والله انا خايف (السيستم) دي ما يستحملها ليكم.
· خايف السيستم يطق.
· يطرشق عديل كدا.
· الشيء ما بستحمل ليكم البعمل فيه السوباط دا.
· نحن الست اصفار قدام (الجنيه) ما بنقدر نختها انتوا يا لجنة تطبيع الهلال وضعتوها لينا قدام (الدولار).
· ولا بنعرف نكتبها.
· هسع ديل وضعوها قدام الدولار.
· رمضان عجب بكون رأسو لف مع هذا الرقم زي الفاضلابي البقى اخطر من (فضيل) امام الارقام التى يدفعها هشام السوباط رئيس الهلال.
· والله يا الفاضلابي نحن ذاتو متحيرين زيك.
· الزول دا مالو؟
· نحن برضو ما فاهمين حاجة.
· عندنا (مروحة) في البيت كل ما تجيب ليها سيرة (السوباط) بقع منها جناح.
· عندنا تلاجة بقت تطلع (تلج) ملون مع تسجيلات الهلال دي.
· الهلال اصبح يحمي لاعبيه بشروط جزائية تصل الى مليون دولار ، في عقد يمتد الى (4) مواسم.
· ناس المريخ بحموا في محمد الرشيد اللاعب الوطني بي (البودي قارد).
· مع الرشيد بيعملوا كدا.
· ما عندهم ثقة في الرشيد.
· التش احسن من هسع تتعاقدوا مع شركة الهدف او قوات الدعم السريع عشان يحرسوه ليكم.
· بودي قارد واحد ما بحلكم.
· ولا دستة.
· فروقات كبيرة وضحت بين الهلال والمريخ.
· المريخ خطف لاعبه محمد الرشيد بقوة امنية وحجز عليه جبريا – والهلال ترك لاعب المريخ علي ابوعشرين حر ليقوم بتسليم نفسه الى غرفة تسجيلات الهلال برغبته وبدون ضغوط اعلامية او جماهيرية.
· فرق كبير.
· يخطفو لاعبهم.
· ولاعبهم يسلم نفسه في الهلال تاني يوم باختياره ورغبته.
· ابوعشرين قدم مباريات العمر مع المريخ بعد التوقيع مع الهلال وكان هو السبب الرئيسي في فوز المريخ بالممتاز ليؤكد اللاعب احترافيته وإخلاصه للشعار الذي يلعب له.
· البعمل فيه ابوعشرين دا قمة الاحتراف.
· نحن في حاجة الى لاعب بهذه القيمة وهذا الوفاء.
· المريخاب مفروض يعملوا تمثيل للاعب ابوعشرين ، وهو يرفض ابتزاز النادي او المتاجرة بعرض الهلال لرفع قيمته كما فعل غيره.
· يستحق ابوعشرين الاحترام والتقدير …وليس الهجوم والانتقاد.
· ابوعشرين احترم تعاقده وكان عنده كلمة ، غير رمضان عجب ومحمد الرشيد اللذان يمارسان سياسة ليّ الذراع مع المريخ.
· موضوع الرشيد وعجب هسع بقى حار على المريخاب.
· عجب والرشيد وضعوا ارقام للمريخ كان احسن منها يفوتوا عديل كدا.
· تسجيل عجب والرشيد في المريخ بهذه الارقام مكسب كبير للهلال لا يقل عن مكسب انتقالهما للهلال.
· ناس المريخ قالوا لو السوباط استمر بهذه الطريقة احسن ليهم يلعبوا في (الوسيط).
· الكلام دا ما بقدروا عليه.
· ولا عندهم ليه (رقبة).
· الايام دول.
· انا ما عارف المريخاب زعلانين في شنو؟
· انتوا زمان وصلتوا اسعار المعز محجوب وعمر بخيت الى ارقام فلكية.
· في زول كان قال ليكم حاجة.
· كنتوا بتعتبروا ذلك (شطارة) من جمال الوالي.
· اتعاقدتم مع بكري المدينة بعد تعاقده مع الهلال وحسبتوها فلاحة.
· ليه هسع بقت ليكم حارة في ابوعشرين؟
· سجلتوا كلتشي قبل انتهاء تعاقده مع الهلال.
· الهلال انتظر الرشيد ورمضان عجب وابوعشرين حتى انتهاء الموسم رغم انتهاء تعاقدهم مع المريخ.
· كان يمكن ان يخطف الهلال ابوعشرين وعجب والرشيد من شهرة خمسة او ستة ويحرم المريخ من وجودهم ومشاركتهم معهم في هذا الموسم.
· لكن الهلال فضّل ان يتعامل بأخلاق.
· حتى اخبار التعاقد مع رمضان عجب ومحمد الرشيد وابوعشرين فضّل الهلال عدم الاعلان عن التعاقد معهما بصورة رسمية.
· رغم ان اللوائح والقوانين تمنح الهلال واللاعب حق الاعلان عن صفقاته – وفي عين اتخن تخين.
· نادي بيراميدز المصري تعاقد مع كابتن الاهلي المصري احمد فتحي …وحرم الاهلي من مشاركة اللاعب معه في النهائي الافريقي.
· الاهلي المصري احترم تعاقد احمد فتحي مع بيراميدز رغم حاجته الشديدة له ، ورغم الضغوط الاعلامية والجماهيرية التى طالبت باللاعب.
· ناس الاهلي ما عملوا زي المريخ وقالوا يوقعوا مع احمد فتحي عشان يخربوها عليه.
· هي ما شطارة.
· هي ما فلاحة.
· التجاوزات في التعاقدات حدثت من المريخ وليس من اللاعبين.
