لا تحكيم ..لا تنجيم ..لا تنجيل وقوفو.. قالوا احسن يؤجلوا

صابنها

محمد عبدالماجد

لا تحكيم ..لا تنجيم ..لا تنجيل وقوفو.. قالوا احسن يؤجلوا

· ناس الاتحاد ديل مرة وقفوا الدوري (3) شهور عشان ناس رمضان عجب ومحمد الرشيد وبخيت خميس يتموا فترة الايقاف ويرجعوا يلعبوا مع المريخ.
· انتظرنا ثلاثي المريخ لمن فترة الايقاف حقتهم انتهت.
· بعد دا ما شالوا الدوري.
· سمحوا ليهم يلعبوا بـ (42) لاعب .. تقول بيلعبوا في دورة رمضانية.
· وبرضو ما عملوا حاجة.
· الجاكومي وكابو قالوا ما في (تكافؤ فرص).
· وصلنا معاهم (بربر).
· تاني نعمل اكتر من كدا شنو؟
· المريخ في ام درمان انتصر على الاهلي شندي بهدف وحيد ونقض الحكم هدف صحيح للأهلي شندي.
· الهلال في بربر انتصر على الاهلي شندي بهدفين .. ونقض الحكم هدف صحيح للهلال.
· نعمل ليهم اكتر من كدا شنو؟
· نتقطع ولّا نبقى ليهم (بامية مفروكة).
· الاهلي شندي امام الهلال لعب بمصعب كردمان الذي تمنعه اللائحة من اللعب امام المريخ .. وشارك امام الهلال في بربر مع الاهلي شندي افضل لاعبي الاهلي (كومي) الذي كان غائبا من لقاء المريخ.
· مع ذلك الهلال حسم المباراة في بربر بكل يسر وسهولة.
· شانتير لو ما شايفها شينة .. كان وقف حارس مرمى للأهلي شندي.
· الجماعة ديل وقفوا عماد الصيني (6) شهور – تقول كاتل ليه رقبة .. وهو لا بدل في البيانات ولا زايد في الحافز.
· زول فسخ عقدو ولجنة شئون اللاعبين اعتمدت ذلك – في داعي يتم ايقافه (6) شهور.
· لجنة الانضباط قربت تحيل اوراق عماد الصيني الى فضيلة المفتي.
· الناس ديل ما بخافوا الله.
· لمن تم ايقاف رمضان عجب ومحمد الرشيد وبخيت خميس .. الجهاز الفني للمنتخب الوطني بقيادة برهان تيه ومحسن سيد دافعوا عن هذا الثلاثي ، وكبوا (الجرسة) وقالوا ديل بيلعبوا للمنتخب وتم اختيارهم للمنتخب رغم الايقاف.
· عماد الصيني دا شنو؟
· يا متعلمين يا بتوع اللوائح … عماد الصيني ايضا بيلعب في المنتخب وهو من اهم اعمدته.
· لكن ناس برهان ما بشوفوا غير ناس بخيت خميس.
· اغرب من ذلك انهم ظلوا يختاروا للمنتخب الوطني الحارس احمد بيتر الذي لا يشارك حتى مع المريخ – حتى بعد ان تم حل مشكلته القانونية وسمكرة شهاداته.
· احمد بيتر دا ما شفنا ليه حاجة غير صورتو مع محمد النصري.
· المفارقة انهم ابعدوا عمار طيفور ايضا من المنتخب .. حتى يشكلوا عليه ضغط من اجل ان يعيد تسجيله في المريخ وقد فعل.
· برهان تية ومحسن سيد حولوا المنتخب الوطني الى (كافتريا) لتلبية طلبات نادي المريخ.
· الاتحاد جاهز لتلبية طلبات المريخ.
· هسع المنتخب الوطني وقت لقى الموضوع بائظ بائظ .. قام جهازه الفني طالب بتأجيل الدوري حتى يلعب المنتخب مباراة ودية ما عندها أي قيمة في ايام الفيفا.
· كان افضل للمنتخب استمرار الدوري الممتاز .. بعد التصاعد الذي حدث في مباريات الدوري الممتاز.
· تأجيل الدوري سوف يتسبب في هبوط المستوى الفني والبدني وسوف يكلف الاندية الكثير .
· اندية الممتاز ما ح تعرف تفض المعسكر وإلّا تستمر فيه في ظل الاوضاع الاقتصادية الصعبة.
· تأجيل الدوري الممتاز اكيد عندو علاقة بـ (نزيف) المريخ.
· المريخ بنزف.
· المريخ بنقط.
· ألحقوا المريخ.
· ادركوا المريخ يا محسن سيد.
· الشيء شنو؟
· الشيء ابت تقيف.
· قدر ما اجتهدوا عشان يوقفوا النزيف ما عرفوا.
· في كوستي نقطت.
· في مروي نقطت.
· قالوا يلحقوا الحكاية قبل ما تصب.
· خاصة ان مواجهة المريخ القادمة كانت سوف تجمعه مع فريق حي العرب المتصدر الذي لم يخسر وتعادل مرة واحدة.
· الهلال حقق (5) انتصارات متتالية في الدوري.
· لعبوه في عطبرة .. جاب (6) نقاط.
· العلامة الكاملة.
· ما نقصت نقطة.
· ولا كلمة!!
· رجعوه الخرطوم فاز على الرابطة كوستي التى فازت على المريخ.
· لعبوه في (بربر).. انتصر على الاهلي شندي.
· قالوا احسن يلحقوا الحكاية .. قبل الهلال ما يجيب العلامة الكاملة من الشمال.
· علقوا مباراة مروي.
· هم عارفين الهلال ما في حاجة بتثبته.
· تحكيم.
· تنجيم.
