لو ما قالوا ليهم نحن من طرف الأهلي كان غلبوهم !!

قزاز ورذاذ
محمد الطيب الأمين
لو ما قالوا ليهم نحن من طرف الأهلي كان غلبوهم !!

* وأنا بتابع في مباراة المريخ جا على بالي كلام كتير.
* كلام وخيالات.
* أول حاجة ركزت في (تشيرت) المريخ قلت أشوف (الرعاية مكتوبة وين).
* اتوقعت يكون مكتوب في تشيرت رمضان عجب : (هذا الفريق برعاية الأهلي المصري).
* اتوقعت كده.
* وأي زول طبعاً حر في (توقعاتو).
* قلت يمكن إسم الأهلي يكون مكتوب ومطبوع على تشيرت المريخ.
* جا على بالي إنو المريخ (نسى) إنو المباراة حقتو.
* في الشوط الأول كانوا فاكرين المباراة في ملعب صن داونز.
* نسوا إنو المباراة حقتهم ، وفي ملعب (الكفيل).
* المباراة في ملعب (الراعي الرسمي).
* يعني حقتكم.
* صن داونز لعب وكأنه يلعب في جنوب أفريقيا.
* الشوط الأول المريخ ما كان في .
* كان في صن داونز فقط.
* في الشوط الثاني هبطت لياقة نجوم صن داونز فتحرك المريخ حركة (ما بتاكل عيش).
* حركة عادية بيعملها أي فريق.
* دي ما كورة فريق معسكر ليهو (٧٠).
* (٧٠) يوم دي المفروض على الأقل تغلبوا صن داونز سبعة.
* خصوصاً وانو المباراة كان فيها مطر وشوية برد.
* وانتو ذكرياتكم مع البرد والمطر غير مشرفة.
* معسكر (٧٠) يوم.
* معقولة؟
* معسكر (التدريب العسكري) ما بيحصل (٧٠) يوماً.
* وبعد ال(٧٠) يوم دي ياريت لو ظهرت جملة تكتيكية ولا لمحة فنية.
* المريخ قبل المعسكر وبعد المعسكر ياهو المريخ.
* بيبو ياهو بيبو.
* رمضان عجب ياهو رمضان عجب.
* ما اتغير شي.
* اللهم إلا يكون حصل ليهم تغيير في اللغة وطريقة الكلام.
* لكن في الكورة ما في جديد.
* كلو قديم.
* إحتمال يكونوا بقوا يتكلموا (مصري).
* (70) يوم كفيلة (تعوج لسانك).
* والله صحي.
* أنا قلت بعد السبعين يوم دي ح نشوف فريق بيلعب كرة قدم حقيقية.
* معسكر راح شمار في مرقة.
* خسارة قروش وغربة.
* المهم.
* صن داونز أهدر مهرجاناً من الأهداف.
* كان يمكنه أن يحسم المباراة من الشوط الأول.
* بل كان يمكن أن يتحدد هداف البطولة من مباراة الأمس.
* لكن السؤال البيطرح نفسو .. هل الأهلي المصري رضيان من نتيجة المريخ دي ولا زعلان.
* أهم حاجة يا مريخاب الأهلي يكون رضيان.
* الأهلي لو زعل .. عادي ممكن يطلع ليكم العفش حقكم من الفندق ويجدعوا في الشارع.
* وغايتو جنس غايتو.
* ما علينا.
* نركز في ورقنا.
* بإذن الله الهلال ح يجيب ست نقاط من القاهرة أو أربع نقاط على الأقل.
* ست نقاط من (الكفيل وولدو).
* الكفيل والمكفول.
* الراعي والرعية.
* الهلال قادر إن شاء الله.
* بالنا رايق وفريقنا مطمن.
* بنلعب في ملعبنا في أمان الله.
* لا بنتسول زول ولا في زول بقوم بكفالتنا.
* نحمد الله على نعمة الإسلام والهلال والموية الباردة.
* الحمدلله.
* وغايتو السنة دي بالذات يا متنا من الضحك ويا كمان الضحك كتلنا.
* و..و..
* والله في.