مصر مصر
في السلك
بابكر سلك
مصر مصر
*أها
*أمس اتكلمنا عن إنو ثقافة السودانيين من زمان بسوقوا عروساتهم مصر شهر العسل
*أها بعد يعسلوا برجعوا السودان
*ومن التقاليد التي لم تتغير
*العرسان بنزلوا في بيت ناس العروس
*وبيت ناس العروس طبعا بكون برقش
*مجير ومبيض وأبواب الشارع بوهيتها جدييدة
*بصينوهو للعرس
*المهم
*العرسان بنزلوا فيهو وبضبحوا ليهم
*عادات جميلة جدا وفيها احترام لأهل العروس
*واشتهرنا في السودان باحترامنا لنسابتنا
*بالذات أهل العروس
*وكان أهل العروس ما احترمونا بنشيل حسهم
*مرة قامت شمطة بعد شهر العسل بين أم العريس وأم العروس
*أم العريس قالت لأم العروس
*احترمناكم يا يمه
*شيلة الأكل دي جبناها ليكم بهاراتها مسحونة
*والفول بالشوال منضفاهو بي إييدي دي
*الفحم غسلناهو حتى جبناهو ليكم
*احترمناكم شديد
*الكبكبي حق الطعمية جبناهو ليكم مفروم وجاهز
*الزيت ده جبناهو ليكم مبرشم
*الجبنة جبناها ليكم كل الأنواع
*بيضاء ومضفرة وموزريلا وجبنة أريش
*احترمناكم شديد
*لكن ما نفع فيكم
*أم العروس قالت لأم العريس
*ونحن شيلة الأكل ما جبناها ليكم كلها في فطور العريس؟
*يسمنا الطعمية ما ضقناها
*نطت أم العريس قالت لأم العروس
*فطور شنو الجبتوهو؟
*الناس التمام بجيبوا فطور العريس بي شربوتو
*ياخ إنتوا اللحمة الناشفة نشفتوا ريقها حتى جبتوها لينا
*تقول مستعملة
*الفول ده بلدوزر ما يكسرو
*وناااااشف زيت ما فيهو قرب يصلب كرنك
*احترام شنو؟ إنتوا بتعرفوا الاحترام؟؟؟
*فطوركم احرجنا مع الضيوف
*دخلناهو المخزن
*وطلبنا فطور عريس دليفري جانا بالجامبو حتى انسترنا مع ضيوفنا
*بتعرفن الاحترام إنتن؟؟؟؟
*زمن
*حتى شكل النسابة كان ليهو طعم
*المهم
*المريخ بجي السودان متين ونازل وين؟؟؟؟
*اجبني يا محمد عبد الماجد
*وبمناسبة محمد عبد الماجد
*طبعا لما المريخ يغلب الهلال محمد عبد الماجد بحتجب
*بعد تلاتة يوم بكتب لينا عن عثمان حسين
*وكترت الشغلة
*وأغاني عثمان حسين كملت قبل موقعة مصر
*لذا أطلب من ود عبد الماجد
*المرة دي يكتب لينا عن أغنيات الجابري
*أغاني جميلة وكتيرة بتغطي لمحمد مساحة كبيرة من مساحات خسائر الهلال المتوقعة
*أيها الناس
*الحياة الحقيقية بمعاناتها تبدأ بعد شهر العسل
*لذا علينا أن نفكر في ذلك جيدا
*حتى لا نفقد حياة وصلنا لها بعد مجهود جبار
*أيها الناس
*ولأن روح الثورة يتنفسها وطن
*نتمنى أن يرافقنا الهلال إلى المرحلة القادمة للبطولة
*لازم تشدوا حيلكم يا محمد عبد الماجد
*أما نحن
*فسنغسل السماني الصاوي ونختو في الرف إلى يوم العيد القادم
*العدة الجميلة بنمرقها للناس البنحترمهم
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*أوكرانيا مسكينة مسكينة وروسيا حقارة وسمينة
سلك كهربا
ننساك كيف والكلب قال أمريكا بالغت….فتنت أوكرانيا في روسيا وزاغت
وإلى لقاء
خلاص شميت العافية ياعمنا تنقو ورجعت للفصاحة؟؟.
هانت الزلابيا حتي اكلتها بنو قريظة. الهلال يتعامل بالمثالية مع عالم فاسد من حوله واستمالة الحكم لها الدور الاكبر في انتصاركم. علي الاقل كان مفروض يطرد واحد من الدلاقين الذي اعتدي علي اجاجون بالوطئ علي ذراعه وهو طريح الارض.
اسال اباطرة الفساد حزومي وصلاح قوش قول ليهم دفعتو كم؟؟؟
اري اجساما قد انتفخت ياعمنا تنقو وكان تنفيثها وانا نراه قريبا وليس ببعيد.
ولاتحسبن الشحم فيمن شحمه ورم😹😹😹
اجساما قد انتفخت ياعمنا تنقو وحان تنفيثها وانا نراه قريبا وليس ببعيد.
ولاتحسبن الشحم فيمن شحمه ورم😹😹😹
يا عمك تنقو الزيت المبرشم ده حتجيبوه قرييييب ما تستعجل عشان بكره ما تبكي يا ام العروس ترونه بعيدا ونراه قرييييب جدا
بتاعتك دي يمكن آخر مرة قريتها قبل 15 سنة هسة ظهر لي عمودك في المتصفح و قلت لا لا حولا المهم قلت نشوفو كاتب شنو و لقيت نفس ا… زي بتاعت محل الحقنة و الحتانة لمن كان المريخ مهلهل و كنا متفوقين عليكم في المجموعات و كنت تقصد انو الهلال لازم تمرقوه معاكم
( أمخاخ ) خربة ، سودانيين ( وكدا ) حنك بس ! ! !