لا يضر الشاة سلخها بعد (فسخها)

صابنها
محمد عبد الماجد
لا يضر الشاة سلخها بعد (فسخها)

• من زمن طويلا ربما منذ انتقال اللاعب علاءالدين يوسف (فييرا) الى الهلال لم اشاهد فرحة واحتفاء بتسجيل لاعب مثلما شاهدت ذلك وشعرت به من جمهور الهلال بعد عودة اللاعب عماد الصيني لكشوفات الهلال من جديد.
• صور الصيني بعد العودة للهلال صور عريس… وفرحة جماهير الهلال بعودة نجمها هي شهادة ضمان لنجاح اللاعب مع الهلال في الفترة القادمة.
• عندما انتقل فييرا الى الهلال لم يكن وقتها هنالك (مواقع تواصل اجتماعي) لتحتفي وتبتهج كما فعلت الآن بعودة الصيني الى الديار الزرقاء بعد (غربة) في القلعة الحمراء انتهت بدرس قاس قدمه عماد الصيني للمريخ بعد ان قام بفسخ تعاقده مع المريخ – رغم انه موقع على (عقدين) في المريخ ، إلّا ان ذلك لم يمنعه من (الفسخ).
• زول يفسخ عقدو في كشفين .. دي ما حصلت قبل كدا!!
• ناس الصدى – كالعادة قالوا ايمن ابوجيبين رفض اعتذار الصيني للعودة من المريخ.
• معذورين.
• حالتهم صعبة … لغاية الآن ما عارفين المريخ ح يلعب وين؟
• ناس الصدى اعادوا بشكل اخر (مانشيت) الاهلي شندي يمقلب الهلال في ياسر مويس ووالي الدين خضر .. بعد ان اكدوا اصابتهما بالرباط الصليبي .. وعدم جدوى تسجيلهما في الهلال.
• ياسر مويس وبوجبا هسع مع المنتخب في بطولة الشأن بعد النجاحات الكبيرة التى حققوها مع الهلال.
• الغريبة بعد هذا الخبر الذي (شمتت) فيه صحيفة الصدى من اصابة ياسر مويس وبوجبا .. ظل افضل لاعب في المريخ التش يطلع من رباط صليبي ويدخل في رباط صليبي .. نتمنى لهذا اللاعب الشفاء العاجل والعودة من جديد .. ونحمّل المريخ التسبب في اصابة التش الذي يشركه قبل ان يكتمل الشفاء ومن غير تدرج في ملاعب ارضيتها اقرب للزلط.
• يا التش ناس المريخ ضيّعوك .. لو كنت في الهلال كانوا عرفوا يقيموا موهبتك جيدا.
• خبر (الصدى) عن رفض ابوجيبين اعتذار الصيني تأكيد ان المريخ خطط مع لجنة (متعصب عبدالسلام) من اجل عرقلة انتقال الصيني للهلال.
• والله انتوا يا ناس الصدى براكم بتكشفوا نفسكم.
• بتكشفوا ورقكم.
• الكديسة ما لقت اللحمة قالت شنو؟
• ناس المريخ شالوا المدير الفني غازي الغرايري .. عشان الصيني يرجع… الصيني ما رجع.
• شالوا ليه مدير الكرة عبدالكريم النفطي .. برضو الصيني ما رجع.
• شالوا الرئيس حازم مصطفى ذاتو .. والصيني ما رجع.
• شالوا المجلس كله .. وجابوا مجلس جديد .. وعملوا ليهم مجلس شورى .. والصيني ما رجع.
• جابوا الدعم السريع .. ما رجع.
• أي زول عندو مشكلة او خلاف مع الصيني في المريخ شالوه .. عشان يرجعوه تاني.
• واتوا بعد ذلك وقالوا ان ابوجيبين رفض اعتذار الصيني للعودة للمريخ.
• انتوا الصيني غيرتوا ليه البلد كلها .. عشان يرجع.
• الصيني رفض .. ورجع للهلال.
• هو الصيني كان بعتذر كان بفسخ!!
• فسخ عقدين وليس عقدا واحدا.
• في زول بقبّل شعار الهلال بهذه الفرحة والسعادة .. بفكر في الرجوع للمريخ.
• بعدين ابوجيبين ذاتو عرفة من متين؟
• الزول دا قال المريخ بيلعب في استاد المريخ مباريات المجموعات .. وما حصل الكلام دا.
• وقال المريخ ح يلعب في ملعب المدينة الرياضية .. وما حصل الكلام دا.
• وقال ح نلعب في استاد الهلال .. وبرضو ما حصل.
• الكلام كله طلع (صور) ساكت.
• الزول دا شغال في المريخ (الكاميرا الخفية) ح نفتح الموضوع دا قريبا .. ونكلمكم عنه.
• اصبروا بس … عندنا حلقات عجيبة من برنامج (الكاميرا الخفية) مع ايمن ابوجيبين ان شاءالله في الايام القادمة.
• انتوا ما تستعجلوا.