· لوموا المريخ – لا تلوموا ابوعشرين الذي احترم تعاقده مع الهلال بعد انتهاء عقده مع المريخ.
· لوموا مجلس المريخ وإعلامه ، بدلا من انتقاد رمضان عجب والرشيد اللذان بحثا عن مصلحتهما.
· القانون يكفل لهم.
· اللوم على رمضان عجب ومحمد الرشيد يأتي فقط من ابرام تعاقدات اخرى مع المريخ بعد تعاقدهما مع الهلال.
· لكن مع هذا فان اللوم الاكبر يقع على المريخ النادي الكبير والذي وقع عقودات مع لاعبين يعلم انهم وقعوا لنادي اخر.
· من يتحدثون عن القيم والمثل عليهم ان يلوموا مجلس المريخ على هذا التجاوز.
· مؤسف ان يلجأ اعلام المريخ الى تخوين ابوعشرين الذي كان وفيا معهم حتى اخر لحظة في مباراة القمة الاخيرة.
· ابوعشرين بموقفه هذا مفروض تعملوا ليه تمثيل.
· ما قدمه ابوعشرين من دروس يجب ان يجد الاشادة والتقدير.
· الاتحاد السوداني نفسه يجب ان يقف عند هذا اللاعب الذي احترم تعاقده مع الهلال وظل وفيا ومخلصا للمريخ حتى بعد تعاقده مع الهلال.
· هذه عملة نادرة ووفاء كبير من اللاعب ابوعشرين.
· اعلام المريخ بعد هذه (الفرفرة) اتجه نحو اشاعة الاصابة بالرباط الصليبي للاعبين الذين انتقلوا للهلال.
· اتجهوا الى اسلوب غير (اخلاقي) لتبخيس صفقات الهلال.
· من يفعلوا ذلك مع لاعب المنتخب الوطني ياسر مزمل يبقى لا غريب عليهم ان يفعلوا اسوأ من ذلك مع لاعبين انتقلوا من فريقهم الى نادي الهلال العظيم.
· عادي عندهم.
· ………
متاريس
· اخشى على الهلال بعد هذا الفريق (الحلم) والفرح العريض ان توقعه القرعة مع فريق يجيب لينا الهوا.
· ان شاءالله العواقب تجي سليمة.
· نسأل الله قرعة سهلة للهلال.
· عشان الهلال كوّن فريق جديد وبيلعب مبارياته الاربع الاولى في البطولة الافريقية بدون جمهور.
· الفرحة دي ما عاوزنها نخربها بالتمهيدي.
· جهاز فني جديد واكثر من 17 لاعبا جديدا سوف يلعبون بعد اسبوعين مباراة رسمية.
· ادعوا معاي القرعة تكون سهلة.
· وطريق الهلال يكون ميسر وسهل نحو المجموعات.
· لو وصلنا المجموعات وتجاوزنا حمى البدايات بهذا الفريق الحلم ممكن نشيل البظولة ان شاءالله.
· بالمناسبة التمرين الاول للهلال – اذبحوا فيه الذبائح …اضبحوا ليكم عجل …وزعوه على الفقراء والمساكين.
· اعملوا ليكم كرامة.
· حصنوا لعبية الهلال – ربنا يحفظهم من الاصابات والعين الحارة.
· ابدأوا بداية صحيحة – باسم الواحد القهار نبدأ موسم ننتظر ان يحقق الهلال فيه القاب كل البطولات والمنافسات التى يشارك فيها.
· وان شاءالله خير.
· خير في كل حتة وجانب.
· نفرة التش وصلت وين؟
· قالوا جابت ثمن الركشة.
· 500 الف دولار ما كتيرة على التش.
· الت شدا سجلوه بالدولار.
· عشان تقفلوا الباب تماما على المريخ.
· ديل لسه بحسبوا فيها بالجنيه.
· الهلال دفع (300) الف دولار للوداد مقابل اطلاق سراح محمد اوتارا.
· دا غير نصيب اللاعب.
· وصفقة فيني كومبي وصلت 800 الف دولار.
· والله الفاضلابي اصلو ما غلطان.
· لاعب الشباب الشيخ محمد اخطر وافضل من كل المواهب الموجودة في الساحة.
· الشيخ اخطر من عزام والتش.
· الكلام دا حسب رأي زول متابع وخبير.
· ما عارف ليه لجنة التطبيع الهلالية تأخرت في موضوع عزام عادل.
· أي حاجة عندهم اتحسمت في لحظة.
· إلّا موضوع عزام عادل ود البيه.
· المريخ اذا قدم 45 مليار لاطهر الطاهر ما الذي يمنعه من ان يقدم 35 مليار لمحمد الرشيد.
· يعني كتيرة على ولدكم.
· ………..
· ترس اخير : ناس المريخ الايامات دي لو صبت فيهم مطرة يقولوا ليك السوباط
خلاص شوفوا ليكم حل مع شطه وادفعوا تقيل
علشان يختكم مع فرق تعبانه او من الان شوفوا
اداري شاطر ومعاهو حزمة دولارات بس ما يكون بتع مشاكل وبونيه ويسلمو للحكم..
وان شاء الله يجيبو ليكم حكام هجين حكام لا يجيدو انجليزي لافرنساوي بس سواحلي.. موت
يا ود الماجد وان شاء الله تكون في صفركم الي
ان يرث الله الارض..خطفتم جمال وماذا جنيتم
ولسع في صفركم وسجلتم ابوعشرين برضو حتكونوا في صفركم ..
المريخ عالم جميل..صفوه.. بس المجلس يغادر وحيغادر عاجلا ام آجلٱ..