· (تنجيل).
· في ام درمان في عطبرة في بربر .. الهلال بفوز.
· بي شانتير.
· او بي مبارك الفاضل الهلال بفوز.
· عليكم الله هسع الهدف الذي سجله الهلال في مرمى الاهلي شندي ونقضو الحكم مالو؟
· الجماعة الكانوا بتكملوا عن هدف شلش في الهلال مالهم سكتوا؟
· الجماعة سكتوا من هدف ولاءالدين الذي سجله في مرمى المريخ ولم يحتسبه حكم القضارف النور.
· الهلال تاني ما بقيف.
· الحكم على كيفو.
· يحسب اليحسبو.
· برضو بنفوز.
· نلعب في نجيلة طبيعي او صناعي .. ما فارقة معانا.
· ناس ليليبو ديل لو لعبوا في (حوش) ما في زول بقدر عليهم.
· حواشة ما بتفرق معاهم.
· ليليبو في عطبرة – شرطة الولاية والمدفعية عطبرة ما قدرت تثبتو.
· الشيء شنو؟
· ما شاءالله.
· عليكم الله هسع في داعي تقطعوا لينا انتصاراتنا دي.
· في داعي تطلعوا فاصل في الوقت دا.
· الهلال ماشي زي الطلقة.
· ما في حاجة بتثبتو .. إلّا (التأجيل).
· اجلّ ليّ يا معتصم .. اجلّ ليّ.
· ناس المريخ عاوزين يلحقوا روحهم .. بالطريقة دي ممكن يهبطوا من الدورة الاولى.
· وقفوا ليهم الدوري.
· اصلهم وقت يشعروا بالضغط بعملوا كدا.
· ح ننتظر المدرب الجديد لمن يدخل في التوليفة.
· وح ننتظر (النجيلة) تقوم.
· نجيلة (تركية).
· نجيلة (حميدتي).
· الجاكومي طبعا لغاية الآن قلاب الرملة قاطع قلبو.
· بسدد في فاتورة القلاب لغاية الآن.
· ح نتتظر بخيت خميس وكرشوم يرجعوا.
· ناس صلاح نمر براهم ما بقدروا على الشغلة.
· الامر الجميل والشيء الذي نشكر عليه اللجنة المنظمة هو برمجة مباراة نهائي كأس السودان لتلعب في استاد الهلال يوم 14 نوفمبر القادم.
· هذا الامر يمكن ان يغفر للاتحاد خطأ التأجيل .. ويمكن ان يمنح الاتحاد العذر في التأجيل … وهو امر مقبول.
· لكن تأجيل الدوري للمنتخب في هذا التوقيت اعتقد انه امر لم يكن الاتحاد موفق فيه.
· البركة في نهائي كأس السودان.
· الكأس يا هلال.
· ……………….
متاريس
· ارضية استاد بربر رائعة.
· لكن ليليبو .. ما بتفرق معاه.
· في الحالتين بقوم جاري.
· ما في زول بقدر يثبتو.
· ثلاثي الامل لغاية الآن نفسهم مقطوع.
· ومعاهم صلاح نمر.
· صلاح نمر ذنبو شنو؟
· صلاح نمر بتابع مباريات الهلال.
· بالطريقة دي مباراة القمة .. ما اظن تتلعب في الموسم دا.
· يا ناس مريخ كريمة حقكم علينا.
· اسامة عبدالجليل مرة شال المدرب بين الشوطين عندما كان رئيسا لنادي الامير … ما غريبة عليه يرجع وما يبلي دعوة مريخ كريمة.
· الشباب التنزاني فاز على الافريقي في تونس وتأهل لمرحلة المجموعات في بطولة الكونفدرالية.
· الافريقي التونسي فريق ممتاز وقوي مع ذلك استطاع الشباب الفوز عليه في تونس.
· الهلال كبير.
· قلنا ليكم كدا – قعدتوا تغالطوا.
· الشيء الغريب ان نهضة بركان بعد فلوران فشلت في التأهل لمرحلة المجموعات ..وهم ابطال الكونفدرالية.
· واضحة كدا.
· الغربال سجل.
· وارنق رجع.
· كل حاجة تمام.
· وفترة التوقف ان شاءالله الهلال يكون اكثر فريق مستفيد منها.
· مدرب الهلال فلوران .. بعمل في حاجات .. نحن ما بنفهمها.
· الزول دا نحن ما عارفنو عاوز يعمل شنو؟
· حيّر الاجهزة الفنية التى تشرف على الاندية التى يواجهها الهلال.
· الحمدلله الهلال عاد من بربر بنقاط غالية.
· برمجوا للهلال مباراته القادمة مع حي العرب .. الفريق المتصدر.
· فاكرين حي العرب ممكن يوقف الهلال.
· المفارقة ان حي العرب كان يفترض ان يلعب الثلاثاء القادمة امام المريخ.
· هربوا من حي العرب.
· وجابوا حي العرب للهلال.
· ونحن ما فارقة معانا.
· جيبوا لينا المريخ ذاتو!!
· ناس ليليبو ديل ما بتفاهموا.
· ولا بتفرق معاهم في شيء.
· الآن يجب ان يكون تركيز الهلال كله في النهائي.
· يمكن الاستفادة من تأجيل الدوري في التركيز في نهائي كأس السودان.
· جمهور الهلال والاولتراس على وجه التحديد ينتظره دور كبير في نهائي كأس السودان.
· الكأس يا هلال.
· 14 نوفمبر .. الموعد المحدد للنهائي .. القوة كلها جوة في الجوهرة.
· ………………
· ترس اخير : ادعم فريق المريخ بتأجيل الدوري.