• نحن أي حاجة عندنا بنظام.
• كنا بنسمع عن (الفسخ والجلخ) .. الفسخ شفناه فيما قام به عماد الصيني اما (الجلخ) فهو قادم بعد انتقال (خ 910) للهلال ان شاءالله.
• ضربة (خ 910) اذا تمت لا تقل عن ضربة الصيني.
• انجز يا العليقي بقلب قوي.
• بحسب متابعتنا لملف الصيني .. كانت هنالك تحركات قوية من المريخ لإعادة اللاعب للمريخ .. وقد ظهر ذلك في قرار لجنة الاستئنافات (المطبوخ) بعد استئناف لجنة اوضاع اللاعبين (متعصب عبدالسلام) لعرقلة انتقال الصيني للهلال ..لأن المريخ كان يبحث عن قطع الاتصال والود بين الهلال واللاعب .. وقد كاد ان ينجح المريخ في ذلك في ظل (تردد) الهلال في تسجيل الصيني .. وقد كان هناك تفكير في تخزين الصيني في توتي او الاهلي الخرطوم حتى التسجيلات القادمة وانتهاء عقوبة الصيني .. لكن ادارة الهلال اكتشفت ان عقوبة الصيني لا تمنعه من المشاركة مع الهلال خارجيا .. كما ان لجنة الاستئنافات بعد مراجعة قرارها السابق وفي حضور الرئيس وبقية الاعضاء يمكن ان تعود وتعلق عقوبة اللاعب وتؤيد قرار لجنة الانضباط.
• لهذا تسجيل الصيني في الهلال شكل ضربة قاضية للمريخ وكان بمثابة صدمة قاسية.
• اعود وأقول ان فرحة جماهير الهلال واحتفاله بانتقال الصيني للهلال رغم ان العملية بدأت منذ اكثر من (5) اشهر ويفترض ان تكون فقدت دهشتها وفرحتها ، حيث تفاعل جمهور الهلال العظيم مع انتقال اللاعب للهلال وكأنه خبر جديد ومفاجأة حديثة.
• لأول مرة اشاهد جمهور الهلال بهذا التفاعل .. وهذا يؤكد نجاح الصفقة ..لأن جمهور الهلال لا يتفاعل إلّا مع لاعب صاحب قيمة .. ولا يفرح من فراغ .. ليس هنالك شهادة نجاح اكثر من الشهادة التى قدمها جمهور الهلال وهو يحتفل بتوقيع اللاعب في كشوفات الهلال.
• ارجع وأقول الهلال أي حاجة عملها في المريخ.
• أي شيء.
• مارس الهلال (تعسف) واضح في عملية انتقال لاعبين من كشوفات المريخ الى كشوفات الهلال بإشكال وكيفيات مختلفة.
• عماد الصيني اول لاعب في القمة السودانية يقوم بفسخ تعاقده من اجل ان ينتقل للنادي الاخر.
• وثقوا الكلام دا وسجلوه.
• فسخ زي دا نحن ما شفنا.
• فسخ تعاقده بعد ان وقع على (عقدين) مع المريخ.
• سمعنا بانتقال لاعب من المريخ بعد انتهاء تعاقده مع المريخ الى الهلال كما فعل حمودة بشير وعلاءالدين يوسف وعلي ابوعشرين.
• حمودة بشير شال (شنطتو) من معسكر المريخ وانضم للهلال .. قالوا (مصاب).
• جاء حمودة بشير وقدم اجمل مواسمه في كرة القدم مع الهلال.
• علاءالدين يوسف وابوعشرين .. كانوا مع المريخ لأخر مباراة ، حتى اخر نفس .. تألقوا امام الهلال .. وفاز بفضلهم المريخ على الهلال وانتقلوا بعد ذلك مباشرة الى الهلال.
• فييرا انتقل بعد مسلسل (البصمة) الشهير .. ويجي (متعصب) عبدالسلام يقول ليك قدمنا استئناف ضد رفع الايقاف عن الصيني عشان ما تكون سابقة .. وعشان يكون في احترام للعقود.
• وأنت مالك؟
• عمليتك دي ابوجريشة ما بعملها.
• انت كنت وين يا متعصب عبدالسلام وقت المريخ زوّر (بصمة) فييرا؟ .. ولغاية الآن ما في زول اتعاقب على هذا (التزوير).
• احترام العقود ام تزوير البصمة ؟
• نحن سمعنا بتزوير (التوقيع) .. لكن تزوير (البصمة) دي ما حصلت إلّا في المريخ.
• فييرا وابوعشرين .. انتقلوا للهلال بعد ان اقتلعهما الهلال من (التشكيلة) الاساسية للمريخ.
• قلعهما الهلال من (الميدان).
• اما شرف الدين شيبوب فهي عملية نشهد بها لأشرف الكاردينال .. مثلما شهدنا لصلاح ادريس في عبقرية انتقال فييرا للهلال.
• شيبوب اقتلع من الكشف.
• من الكشف عديل كدا.
