مشروع (حرامية قادمة) !!
قزاز ورذاذ
محمد الطيب الأمين
مشروع (حرامية قادمة) !!
* قُلت للأخت الإعلامية الجميلة عفاف حسن أمين : لو في البيت (الكديسة خطفت اللحمة وقامت جارية بِتُسكيها ولا بتخليها) ؟
* قالت : بسكها بس ما عشان أشيل اللحمة عشان الكديسة تعرف إنو العملتو ده غلط.
* عفاف دايرة تعلم الكديسة (الصاح من الغلط) وهي تعلم جداً أن (الجوع كافر) .
* نحن يا عفاف (الكدايس) بقت تجي بيوتنا عشان (تبيت) والصباح بتطلع تمشي بيوت تانية .
* أنا وكثير من أبناء هذا الشعب الكريم بنعتذر لكدايس ظنت فينا (اللحمة) وما لقت عندنا غير (العدس) .
* حتى وقت قريب كان سائق العربة يفضل الظلط على الردمية .
* الآن (الحُفر) الموجودة في الظلط أكتر من (الُحفر) الموجودة في الردمية .
* ما عارف البيحصل ده تواضع من الظلط ولا (قلة أدب) من الردمية ؟
* محبتنا لله والرسول لم يكن لعمر البشير (يد فيها) .
* ولذلك سقوط البشير لا يعني سقوط رأية (لا الله إلا الله محمد رسول الله) .
* الدين خط أحمر ومن يظن أن هذا الشعب قد أسقط البشير من أجل عيون العلمانية والتفسخ الأخلاقي يكون (موهوم) .
* أعمل أي حاجة في البلد لكن ما تهبش (الله والرسول) .
* الأشانتي الغاني سرق فرحة أهل الهلال.
* كل الهلالاب زعلانين لأن المباراة لم تقام.
* حاول الغانى توريط الهلال ولكن الكاف تعامل مع واقعة الهلال بتجرد كبير والحمدلله .
* أسوأ إحساس ممكن تعيشو هو : (حبيبتك زمان تقابل حبيبها الآن في نفس المكان الكنتو بتتقابلو فيهو أنت وهي) .
* إتبدلوا الأحباب و(المقعد) واحد .
* زمان الكهرباء كانت (بتكتل) لو هبشتها ، وحالياً الكهرباء بقت (بتكتل) لو اشتريتها.
* زاد سعر الكهرباء بشكل مبالغ فيه .
* مع إرتفاع سعر الكهرباء تاني الضيف البيجيك شغل ليهو (اللمبة) .
* قول ليهو تشرب شاي ولا قهوة ولا أفتح ليك النور .
* تشغيل (المروحة) لحظة وصول الضيف سيكون من خيارات (الضيافة) .
* أكبر (سر غامض) في حلتنا كان هو سر ذلك (الكلب) الذي لا ينبح إلا في تلك (الفتاة) .
* أي زول يجي بالشارع الكلب ما بيشتغل بيهو .
* أول ما تجي البت دي الكلب إبن الكلب ينبح فيها.
* ينبح بإخلاص عجيب رغم أن الفتاة كانت من جميلات حلتنا .
كنا (بندق الكلب عشان نكبر في نظر البت دي) .
* مات ذلك الكلب قبل سنوات بينما بالأمس أخبرني أحد الأصدقاء بأن تلك الفتاة خرجت من الحراسة بالضمان بعد إتهامها بسرقة (لاب توب) من احدي الشركات الخاصة .
* لقد كان الكلب أذكى منا وهو يرى فيها مشروع (حرامية قادمة) بينما كنا نحن مشغولين بجمالها ودلالها .
* الذين وقفوا مع السعودية ضد قطر والذين وقفوا مع قطر ضد السعودية ، هم الآن في موقف (بايخ جداً) .
* المصالحة التي تمت بين (الشقيقتين) المتضرر منها (تجار الحرب وسماسرة الفتنة) .
* و.. و..
* وجيت تترجى بالدمعات اسامحك أنسى أغفر ليك وجفف دمعك الغالي و………..(حول لي رصيد بخمسمية) .
