مباراة الوفاق عايزة ثبات ما عايزة تصريحات
تغريدة واتساب
بقلم : معاذ ابومؤيد
مباراة الوفاق عايزة ثبات
ما عايزة تصريحات
كتر خير الواتس آب والرموز التعبيرية فيهو ادتنا السيفين والسيفين ديل عشان نقص الكلمة الشاذة ونقص ناس المصالح في مجتمعنا المريخي..
كلماتنا ستوجه بحدة السيوف عشان ماعندنا مصلحة مع احد وهمنا الكيان ….
تبقت ايام تفصلنا عن معركة العبور لدوري المجموعات سامعنا يالناس الجالسة في المناصب فوق اربعة ايام لا ذيادة ولا ناقصان !!
اربعة ايام عشان تحقق طموحات المدرج دا …
الجمهور دا ماحيقبل اي تدخلات فنية ما واقعية والجمهور دا دفع دم قلبو عشان المركب تسيير
الجمهور رفع التمام بالمال
وحاليا حنرفع التمام بالحضور وكل اشكال التشجيع !!
بمناسبة اشكال التشجيع دي الألتراس وناس التيفو والجمهور بسأل عن خطاب الاتحاد الأفريقي للألعاب النارية والشماريخ..
عشان كدة السؤال موجه للاتحاد العام والاعلام ولجنه التسيير عشان الناس تدخل الاستاد علي يقين تام بالعقوبات والاجراءت وعشان تقفلوا باب التساؤلات طلعوا خطاب الاتحاد الافريقي في كل الصحف الحمراء عشان الناس دي سؤالهم واضح انشروا لينا خطاب الكاف عشان الناس تعرف البيها والعليها والناس البتشتل توقف زراعة شتلاتها!!!
**************************
قروبات الواتس آب وقروب مشرفي القروبات ماشاء الله تبارك الله علي الحضور والشغل الواعي …
الترتيبات للمباراة تجرى علي قدم وساق …
وتاني القروبات مدخلا يدها في جيوبها عشان تفعل مشروع الزي الموحد وتوفر علم لكل مشجع …
شفتو الشغل كيف وشفتو الشفوت واصلين وين !!
شكرا لكم قروب مشرفي القروبات ما عايز أذكر اسماء لأنها ناس تعمل في صمت بعيد عن الاضواء وانتو شفتوهم يوم النفرة…
**************************
وتاني حنرجع لموضوع المكتب الاعلامي والخطاب الاعلامي عشان نقطع دابر الشتل ونركز في مشوارنا الافريقي …
والشتل أحرج الصحف مع تصريح دحية للإذاعة !!
عشان كدة يالجنة التسيير المكتب الإعلامي ثاني اهم مكتب بعد المال لأنه واجهتكم ومنصتكم مع الجمهور والصحف ..
والقروبات دي تتقبل اي خبر في ثواني !!
يعني كلمة عاجل موترة الاجواء سمعتوني ولا كيف!!
الناس قاعدة علي الهبشة
وفي ناس متخصصة شتل
وفي اخبار ممكن تكون حقيقة !!
*************************
نشكر اي زول بعقب علي تغريدتنا عشان كده جاتنا احتياجات الاستاد للقروبات الراغبة في نيل الشرف للدعم
*ساعة تغيير الكترونية
*رايات ركنيات
*زي للعاملين
شباب عربة الاسعاف ٢
التأمين ٥
المشرفين ٣
عمال ٦
*عايزين ٦ ترابيز للمركز الاعلامي
*تلبيسة تحمل شعار المريخ
لمقاعد البدلاء والحكام
* عدد ستة كشافات بقوة ٤٠٠ واط
* شباك للمرمى
*معدات نظافة
يلا ياشفوت اي قروب يشوف نفسو قادر يوفر اي شي من المذكور يتقدم بيه لناس الاستاد والتنسيق معهم…
اتمني مشاركة القروبات في الاشياء المطلوبة للاستاد…..
الحمل كتر عليكم لكن عارفنكم صناديد
**************************
ختاما
القلعه الحمراء تشيل من الحبايب الف
والنفوس لازم تطايب عشان نرفع الدخل
**************************
ونحن علي المدرج نشجع ونعمل بروفات تشجيع وبروفات تيفو
عشان كدة اي زول في الخرطوم الأيام الجاية دي يكون حضور في النادي….
خليكم قريبين المريخ محتاج لينا
حضورك النادي معناها مشاركتك في البروفات مع الألتراس ومع التيفو….
تعال من عصرا بدري عشان تدخل حساسيه المباريات …
**************************
همسة اخيرة
نتمنى تقليل الخطاب الاعلامي في الفترة الجاية
اخبار معسكر مصر حبيبنا المدير الشامل تصريحاتوا وصوروا اكتر من فريق كرة القدم!!!
معقولة ياصديقنا كل مايصبح صباح نلاقي تصريحاتك متوفرة علي كل الصحف عاد دا كلام !!!
ونبارك نتيجة المباراة الودية للزعيم
ونتمنى نفس النتيجة في الجزائر..
ربنا يبعدنا من العوارض ومن الاصابات …
************^*************
خارج النص
امس حزرنا من كلام المدير الشامل وقلنا جمال سالم مابقراهو لكن شكلو في ناس متخصصة ترجمة فورية علي الشريط !!!
عشان كدى قلنا
خففوا من التصريحات وركزوا علي المباريات
الوضع لايحتمل القسمة علي اتنين…
نكون او لانكون
مش
نقول او مانقول
الرسالة واضحة يالجنة التسيير…