• ناس المريخ عملوها بكاء وولولة .. وتنطيط من مطار لمطار .. وسفر الى جوبا واختطاف وعنتريات وقفز من الطابق الرابع وفي النهاية اللاعب اصبح لاعبا للهلال.
• انتقال شيبوب للهلال .. كان من اروع عمليات انتقال لاعب من القمة الى القمة.
• قالوا شيبوب (هاوي).. طيب الصيني شنو؟
• يا الهاوي يا مجافي.
• الصيني (محترف) .. وعشان تستوعبوا الدرس – المرة دي الانتقال تم عن طريق (الفسخ).
• ما في اقسى من ذلك.
• لا كبري ولا مطار.
• تقلع من جوة الكشف.
• الصيني ناس العليقي (جابوه حي) من كشوفات المريخ .. جابوه محترف .. (امسح وأكسح وافسخ) .. زي ما كتبنا عن ذلك بهذا العنوان من قبل.
• قبل كدا طبعا الهلال سجل من المريخ بعد الشطب عبده الشيخ .. عشان (مصاب) .. الهلال سجل عبده الشيخ بالعكازة .. وجاء عبده الشيخ ونجح نجاحا كبيرا في الهلال.
• ما حدث مع عبده الشيخ حدث بنفس السيناريو والتفاصيل مع نصرالدين الشغيل الذي شطبوه بسبب الاصابة وجاء الشغيل وقدم اروع (10) سنوات له في الملاعب.
• لا ننسى في هذا السجل المشرف انتقال جمال سالم .. فقد كان انتقال هذا اللاعب للهلال امرا مفرحا ورائعا جدا.
• ما عاوز ارجع للوراء والتاريخ كتير .. بس كان مهم ان نذكر هذه الاحداث بعد انتقال عماد الصيني للهلال بعد (الفسخ).
• انا كنت مفتكر الجرح شفى في المريخ بعد الفسخ .. لكن اكتشفت بعد فسخ مضى عليه اكثر من (5) شهور ناس المريخ لسه بتألموا وبتوجعوا .. زي كأن الجرح او الفسخ جديد عليهم.
• متعصب عبدالسلام حاول يعمل (تخدير) .. ما قدر.
• مفروض لا يضر المريخ تسجيل الصيني في الهلال بعد ان فسخ عقدو معهم.
• لا يضر الشاة سلخها بعد ذبحها.
• او لا يضر تسجيل الصيني في الهلال بعد ان فسخ عقدو في المريخ.
• بس اتضح ان الجماعة ديل لسه (شايلين جراح).
• نرجع الى الفوائد (الفنية) في تسجيل الصيني للهلال .. ولعلها اولها ان وجود الصيني في الهلال سوف يرفع من معدل (الاطوال).
• اتخيلوا تشكيلة الهلال يكون فيها صلاح عادل وبوجبا والصيني وليليبو .. (ملوك الجو).
• وهناك سليمان عز الله (10 طوابق) ما شاءالله وهو لاعب سوف يكون (مفاجأة) للجميع.
• وهنالك ايضا اللاعب الفنان طلال عادل.
• وفي المقدمة الهلال الاطوال متمثلة في جون مانو وانس نيمار.
• وامجد قلق .. والقائمة تطول وتطول.
• هيبة ورهبة.
• تاني ما ح يكون في مشكلة في العكسيات .. ولا في الالتحامات.
• ناس المريخ في ظل هذه (الاطوال) احسن يشوفوا ليهم بلد ويلعبوا برة.
• الكلام دا ما بقدروا عليه.
• خاصة اذا تم تسجيل مدافع ومهاجم من نفس الاطوال.
• الصيني يمكن ان يبدد المخاوف على الدفاع ..لأن اللاعب يمكن ان يلعب في قلب الدفاع ويقطع الموية والنور.
• الحمدلله تخطيط متعصب عبدالسلام واستهدافه للهلال .. راح ساكت.
• والصيني في الهلال الآن.
• صفقة بخمسة محترفين.
• …………….
متاريس
• ناس الصدى زعلانين زعل.
• الفسخ ظهر تأثيرو عليهم يا دوب.
• بعد الصيني ما افتكر الهلال عاوز ليه ابراج جديدة للإضاءة.
• البرج وصل.
• الجوهرة نورت.
• قولوا ما شاءالله.
• الجميل ان الصيني سوف يكون متاح للهلال من اول مباراة في مرحلة المجموعات.
• باقى (خ 910).
• بعد تسجيل الصيني المريخ بكون في الانتظار لتسجيل أي مشطوب من الهلال.
• ما تعطوهم هذه الفرصة.
• ما تفكوا ليهم (موهبة).
• عثمان ميسي وعيد مقدم والشيخ محمد أي واحد فيهم (تعويض) ولا يحلم بيه المريخ.
• النجاح الحقيقي في التسجيلات في (الشطب) وليس في (التسجيل).
• بعد دا.
• عشان تبقوا عارفين بس.
• ………….
• ترس اخير : شكلها ح تمطّر.