معقولة ده لاعب الوادي المنحدر؟
فى السلك
بابكر سلك
معقولة ده لاعب الوادي المنحدر؟
*تسجيل صوتي لافي (القروبات) منسوب للاعب وادي نيالا .
*يطمئن فيهو جماهير الهلال في خصوص شكوى المريخ .
*لم يطمئن فيهو جماهير وادي نيالا على إنفراد الفريق بالمركز المتقدم الذي ناله عن جدارة .
*ولكنه طمأن جمهور الهلال.
*وجمهور الهلال طبعاً يحتاج لتطمين وتطبيب وتطبيع كمان.
*لأنهم مع سودا ده من زمن شيبولا أظنهم ماغلبوا المريخ .
*وسوداكال الذي في عهده نال الزعيم ثلاثة بطولات ممتاز متوالية.
*ليس بفضل سوداكال وحده بالطبع.
*ولكن بتضافر الجهود المريخية وإلتفافها حول مريخها برغم الصراع الذي بلغ عمره أربعة سنوات متواصلة.
*لكن طبعاً سودا فال خير.
*ومتعهد هزائم الهلال.
*شئ بمبان وشيء سماني وشويات تيري والجزولي في الصف.
*لذا فعلاً جمهور الهلال في حاجة للتطمين.
*ولكني برغم كل ذلك استبعد أن يكون التسجيل للاعب وادي نيالا.
*لأنو ده ماتفكير زول غلب المريخ بجدارة .
*لكن التحية لصاحب التسجيل.
*لأن ماقام به يعتبر من أعمال رفع المعنويات ودعم للفقراء والمساكين .
*فالزول لما يكون صفر.
*بحتاج بالتأكيد لرفع معنويات.
*المهم .
*لسة نحنا مختلفين؟.
*خلافاتنا دي ليه ما بتشعلل إلا في نهاية الموسم؟.
*يعقوب حيرنا.
*المهم .
*أنا سعيد بمايحدث.
*فالخلاف الفكري ظاهرة صحية كانت غائبة عن المريخ في عهود الراعي والرعية.
*وطالما الناس مختلفة في المريخ لاعلى المريخ.
*يبقى مافي خسارة.
*كثير من قادة الصراع وحوارييهم في الطرفين.
*ينشدون صالح الكيان ويقاتلون لأجله مسلحين بالفكرة .
*وهذا لايمنع أن في الجيشين من جند نفسه طمعاً في الغنائم.
*في زمن الرسول الكريم عليه أفضل الصلاة والتسليم.
*في ناس كانوا بخرجوا للحرب بدافع رفع الراية .
*وناس كانوا بخرجوا للغنائم.
*كلو واحد يخرج للخرج ليهو.
*ويظل المريخ متسعاً للجميع.
*لايعرف جهوية ولايعترف بعنصرية.
*وللقانون ونظام ٢٠١٩م الحاكمية.
*أيها الناس.
*غرزة كان أحسن مدرب إلى ٢٠١٧م.
*بقى أكعب مدرب في ٢٠٢١م.
*في أربعة سنين عجز وخرف ونظرو ضعف ونسيبو العرس بتو محامي مختص بأمور (الفيفا).
*موش قلت ليكم في ناس بخرجوا للغنائم.
*أيها الناس
*إن تنصروا الله ينصركم .
*أها
*نجي لي شمارات والي الخرتوم .
*والينا.
*يعني نحنا بنعرف أحسن من ربنا؟.
*ربنا موش أمر بقطع يد السارق فينا.
*وفي واحدين قال من خلاف إيدينا ورجلينا.
*وواحدين يصلبوا يا والينا.
*أسي لو فعلنا الحتة دي يا والينا.
*ماكان أرحم لينا.
*ماكان من اللفحي وتسعة طويلة ونطوا الحيطة وكتلوا سيد البيت إرتحنا يا أخينا؟.
*ومن المهربين وبتاعين المخدرات والهيروين والفي الدولار متاجرين.
*ديل دحين ما هم الذين يعيثون في الأرض فساداً يا والينا؟؟؟.
سلك كهربا
ننساك كيف والكلب قال إذا بتكتل زول عشان موبايل يبقى تتكتل عشان الزول سيد الموبايل .
وإلى لقاء
سلك.
ثلاثة بطولات يا سلك؟ جبتوها خدمة يمين ولا عرق جبين؟ ما اخدتوها فطيس ومن المكاتب.
صحيح الاختشوا ماتو.
الحياء كلمة غير موجودة في قاموس الدلاقين ياود التجاني.
م بتبقى أمين وشجاع وتذكر الدجل والشعوذة ولا خايف على روحك
عمك تنقو برضو عاوز يتبجح بكاسات المكاتب وكاس الزور بتاع كاس. واذا لم تستح فاصنع ماشئت والاختشوا ماتوا ياعمنا تنقو.
المنحدر منو ياعم تنقو. الوادي ولا المهزوم مدفور الحكام؟؟؟