لشنو الأرباب ما داير يقتنع إنو الكاردينال رئيس الهلال ؟؟
بالعربي الكسيح
محمد الطيب الأمين
لشنو الأرباب ما داير يقتنع إنو الكاردينال رئيس الهلال ؟؟
* القروش لها (أعراض) مثل (المرض) ..
* أعراض الملاريا هي: (حمى، طُمام ، وجع مفاصل ومرار في الخشم) ..
* وإحنا وأولاد حلتنا كنا لما تجينا (حمى) بننتظر (الطُمام ومرار الخشم) عشان نجيب علاج الملاريا بدون ما نفحص..
* أول ما يظهر (مرار الخشم) بنبلع (الكينين) ..
* وأظن أن الشعب السوداني كله بيعرف (أعراض الملاريا) ..
* أما بالنسبة لأعراض القروش فهي: (الضحك بسبب وبدون سبب، الأكل برة البيت ، التعامل بتعالي مع أصدقاء الفلس ونفش الريش) ..
* في ناس الواحد أول ما تدخل جيبو قروش بينفش ريشو ..
* والله صحي ..
* ممكن يخسرك بسبب نقاش هايف جداً ..
* وبما أن ذلك كذلك فان (قروش) السماني الصاوي التى دخلت خزنة المريخ جعلت (المدفور) ينفش ريشو ..
* الجماعة قبضوا ليهم (200) ألف دولار عملوا لينا فيها (هلال عديل) ..
* وده عيب القروش ..
* المريخ (الفرحان بالدولارات) رفض للإتحاد الليبي مواجهة الهلال ودياً وذلك لأسباب مجهولة.
* ربما يرى أهل المريخ أن الإتحاد إذا لعب مع الهلال سيخدم إعداد الهلال ..
* طيب والمشكلة وين يعني ؟؟
* الإتحاد الليبي هو الذي طلب مواجهة الهلال عن طريق مدربه غارزيتو الذي يعلم علم اليقين أن (الجاي للسودان لازم يلعب مع الهلال) ..
* غارزيتو شايف إنو ما منطقي الإتحاد الليبي يجي لحدي الخرطوم وما يلعب مع الهلال ..
* كده زيارة الإتحاد الليبي ح تكون ناقصة ..
* لن تكتمل الزيارة إلا بعد مواجهة الهلال ..
* وده ما كلامي أنا.. ده كلام غارزيتو ..
* وبصراحة الحركة دي بتزعل والله ..
* حركة إنو تجي على نفقات فريق معين وتطلب مواجهة فريق آخر ..
* دي زي لما تمشي تقابل ليك (بت) في شارع النيل والبت تقعد تعاين لصاحبك ..
* إحساس صعب شديد ..
* المريخ الآن أحس بهذا الإحساس ..
* جابوا الإتحاد الليبي وقام غارزيتو عاين للهلال ..
* الحركة فعلاً بتوجع جداً ..
* المريخ جاب غارزيتو وقام غارزيتو عاين للهلال ..
* والهلال عينو مليانة وما شغال بالموضوع كتير ..
* لكن أنا عايز أقول حاجة ..
* وقبل ما أقول لابد أن أقول (ربما) ..
* يعني الكلام الجاي ده كلو تسبقه كلمة (ربما) ..
* أنا أستبعد أن يكون المريخ هو صاحب القرار فيما يتعلق بمباراة الهلال والإتحاد الليبي ..
* بستبعد الحاجة دي تماماً ..
* لأنو المريخ ما عندو مصلحة (يعادي) الهلال في هذا التوقيت بالذات ..
* كما أن العلاقة بين الهلال والمريخ بعد ذهاب جمال الوالي تبدو جيدة ..
* وقد بادر مجلس المريخ بإرسال تهنئة رقيقة لمجلس الهلال بمناسبة إفتتاح الجوهرة الزرقاء ..
* وأهم من هذا كله فان مجلس المريخ الذي هو بدون (رئيس) لأكثر من خمسة شهور يبدو ملخوماً بصراعاته ومشاكله الداخلية و(توزيع أموال السماني)..
