مدرب جديد وأحلام قديمة

هلال وظلال
عبد المنعم هلال
مدرب جديد وأحلام قديمة

هل يكسر ريجيكامب العقدة الإفريقية..؟
• الهلال ودّع فلوران وقال له شكراً على ربع النهائي، لكن الكأس ما جبتو..! وجاب لنا الروماني ريجيكامب، يعني الهلال اتجه إلى المدرسة الأوروبية على أمل تحقيق ما فشل فيه فلوران، خبير الكرة الأفريقية.
• فلوران، مدرب العشرة الطويلة، الهلال معه كان بيلعب كويس، لكن لما تجي اللحظة الحاسمة.. الفريق بيقف يتفرج.
• فلوران ما كان أي مدرب، زول عرف أجواء السودان وظروف البلد وتعايش مع توقف الدوري والحرب والضغط، وبرغم ذلك قدر يوصل الهلال لربع نهائي دوري أبطال أفريقيا، وقدر ينافس فرقاً ثقيلة في مجموعة الموت، وقدر يرشح للهلال محترفين أصحاب مستوى رهيب. وميزته الكبيرة أنه عارف لاعبيه كويس وبعرف شغل الفرق الأفريقية، لكن عيبه إنه ما قدر يحقق الحلم الكبير (كأس الأندية الأبطال).
• المدرب الروماني ريجيكامب.. الزول الجاي من الصف الأول وCV تقيل.. درب الترجي، والأهلي السعودي، والهلال السعودي، لكن الكرة السودانية غير.. بتبلع المدربين زي الجب إذا ما تأقلم بسرعة.
• عقد ريجيكامب مع الهلال سنة واحدة، زي خطوبة التجربة، وزي ما تقول الإدارة بتقول له (تعال جرب، لو عجبنا شغلك بنواصل، لو لا.. الباب يفوت جمل). يعني يا ريجيكامب يا تصيب من أول موسم يا تشتّت قبل ما الناس تحفظ اسمك.
• من سنة 2007 والهلال بيلعب دور العريس البستعد للفرح، وكل مرة العرس يتأجل، والأميرة السمراء في انتظار العريس الذي يربط الهلال في جبهته. والسؤال: هل ريجيكامب سيكون الفارس الذي يركب الحصان الأبيض ويخطف الأميرة السمراء، ولا العرس راح يتأجل زي كل مرة، ويفضل أهل العريس منتظرين لحدي ما العروس تنصاع و(تحن)..؟
• الهلال جاب مدرب أوروبي خبرة، لكن دا ما ضمان للبطولة، والشغل في الملعب بيختلف. والسنة دي يا ريجيكامب يا تكتب اسمك بالذهب، يا تنضم لقائمة (مدربي الهلال السابقين) اللي عددهم زي عدد شعر راسي.
• الروماني ريجيكامب جاي بخبرة جديدة وطموح عالي، والهلال بين نار التغيير وحلاوة الأمل. والسؤال: هل السنة الجاية دي حتكون سنة الهلال في أفريقيا، ولا نعيد نفس الحكاية ونشرب من نفس كأس الإحباط..؟