ليه ما قلتوا لينا أبو عشرين ما بيأكل بالليل ؟؟
بالعربي الكسيح
محمد الطيب الأمين
ليه ما قلتوا لينا أبو عشرين ما بيأكل بالليل ؟؟
* أمبارح ومن باب (الترفيه) وتغيير (الجو) عزمنا الأخ غير الشقيق أبو عشرين الشهير بي (لون الدم) .
* عزمناهو عشاء .
* قلنا نغير ليهو شوية .
* جبنا (سلطة أسود) و(سلطة خضرا) و(بيض) و(فراخ مشوي) و(شية) .
* رغم الظروف الفينا دي جبنا ليهو (شية) .
* الضيف غالي عشان كده جبنا ليهو الشية الغالية .
* يستاهل (أبو دم أحمر) .
* ختينا الصينية في الصُفرة.
* لكن للأسف أبو عشرين أعتذر بأدب ورفض يأكل.
* مالك يا كابتن ؟
* قال لينا : معليش يا جماعة والله أنا ما بأكل بالليل.
* يا راجل ده كلام شنو ؟
* و(الشية) دي نوديها وين ؟
* والفراخ ؟
* قال والله معليش نهائي ما بأكل بالليل .
* بتنوم جيعان؟
* قال : لا بشرب كباية لبن كبيرة ومعاها قطعتين باسطة .
* طيب بتحب ياتو لبن يا (لون الدم) .
* لو داير لبن آبل أو لبن عصفور ؟
* صدق أبو عشرين طلع متواضع وشرب لبن بقر عادي ؟
* نحن ذاتنا استغربنا زول يخلي لبن العصفور ويشرب لبن بقر ؟
* حاجة غريبة .
* بصراحة أنا زعلان جداً لأنو ناس المريخ ما كلمونا إنو أبو عشرين ما بيأكل بالليل .
* بصراحة زعلان .
* لو كان وريتونا ما كان فيها حاجة والله .
* لو كلمتونا ما كان خسرنا وجبنا (شية) .
* كان تدونا (الكتلوج) بتاع أبو عشرين بدل الإحراج ده .
* لكن ما مشكلة.
* أهو عرفنا الراجل ده ما بيأكل بالليل .
* بنكتر ليهو من اللبن والكاكاو.
* (لون الدم ده) ما بنقصر معاهو .
* والله يا جماعة أنا كل ما أتذكر (تغريدة) أبو عشرين بضحك بالصوت العالي .
* والله صحي.
* ولمن فاتهم موضوع التغريدة سنحكيها لهم .
* طيب .
* أبو عشرين الذي هو أفضل حارس مرمى في السودان مشى وقع عقد مع الهلال .
* واستلم القروش كاش .
* إشترى عربية على الزيرو ورجع البيت .
* رجع البيت اخد ليهو (دش) وشغل المُكيف.
* ااااي شغل المُكيف رغم إنو طالع من الدش .
* هو حر .
* يعمل العايزو.
* يشغل مُكيف يشغل عشة الجبل .. هو حر .
* المهم .. شغل المُكيف ورقد في السرير ودخل الفيسبوك.
* دخل الفيسبوك بالتلفون حق المريخ .
* لأنو التلفون الإشتراهو بقروش الهلال كان قاعد في الشاحن .
* وطبعا أنتو عارفين التلفون الجديد لازم يشحن أربع ساعات وهو مقفول .
* دخل الفيسبوك وكتب : (لون الدم أحمر) .
* والكلام ده كان قبل مباراة القمة بعشرة أيام.
* كتب (لون الدم أحمر).
* وتعال شوف التعليقات.
* الجماعة فرحوا فرحة هستيرية بالتغريدة دي .
* قالوا الزول ده معناها بحب المريخ شديد .
* هاك الحب ده .
* الضحكني أكتر التش .
* التش خشا وعلق على تغريدة أبو عشرين قائلاً : (وهو في لون غيرو) .
* الجماعة من أكبر زول في المجلس لأصغر مشجع بقوا يتكلموا عن التغريدة دي .
* والفرحة كاتلاهم.
* تلقى الواحد يضحك زي (الصارف صندوق) .
* مالك يا زول بتضحك؟
* يقول ليك : أبو عشرين غرد .
* غرد قال شنو ؟
* قال : لون الدم أحمر .
* وحصل قابلك دم لونو (رصاصي) ؟
* أبو عشرين جانا وخلى ليكم تغريدة .
* المهم .
* أنت كهلالابي (سيد بلد) أنا عايزك تعرف حاجة .
* و(آب بنطلون ناصل) برضو يعرف حاجة.
* لازم تعرف إنو رمضان عجب وأبو عشرين ومحمد الرشيد ، ديل لعيبة المريخ في الأساس.
* يعني الجوطة الحاصلة الآن دي سببها الهلال داير يشلع المريخ .
* الجوطة دي ما حاصلة في أبو عاقلة ونزار حامد وعبد الرؤوف.
* فهمت ؟
* يعني الهلال هو الكسبان.
* المريخ فرحان عشان وقع عقودات (باطلة) مع لاعبين في الأساس هم لاعبينهم.
* لازم تعرف الحاجة دي .
* شلنا التلاتة ديل خلينا ليك المريخ يطاقش.