* يبقى من الأرجح أن هنالك شخص فكر وقرر إنابة عن مجلس المريخ ..
* والشخص ده ربما يكون صلاح ادريس ..
* جمهور الهلال لن يستبعد أي محاولات من الأرباب لرمي (الأشواك) في طريق الهلال ..
* الأشواك والعراقيل ..
* وهذا أمر يؤسف له لأن (المتهم) هنا صلاح ادريس الذي كان في يوم ما رئيساً لنادي الهلال ..
* قلنا ربما يكون صلاح ادريس وراء قرار المريخ وذلك لأن صلاح يجتهد في سبيل أن يرى الهلال (ضعيفاً) ..
* عندو مشكلة مع الكاردينال قام عملها مشكلة مع الهلال ..
* المهم في الموضوع إنو جماهير الهلال لم تعد يدهشها صلاح ادريس بتحركاته وتصرفاته وكتاباته ..
* بقى ما مدهش ..
* الغريب في الأمر أي زول (ملحن) بيكون مدهش ما عدا صلاح ادريس ..
* إذا كان الأرباب وراء قرار المريخ بمنع الإتحاد من مواجهة الهلال يبقى ما مدهش .. عادي جداً .. وإذا كان القرار من (بنات أفكار) مجلس المريخ فاننا لم نظلم الأرباب عندما قلنا (ربما) ..
* في الحالتين الحاجة دي ما مستغربة من صلاح ادريس ..
* خصوصاً بعد إفتتاح الجوهرة الزرقاء وبعد حضور رئيس الجمهورية وتكريمه لرئيس الهلال الكاردينال ..
* التلاتة حاجات دي ممكن تخلي صلاح ادريس يعمل أي حاجة بعد كده ..
* وبيني بينكم (الجوهرة الزرقاء) فعلاً يوم بتكتل ليها زول ..
* قاعدة كده زي (الوجنة) في خد أم درمان (ما شاء الله تبارك الله) ..
* صلاح ادريس لما الكاردينال بقى (رئيس ساكت) هو كتب (700) عمود ضد الكاردينال ..
* فما بالك بعد الجوهرة دي الشغل بيكون أصعب ..
* أنا والله حزين جداً ..
* حزين لهذا الدور الذي يلعبه صلاح ادريس ..
* ليه صلاح ادريس يرضى لنفسو (القعاد) في الحتة دي ..
* هسه مستحيل يجي زول يقول (ربما) طه علي البشير وراء قرار المريخ بمنع الفريق الليبي ..
* مستحيل يجي زول يقول (ربما) البرير وراء قرار المريخ بمنع الإتحاد ..
* مستحيل ..
* طيب لشنو ممكن يجي زول ويقول ربما صلاح ادريس وراء قرار المريخ بمنع الفريق الليبي ؟؟
* ليه صلاح ادريس يرضى لنفسه أن يكون في موضع (الشبهات) ؟؟
* ليه الأرباب ما يكون زي الحكيم والكيماوي وشيخ العرب ؟؟
* ليه صلاح ما داير يقتنع إنو الجوهرة حقيقة والكاردينال رئيس حقيقة برضو..؟؟
* ليه الأرباب ما داير يقتنع إنو الهلال ما واقف عليهو ؟؟
* حاجة تكسف والله ..
* وكمان الأيام دي في كلام إنو قناة المريخ هي قناة قوون المملوكة لصلاح ادريس ..
* شخصياً لو الكلام ده صاح ما ح أندهش لكن أتمنى إنو ما يكون صاح ..
* على العموم .. موافقة المريخ للإتحاد الليبي لمواجهة أهلي شندي إحنا وأولاد حلتنا ختينا تحتها (خطين) ..
* وعلى فكرة ..
* ما تنسوا كلمة (ربما) ..
* وغايتو جنس غايتو ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* إنتي وأنا من حقنا …. (نخلط) في مقصورة الجوهرة الزرقاء ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app