مواليد 2003 خشمي وعندي!!

صابنها
محمد عبد الماجد
مواليد 2003 خشمي وعندي!!

كنت عاوز اتكلم ليكم عن هذا الخبر حسب تغطية صفحة نادي الزمالك التى جاء بها حرفيا.
( تحت انظار كارتيرون : ناشئين الزمالك يفوزون على المريخ السودانى ١/٢ وديا).
يا حليل شداد.
شداد ما كان بيسمح بالفوضى دي.
المريخ (الزعيم).. المريخ (الكبير) كيف يلعب مع ناشئين؟
انتوا ح تلاقوا الهلال والاهلي وصن دوانز في الابطال.. وح تشاركوا في مرحلة المجموعات ما ح تشاركوا في (نجوم الغد).
شوف الجماعة ديل قدر ما نحاول نوديهم (اغاني واغاني) يرجعوا الى (نجوم الغد).
فضيحة السواد.
ما عاوز اشتغل بالموضوع.
وعاوز اعمل فيها ما سمعت أي حاجة.
وما عارف أي شيء.
لكن برضو عاوزين نوضح العنوان اعلاه … (ناشئين) دي ما جبناها نحن من عندنا ..يعني ما تقولوا المريخ لعب امام (شباب) الزمالك.
ما عاوزين كضب.
لا لعب ضد ناشئين الزمالك.
انا مالي.
خشمي عندي.
ديل قالوا جاءوا من المدرسة للملعب.
الخبر حسب صفحة الزمالك على مواقع التواصل الاجتماعي بقول : ( تحت قيادة المدرب حسين ياسر المحمدى.. فاز فريق الزمالك على فريق المريخ السوداني والذي سيقابل الاهلى في بطولة افريقيا ١/٢ احرز أهداف المباراة يوسف أسامة نبيه في الدقيقة 37 وسيد نيمار في الدقيقة 40 . واستطاع المريخ تسجيل هدف وحيد في الدقيقة 53 من الشوط التاني.. وشهد الشوط الأول سيطرة كاملة من شباب الزمالك وأهدر فرص عديدة عن طريق حسام اشرف و سيف جعفر.. وشهد المباراة كارتيرون ومدحت عبدالهادي. يذكر أن الزمالك بدأ بتشكيل مكون من :
حراسة المرمى: السيد عطية. خط الدفاع: محمد طارق ، محمد حمدي ، أحمد ذكي ، محمد حسام “بيسو”. خط الوسط: طارق علاء ، ماجد هاني ، سيف جعفر ، يوسف أسامة ، سيد عبدالله “نيمار”. خط الهجوم: حسام أشرف. وتواجد على دكة البدلاء كل من: “محمد نديم – محي جمعة مواليد ٢٠٠٣ – عبدالرحمن علي مواليد ٢٠٠٣ – أحمد عبدالرحيم “إيشو” مواليد ٢٠٠٣ – مصطفى طارق مواليد ٢٠٠١ ، عبدالله محمد مواليد ٢٠٠٣ ، علي ياسر مواليد ٢٠٠٣ ، كريم عبدون مواليد ٢٠٠٣ ، عبدالرحمن الفيومي مواليد ٢٠٠٣ ، رضا محمد “العميد” مواليد ٢٠٠١).
في زول فيكم بعرف ليه اسم واحد من الجماعة ديل.
معقولة تلعبوا ليكم مع فريق مدرسة اساس.
انا مالي.
خشمي وعندي.
ما عاوز اتكلم عن هذا الموضوع.
بي طريقتكم.
خلوني عليكم الله… وما تجيبوا لي سيرة.
لكن المرمطة ما حلوة.
السترة والفضائح متباريات.
ناس المريخ (سيكافا) خربت ليهم طبعهم.
لكن كمان ما للدرجة دي.
انتوا بالطريقة دي بتجيبوا لينا الكلام للجوهرة الزرقاء.
نحن تعبانين في الجوهرة الزرقاء.
نجيل صناعي من تركيا.
وبنش.
ومضمار.
وإضاءة من اسبانية.
وكراسي لكبار الضيوف.
وكراسي صنعت مخصوص في جياد للمدرجات.
عشان تجوا تلعبوا لينا بهذا الفريق في الجوهرة.
انتوا لو رضيتوها لي روحكم …نحن ما بنرضاها لاستادنا.
انا مالي.
