لو ما بقيت (حبيب) إتمنى إنك تبقى (دبدوب) !!
بالعربي الكسيح
محمد الطيب الأمين
لو ما بقيت (حبيب) إتمنى إنك تبقى (دبدوب) !!
* في المدرسة مرات (أول الفصل) بيكون صديق شخصي بالنسبة لـ(طيش الفصل) ..
* (الطيش والأول) أصدقاء ..
* ولذلك (الطيش) يتمنى على الدوام أن يكون مثل صديقه في (الترتيب) ..
* و(الأول) لا يأتي بالتمني ..
* كثير من الأشياء نتمناها ولا نبذل فيها جهداً أكثر من (التمني) ..
* ممكن تشوف ليك ساعة في يد زول تتمناها في يدك ..
* ممكن تشوف قميص لابسو زول تتمنى القميص يكون حقك ..
* ممكن تشوف (دبدوب) شايلاهو (بت هدية لحبيبها) تتمنى لو إنك بقيت (حبيب البت دي) ..
* زمان إحنا كل ما نشوف لينا بت شايلة (دبدوب) يوم عيد الحب الواحد فينا بتمنى لو يبقى (دبدوب) ..
* بعد ما فشلنا في الحب إتمنينا نبقى (دباديب) ..
* الآن جماهير المريخ (تتمنى) لو أن النتيجة التى إنتهت عليها مباراة الهلال تتمنى لو إنها إنتهت عليها مباراتهم ..
* حاسدننا حتى في الـ(1-0) ..
* وغايتو جنس غايتو ..
* عندما بدر سوء سلوك من اللاعب أوتارا أثناء مباراة الهلال والفهود الكينية الودية عاقبه الهلال بالخصم أو كما قال مجلس الهلال ..
* وعندما بدر سوء سلوك من اللاعب البرازيلي جوفياني في ذات المباراة عاقبه الهلال وأبعده من رحلة ليبيريا أو كما قال مجلس الهلال ..
* السؤال الذي يفرض نفسه : لماذا عقوبة أوتارا مالية وعقوبة جوفياني ما مالية ؟؟
* القصة دي فيها غموض ..
* طالما إنك بتعاقب مالياً كان يفترض أن تكون العقوبة واحدة بالنسبة لأوتارا وبالنسبة لجوفياني ..
* العقوبات لا تتجزأ ..
* العدل في العقوبة مطلوب ..
* عموماً نحن لم نقتنع بأن إبعاد جوفياني كان عقوبة ولذلك كنا نتعشم أن يكون رئيس البعثة والجهاز الفني أكثر شفافية فيما يتعلق بإبعاد البرازيلي ..
* الناس أخدت إنطباع غير جيد بعد قرار إبعاد البرازيلي ..
* ما في زول بجيب ليهو لاعب بالدولار وبيجي يبعدو من المباريات ..
* الشفافية والوضوح مهمة يا جماعة ..
* هل اللاعب تعرض لإصابة في كينيا ولذلك تم إبعاده أم أن اللاعب لن يفيد الهلال أفريقيا ؟؟
* شخصياً أتمنى أن تكون إصابة وليس فشل ..
* إتفقت الصحف الرياضية الصادرة أمس على عنوان عريض يقول : (المريخ يتحدى.. بكري لن ينفذ عقوبة الإيقاف) ..
* هو كدي إنتو اعملوا ليكم رئيس بعد داك تعالوا إتحدوا ..
* التحدي ملحوق .. شوفوا ليكم رئيس بالأول ..
* ينسى المريخ إن عهد معتصم جعفر وأسامة قد إنتهى ..
* التحدي والتهديد لن يجدي مع شداد وبكري يستحق العقاب ..
* و(6) شهور ذاتا بسيطة ..
* كان بيستاهل سنة كده مناسبة ..
* إيقاف بكري إنذار لكل لاعب مريخي (ينوي) التهرب من ضريبة الوطن ..
* تاني المنتخب لو عندو مباراة أتوقع إنو لعيبة المريخ يجوا براهم ..
* لو ما إختارهم ح يجوا ..
* ودي إسمها سياسة العصا ..
* في الهلال ليس هنالك (قلق) فيما يتعلق بالنتيجة التي إنتهت عليها مباراة ليبيريا ..
* صحيح إننا كنا نتمنى أن تأتي الرياح بما تشتهي السفن ولكن ..
* الإحساس العام أن الهلال قادر على تسجيل أكثر من هدف في شباك الليبيري بأم درمان..
* وقطعاً هذا الإحساس العام يحتاج لإجتهاد وعمل..
* الأحاسيس وحدها لا تلعب ..
* نراهن على الجماهير وعلى حضورها وتشجيعها ..
* جماهير الهلال ستسجل الهدف الأول حتى (تعادل) نتيجة مباراة الذهاب ومن بعد ذلك الباقي على نجوم الهلال ..
* لاعبو الفريق الليبيري لو شافوا الجوهرة ساكت بتخلعوا ..
* الجوهرة بتخلع ..
* وأي فريق بدخل (مخلوع) لن يخرج سالم ..
* بمناسبة سالم .. جمال سالم ح يلعب مباراة الأيام ولا ح يقيف منجد النيل برضو ؟؟
* جمال سالم ربط مشاركته بإستلام مستحقاته ..
* والأيام دي القروش في المريخ زي (لبن الطير) ..
* شكلهم كده ما لقوا ليهم كأس يبيعو ..
* من الأفضل للمريخ أن يحل مشكلة جمال سالم ويكتفى بثلاثية الذهاب بدلاً من أن ينال ثلاثية في الأيام ..
* مازدا ده لما يلقى منجد النيل في المرمى ما بفارق ماركتو ..
* على العموم .. اليوم عيد الحب ..
* وعيد الحب اليوم يتزامن مع ذكرى الأسبوع الرابع من الشهر السادس والمريخ بدون رئيس ..
* عليكم الله شوف الأيام دي بتجري كيف ؟؟
* الليلة المريخ أكمل الأسبوع الرابع بعد الشهر السادس بدون رئيس ..
* ستة شهور وأربعة أسابيع و(المدفور) بدون رئيس في سابقة لم تحدث في العالم ..
* وبما أننا سبق وأن رشحنا بعض الأسماء وطلبنا من أهل المريخ مفاوضتها لرئاسة النادي اليوم أيضاً سنقدم أسماء جديدة ونأمل أن يدخل معها المريخ في مفاوضات مباشرة ..
* طيب الشخصيات هي: (تراجي مصطفى ، صلاح ادريس ، عابدة الشيخ ، عمر عطور وتهاني الباشا) ..
* وشخصياً شايف عمر عطور أفضل ليكم ..
* أنا شايف كده ..
* وأي زول طبعاً حر في (شوفو) ..
* وغايتو الله يكفينا شر (المُصدي) اللمعتو الأيام ..
* في عيد الحب اليوم اللون السائد هو (الأحمر) ..
* والأحمر لون الحب وشعار المريخ ..
* وبما أن ذلك كذلك نتمنى أن يكون شعار الحب (3) ..
* في عيد الحب مسكين (الدبدوب) ..
* ومسكين الحب ..
* بنات حلتنا من شدة ما إتجهزن لعيد الحب قربن (يخبزن) ..
* ولو ما أخاف الكضب شفت لي (صينية ماشة على الفرن) ..
* حاجة تكسف ..
* ونركب صافنات ونجيبة (كاهلية) وأصلو الزول بيموت والذكرى تفضل حية ..
* و..و..
* وباسم الحب بقدم ليك حياتي ومعاها ..(كيس نايلون محتفظ بيهو من الشهر الفات)
