مع السوباط يا متنا من الضحك ويا كمان الضحك كتلنا !!
بالعربي الكسيح
محمد الطيب الأمين
مع السوباط يا متنا من الضحك ويا كمان الضحك كتلنا !!
* معظم أفراد الشعب السوداني يلبسون (الكرفِتة) مرة واحدة في العمر .
* يوم العرس .
* قبل العرس ما بنلبس (كرفِتة) وبعد العرس ما بنلسبها.
* ياها مرة واحدة يوم (الزفاف) .
* وأنا بتكلم عن (الزول السوداني الأغبش والكادح) .
* بتكلم عن الناس الما بتلبس (بِدل) إلا في يوم فرحة العمر .
* شغالين إيجار.
* عشان كده راجت وانتشرت محلات (إيجار البِدل) .
* تأجر ليك (بدلة) بي (٨٠٠) جنيه تلبسها يوم زفافك وتاني يوم ترجعها .
* أفضل من إنك تشتري ليك بدلة بي (١٢) ألف جنيه وتلبسها مرة في عمرك.
* وبما أن ذلك كذلك فإن المريخ قد إختار إستاد الأبيض ملعبا لمبارياته الإفريقية.
* وهي في الحقيقة (مباراة واحدة) في السنة .
* هي كِرفتة في العمر.
* والله صحي .
* مباراة إفريقية واحدة في الموسم.
* زي الكرفتة مرة واحدة في العمر .
* وتعال أناقشك.
* أربع سنين على التوالي المريخ بيطير من التمهيدي .
* بيلعب الذهاب وبمشي بطير من الإياب.
* يعني في أرضه مباراة واحدة .
* هسه المباراة الواحدة دي دايرة ليها شيكان والأبيض وحجز وسفر ؟
* الإتحاد الأفريقي ذاتو ببالغ والله.
* معقولة الإتحاد الأفريقي ما يكون عارف إنو المريخ بيطير من التمهيدي ؟
* فريق بيطير من التمهيدي ما على شرط يكون عندو ملعب مستوفي الشروط.
* مع على شرط .
* لأنو اصلا هو في المرحلة دي بيلعب مع فرق زيو .
* فرق من التمهيدي.
* وغالبا الفرق البتواجه المريخ في التمهيدي ما عندها اسادات ولا شفت النجيلة قبل كده.
* قبل سنوات المريخ واجه فريق في التمهيدي وانتصر عليه بسبب الكدارات.
* الخصم ما متعود يلبس كدارات.
* خسروا بسبب الكدارات وليس بسبب قوة المريخ .
* وبرضو في لاعب من فرق التمهيدي اللعبت مع المريخ قام أتصور سيلفي مع الإضاءة.
* أول مرة في حياتي أشوف لي زول بتصور سيلفي مع الإضاءة.
* هي مباراة إفريقية وحيدة سيلعبها المريخ وبعدها سيطير (زي كل سنة) .
* وأنا والله ما شايف إنو في داعي المريخ يختار ملعب شيكان .
* المباراة الواحدة دي كان تلعبوها في دار الرياضة عصر واليحصل يحصل .
* أنا شايف كده .
* وطبعا أي زول حر في (شوفو) .
* المهم .
* أيام قليلة جدا وتعيش جماهير الهلال في سعادة كبيرة .
* التسجيلات ستكون سبب سعادة الهلالاب.
* لأول مرة تجدنا لا نخاف من التسجيلات .
* زمان التسجيلات لما تقرب بتلقانا من الهم والخوف بقينا ضعااااااف.
* بنخاف من التسجيلات عديل.
* بنخاف لأن نصيبنا منها في الغالب بيكون (مواسير) .
* وحتى في المواسير الجماعة الطيبين بيشيلوا (سمسرة) .
* المرة دي غير .
* لا في سمسار ولا في ما سمسار .
* المرة دي من المنتج وللمستهلك مباشرة .
* وكل تسجيلات الهلال ستكون مؤثرة .
* كلها خلعة .
* بتخلع .
* مع السوباط ودعنا الخوف .
* معاك يا ريس بطلنا خوف وهموم ولونا فتح .
* وسعدنا بما تم إنجازه في ملف التسجيلات حتى الآن.
* وغايتو السنة دي بالذات يا متنا من الضحك ويا كمان الضحك كتلنا .
* عموما .. من المهم أن يتحدث القطاع الرياضي مع نجوم الفريق ويجدد فيهم الثقة .
* الدوري لم يحسم بعد وبالتالي التركيز مهم في هذا التوقيت.
* مجلس الهلال مطالب بحسم التسجيلات مبكرا وهذا متفق عليه.
* وظهور تسريبات التسجيلات قد تسجل ضغط نفسي على نجوم الفريق .
* وهو ضغط لا مفر منه .
* اي تسجيلات فيها تسريبات ومن الصعب أن تكتم على خبر في بلد زي السودان .
* صعب جدا .
* الحل هو أن يتحدث القطاع الرياضي مع اللاعبين ويكون قريبا منهم .
* من حق الهلال أن يفاوض ويحسم صفقاته مبكرا ومن حق الإعلام أن يجتهد في البحث عن الصفقات التي حسمها الهلال.
* ومع هذا يجب أن يبعد نجوم الهلال أنفسهم من هذا الشد والجذب .
* قد تنجو من الشطب فيما تبقى من مباريات.
* وقد تكتب لنفسك إعارة في حال تراجع مستواك فيما تبقى من مباريات .
* التركيز مهم .
* والمفاوضات التي يجريها مجلس الإدارة مع نجوم التسجيلات هي ليس مبررا لإحباط نجوم الفريق الذين يلعبون الآن.
* ما في حل .. يا مجلس الإدارة يبطل مفاوضات وينتظر التسجيلات وبالتالي يسجل (بقايا اللاعبين) ويا كمان يحسم الصفقات من الآن دون أن يتأثر النجوم بالفريق .
* وما تقول لي سرية .
* لحدي الآن مجلس الإدارة ما صرح بتسجيل لاعب خلاف جيسي .
* يبقى نجوم الهلال عليهم أن يتعاملوا مع ما رشح من أخبار على أساس أنه إشاعات.
* ونحن بنتعامل معاها باعتبارها حقيقة.
* ما بنقبل تقصير من الفريق في اللفة الأخيرة وما بنقبل مجلس الإدارة يتأخر في حسم الصفقات وما بنقدر نمنع الإعلام والناس من الاجتهادات والترشيحات.
* أي زول يشتغل شغلو بدون إحباط.
* ونركب صافنات ونجيبة (شنداوية) واصلو الزول بيموت والذكرى تفضل حية .
* و..و..
* ومش ح تقدر تغمض عينك .