لو الهلال خاف من المجموعة طيب المريخ يعمل شنو ؟؟

قزاز ورذاذ
محمد الطيب الأمين
لو الهلال خاف من المجموعة طيب المريخ يعمل شنو ؟؟

* في إمتحانات المدرسة أيام (القراية) كنت انبسط جداً عندما يكون السؤال هو : (ضع دائرة حول الكلمة الشاذة).
* والكلمات هي (البطيخ ، الموز ، الجوافة والأسمنت).
* ببساطة طبعاً الكلمة الشاذة هي (الموز).
* أقصد الكلمة الشاذة هي (الأسمنت).
* تاني يقول ليك : (الشتاء ، الصيف ، الخريف وبلح الشام).
* تستطيع أن تضع دائرة بسهولة حول الكلمة الشاذة.
* وبما أن ذلك كذلك أرجو أن تضع دائرة حول الأسم الأضعف : (الهلال ، الأهلي، المريخ وصن داونز).
* معروف صاح؟
* ولا ما معروف؟
* لا عندو خبرة في المجموعات ولا عندو إستاد.
* ومتأهل (صحبة راكب) ساكت.
* وأوع تجي تقول لي وطنية وما وطنية.
* أي زول يأكل نارو.
* الأهلي كبير لكن الهلال برضو كبير.
* صن داونز خطير لكن برضو الهلال خطير.
* نحن تلاتة.. (الهلال والأهلي وصن داونز) يجب أن يتأهل الهلال ومعه واحد من الاتنين يا الاهلي يا صن داونز .
* المريخ كفاية عليهو المشاركة في هذه المرحلة.
* دي مرحلة متقدمة لا تحدث كثيراً في تاريخ المريخ.
* على الأقل تشبعوا في النجيلة السمحة.
* ومن هسه عشان بعدين ما تعملوا فيها ما عارفين.
* إيجار إستاد الهلال المباراة الواحدة (٢٠) ألف دولار.
* عندكم ثلاث مباريات في استادنا جهزوا ليكم ٦٠ ألف دولار من هسه.
* كلموا حازم عشان يرتب حالو.
* الكاف سيجيز ملعب إستاد الهلال إن شاء الله.
* بعد هذه الإصلاحات الكبيرة لو الكاف رفض يكون عندو فهم تاني.
* لكن لا أتوقع أن يرفض بعد أن اكتملت نواقص الإستاد.
* المريخ داير يلعب مبارياته في استادنا ما في مشكلة.
* (٦٠) ألف دولار قابلة للزيادة.
* سنتين نحن شغالين في الاستاد ، نجيلة وكراسي وغرف وبنك بدلاء وقصص طويلة.
* عشان كده تاني لعب بالمجان ما في.
* لو ما عجبكم طوالي شوفوا واحدة من دول الجوار.
* كده كده ح تكونوا حصالة المجموعة إن شاء الله.
* وما في حاجة اسمها نساعد بعض.
* ولا في حاجة اسمها أنا وود عمي على الغريب.
* غريب الشيطان.
* لا نغشكم ولا تغشونا.
* ما في زول بساعد ليهو زول.
* نحن الأهلي بنعرف ليهو.
* وصن داونز ما غريب علينا.
* صن داونز السنة الفاتت (باع) مباراته أمام الكنغولي عشان يبعد الهلال.
* لن ننسى ولن نغفر.
* المهم.
* الهلال ما أقل من الأهلي.
* ولا أقل من صن داونز.
* ما في سبب يخلينا نخاف أو نرتبك.
* مجموعة عادية ولا تدعو للقلق.
* نستعد بقوة.
* ونشتغل على الجوانب النفسية سيما وأن كشف الهلال به كثير من العناصر الجديدة.
* لو عندهم مروان نحن عندنا الغربال.
* عندهم السولية نحن عندنا حسن متوكل.
* ما فيش حد أحسن من حد.
* والحشاش يملأ شبكتو.
* والمريخ يجهز دولاراتو.
* و.. و..
* والله في.