مشكلة تواجه نجم المريخ بسبب رخصة!!
قزاز ورذاذ
محمد الطيب الأمين
مشكلة تواجه نجم المريخ بسبب رخصة!!
* قبل مباراة القمة .. يعيش مدرب الهلال ريكاردو حالة من الارتياح بعد أن أنجز معسكر القاهرة.
* وذات الحالة يعيشها مدرب المريخ الذي أنجز هو الآخر معسكر القاهرة.
* مدرب الهلال (مالي يدو) ومدرب المريخ (مالي يدو).
* كلٍ مالي يدو من واقع الخطط والتكتيك والعمل الكبير الذي تم إنجازه في المعسكر.
* ولكن أنا والله لا أخاف عليهما إلا من الصدمة والسكري والضغط.
* اللاعب السوداني لا يمكن أن تملأ به يدك.
* خاصة بالنسبة لمدرب المريخ.
* ربما اللاعب الهلالي أفضل من اللاعب المريخي.
* صحيح كلهم سودانيين ولكن اللاعب بالهلال (مقيم) أفضل من اللاعب المريخي .
* في الشارع ده لاعب الهلال (معروف ومرغوب) اكتر من لاعب المريخ.
* والحاجة دي حتى لعيبة المريخ عرفنها.
* أكثر من لاعب مريخي قال لي ذلك .. والله على ما أقول شهيد.
* وأنا هنا لا أتحدث عن مستويات فنية ومهارات.
* لا.
* أتحدث عن النجومية والمكانة الإجتماعية.
* التصنيف الذي يجعل الهلال النادي الأول في البلد والأكثر شعبية.
* لو فاز المريخ بخمسين دوري على التوالي فإن قيمة الهلال المجتمعية أعلى.
* لو المريخ جاب كأس أفريقيا عشرين مرة برضو في نظر الشعب السوداني الهلال هو الأول.
* في لاعب لعب في الهلال والمريخ.
* اللاعب ده مرة قال لي حاجة غريبة جداً.
* قال لي أنا كنت في الهلال سنتين سايق عربية بدون (ورق) ما في زول سألني، قال لي لكن في المريخ لو نسيت رخصتك في البيت مشكلة.
* والله الكلام ده ما كضب يا جماعة.
* وح يجي يوم لو ربنا أدانا عمر أكشف الكلام ده وبالأسماء إن شاء الله.
* اللاعب ده قصد يوريني الفرق بين الهلال والمريخ.
* والفرق اصلا ظاهر حتى في (النطق).
* الناس بتقول (الهلال والمريخ) ، نادر زول يقول (المريخ والهلال).
* حتى في النطق انت بتقدم الهلال.
* زي لما تقول (سمن على عسل).
* ما في زول بقول (عسل على سمن).
* اللاعب في المريخ يعلم أنه أقل من لاعب الهلال.
* ودي كل لعيبة القمة عارفنها.
* يعني انت لو داير تغالط غالط براحتك لكن دي حقيقة كل اللاعبين عارفنها.
* قصدت بالكلام ده إنو الثقة عند لاعب الهلال اكبر.
* وهذه الثقة كانت سبب خسارتنا للقمة أكثر من مرة.
* لاعب المريخ بيلعب بقوة أمام لاعب الهلال عشان يؤكد الأفضلية.
* ولاعب الهلال ما عندو دافع إنو يثبت افضليته على لاعب المريخ.
* والله صحي.
* المهم.
* مدرب الهلال ومدرب المريخ سيكتشفان أن إعدادهما ومحاضرتهما غير حاضرة في لقاء الغد.
* ح يشوفوا كورة ما شافوها قبل كده.
* الإعداد بختلف عن المباريات.
* التمارين لا علاقة لها بالمباريات الدورية.
* الطاقم الأجنبي ح يكتشف إنو مباراة القمة في السودان لا تحتاج لمدرب.
* ولذلك نأمل من إدارة الهلال أن تتحدث مع ريكاردو.
* نرجو من الأخ عبد المهيمن أن يحدث الخواجة بذلك.
* عشان ما يشيل شنطتو ويسافر.
* كلموهو إنو محاضراتك دي اللاعب بيخليها في غرفة الملابس وهو ماشي على المستطيل الأخضر.
* جوة الملعب بيعمل حاجة حقتو براهو.
* الحاجة دي في الغالب بتكون ما كويسة ونادر جدا تكون كويسة.
* نسأل الله أن تكون كويسة في لقاء الغد.
* وبإذن الله الهلال منصور.
* ونركب صافنات ونجيبة (أم درمانية) واصلو الزول بيموت والذكرى تفضل حية.
* و.. و..
* والله يدينا الفي بالنا.
والله يا محمد الطيب ضحكتنىحتى وقعت من الكرسى.انت بس من نفسك ولا بتقول كلام خارم بارك يارشاشات .ارجو بكرة الاعصار الجايكم .كلم تجار المحاصيل الجنب المغبرة يقفل بدرى.
انت …ولا شنو قال سايق عربية من غير ورق هو ده ذاته عدم إحترام للقانون وبعدين كونه بوقفوه علشان بلعب في المريخ ده طبعا حقد ولو عايز تعرف الفرق بين الهلال والمريخ زي ما بتقول لأنه المؤنث دائما بسبق المذكر يعني الواحد بقول انساتي سادتي أدخل يوتيوب وشوف كلام الغربال وهيثم مصطفى وهيثم طمبل عن المريخ يا
بالله اسي ده مقال يسألك الله؟!!!! كلام مشجعين …بتزكرني الزول الجاي كرت كرتونه من البلد
خلي الرجفه يا رشاشه إنت وأرج الراجيك المريخ ما سائل فيك
مقال بايخ وخالي من المضمون ينم علي عقلية صاحبه . يعني قصدك لاعب الهلال لو فوق القانون . كونه يلعب في الهلال مسموح له تجاوز القانون . ياخي العالم المتحضرة لو وزير ولا مسئول كبير خالف قوانين المرور تحرر له مخالفة فورا ولا حد كبير علي القانون الا في البلد السايبة دي
الله يرحم الصحافة الرياضية لولاء اختلاف الاراء لبارت السلع داير تقنع الناس بان من ينتمى للهلال هم الملائكة والباقى اناس عادين ياخى الشخص بيقيم بمؤهلاته والاندية بالانجازات والبطولات .. ظاهر من لفة العمة الراس
معليش ياود الطيب. صبيان اليخماو المتفلتين هجموا عليك بساقط القول كعادتهم ومن خلي عادته قلت سعادتو.