* شي حازم وشي سوداكال وشي سوداتيل وشي قدالة وشي رابطة قطر وشي رابطة بوركينافاسو وحتى الكوز جمال الوالي الشهير ب(عزو) ظهر .
* شفت الهلال ده قاسي كيف ؟
* ولسه ح نوريكم قسوة والله في الأفلام ما شفتوها.
* بعد أيام ح نفتح ملف حوافز تسجيلات لعيبة المريخ .
* نشوف ضياء الدين جدد بي كم والسماني ونشوف صلاح نمر مرتبو كم والتش مرتبو كم .
* نشوف ليه المريخ فيهو (فقوس وخيار) .
* طبعا أمبارح الحمد لله حددنا سعر التش ووصلنا له المعلومة.
* سعر التش (٦٠) مليار.
* داير تجدد ليهو اليوم خت ليك ٦٠ مليار ومبروك عليك .
* اليوم ح نتواصل مع أسرة التش حتى نبلغهم بسعر ابنهم في السوق .
* دي حاجة .
* الحاجة التانية .. المريخاب الذين تم تجنيدهم للبحث عن أبو عشرين ح اوريكم الزول ده محلو وين .
* لما أنا بديت كتابة العمود ده أبو عشرين كان في الكاملين .
* ولما خلصت العمود قالوا وصل رفاعة .
* حاليا وانت بتقرأ في هذا العمود أبو عشرين دخل القضارف .
* و..و..
* ونواصل .
بالغت ياود الطيب. لو واصلت بالطريقة دي يوم بتكتل ليك تمهيدابي. 😂😂😂
والله الثلاثي ده تسجل او لم يتسجل في الهلال كفاية الجهجهة الحصلت للاصيفر كما يحلو لك تسميتهم وكبير الكهنة اليخماو ورهطه اليومين دي حالتهم شلش. نومهم خزاز وجقلبة ولفة راس وجهجهة كبير الكهنة ابو الاحقاد براها كفاية. ولو تم اعادة قيدهم بالاصيفر لك ان تتخيل حالة الافلاس التي ستضرب الاصيفر في الموسم القادم وكمان زدت الطين بلة بالتسعيرة الجديدة للتش. الناس ديل ايام البلف مفتوح من المؤتمر البطني كانوا يتخطفون لاعبي الهلال يمين وشمال ومافي زول هبب ليهم حتي بنوا فريقهم من لاعبي الهلال وهسه تلاتة لاعبين بس وقبل ان يتم التسجيل مسكتهم ام هلا هلا.
1/ حقيقة شر البلية ما يضحك عمود أبسط ما يوصف به أنه أنه انفعالي صاوي ولا يسوى الحبر الذي كتب ويكتب به ألفاظ تدل على ضحالة مستوى ثقافة الكاتب وتربيته والبيئة المحيطة وللمرة الثانية هنا في متعلمين ومثقفين وحرام يقرؤون للفاقد التربوي.
2/ سيبك من الحقد على المريخ الانت فيهو ده وأقلب مريخابي أصلا الهلال ذاتو مريخابي بالميلاد ما دام عاجبك المريخ ولعيبة المريخ للدرجة دي وقبل ما تكلمنا عن الحوافز والتجديد للاعبي المريخ كلمنا عن لاعبي الهلال وحوفزهم اذا أصلا الهلال فيهو لاعبين هو لاعب واحد أبوعاقلة .. وباعترافك أنو التش يساوي 60 مليار يساوي 20 أبوعاقلة زيعني يساوي فريقك والجوهرة والنادي وقناة الكاردينال وكل اللاعبين الفي الكشف والفكه حقين التسجيلاتومليون ذيك ويعدين انت منو عشان تقيم وبالمناسبة انتو مرتاحين ما عندكم لاعب يساوي 2 مليار والله الرابطة كوستي ما شعاله بيهم الا تخطفوهم براكم بح وبالنسية للخيار والفقوس برشلونة فيهو خيار وفقوس مش المريخ لو متابع وبتعرف كورة وانت الان كتبت التش ب 60 مليار طيب مؤمن عصام بي كم يااا.
3/ تعرف الانت بتعملو ده والسكلي والجقليب ما بصلح هلالك ولدنا الشرعي لو ركزت مع هلالك أحسن وسيبك من الفي يد عيرك عشان حالك ينعدل
وأخيرا الله يجازيك يا السماااااني السويته ما رقدت وبالأسلوب اللي تستاهاو وووووواي وووووواي ووووووويوثاني واااااااي أرخي جسمك السماني جاااااك كفاك ولا أذيدك
والله قون السماني دا جميل شديد بس الهلال اليوم داك مش الهلال والكاتب القول التش دا اساوي ٦٠مليار مابعرف كورة التش دا ماكان موجود في الأفريقية ماعمل شي كلكم بتكتبوا حسب الانتماء خليكم رياضيين يوم يكون فريقك تعبان ارفعوا المناديل البيضاء استهجان واتحدكم لو التش يعمل في الأفريقية شي الكرة بقت جماعية مافي مساحة عشان تظهر مهاراتك دي الكرة الحديثة ياخي بش جاري للكرة من نص الملعب جابا قون في المريخ دا لو اي فريق بلعب كرة ماحااجيبا كلنا دايرين نشجع كرة لاكن كل فرقنا في سنة اولى كرة اي واحد يعاين لفريق ا واحاول نوصل رسالة لكل الأندية السودانية نحن من أسس الاتحاد الأفريقي