خشمي وعندي.
ما عاوز اقول أي حاجة.
ولا بعلق.
بس كمان ما للدرجة دي.
يا ناس المريخ.. فريقكم هذا سوف يلعب مع فريق الاهلي المصري بعد ايام معدودة.
بعد 17 يوم.
قول بعد 20 يوم لو اتأجلت شوية.
شعوركم شنو اذا كان فريقكم بخسر امام ناشئين الزمالك بهذه الصورة.
اللاعبون ح يقابلوا الاهلي المصري كيف وهم انهزموا من الصف الخامس في الزمالك.
والله الصف دا فى صف الرغيف ما بلاقينا.
الزمالك (الكبير) عندنا فيه رأي.
اخر مباراة للزمالك الكبير خسرها امس الاول من غزل المحلة 0 / 3.
الزمالك في مصر في كل المراحل ما قاعد يكسب ليه نتيجة.
ناس الاهلي المصري ح يتعاملوا معاكم كيف وانتوا بعد اسبوعين سوف تلعبوا معاهم في القاهرة؟
ناس الاهلي ح يقولوا ليهم هذا الفريق خسر من ناشئين الزمالك.
والله سبعة ما تفككم.
انا ما كنت عاوز اقول ليكم كدا.
خشمي وعندي.
انا مالي.
قدر ما ضايرت الكلام.. وقلت الجماعة في فترة اعداد . .. بي طريقتهم. ما قدرت امسك الكلام.
عشان ما اغلط فيكم.
خشمي وعندي.
ما عاوز اقول حاجة.
ولا عاوز المح.
لكن كمان ما بالطريقة دي.
يا جماعة ما في فريق في الدنيا بعسكر ليه شهرين في القاهرة.
معسكرات الخدمة الالزامية ما كدا.
نحن زمان دخلنا معسكر الخدمة الالزامية كان 45 يوم.
هسع ناس المريخ قعدوا في المعسكر 60 يوما.
من الحول للحول.
رمضان باقى ليه شهرين وشوية.
هسع رمضان الدخلو شنو في الموضوع دا؟
رمضان عجب قالوا ليك بقى يقول : ايش دا؟
وامير كمال بقى يقول : انتوا اجدع ناس.
وبكري المدينة فنانو بقى تامر حسني.
الناس ديل بكونوا نسوا شارع العرضة بي وين؟
ومحمد الامين.
والنعام ادم.
بقوا ناس محمد حماقي ساكت.
60 يوم ليه؟
اللاعبون ديل عندهم اهل ..واسر ..وظروف.. ما في داعي للقفلة دي في القاهرة.
60 يوم.
انا مالي.
خشمي وعندي.
ما عاوز اتكلم.
وما عاوز اقول أي شيء.
ما تسألوني.
انا ما عاوز اتكلم.
ما عاوز اعلق.
قالوا ليك : (قرر مجلس المريخ تمديد معسكر القاهرة حتى موعد مواجهة النادي الأهلي المصري في الثاني عشر من الشهر المقبل عطفاً على تشكيل لجنة تحقيق مع الحارس محمد مصطفى الذي رهن سفره للقاهرة بتسلم مستحقاته طرف النادي و كذلك اللاعب مصعب كردمان لعودته للخرطوم دون اخطار المجلس).
انتوا وقت عندكم مشاكل قدر دا ..المعسكر على شنو؟
مستحقات محمد مصطفى ما عاوزين يسلموها ليه.
ومصعب كردمان شال شنطته وجاء راجع.
الموضوع طول.
بالطريفة قالوا ليك بعثة المريخ سوف تعمل (نفاج) وزيارات للاعبين يشوفوا اسرهم ويرجعوا القاهرة تاني.
تقول طلبة.
(سيتم تقسيم اللاعبين إلى ثلاث دفعات لزيارة ذويهم في الخرطوم حيث تصل الدفعة الأولى للخرطوم يوم الثلاثاء المقبل و تضم ثمانية لاعبين و تعود للقاهرة على أن تتوالى بقية الدفعات الزيارات للخرطوم تباعاً).
الكلام دا في الجيش ما بحصل.
معسكرات الكلية الحربية ما بحصل فيها كدا.
العسكرية ظهرت في المريخ.
اصلا حازم مصطفى كان داعم لاعتصام الموز.
حازم داعم العسكر.
نظام (صفقات) متبادلة بين الطرفين.
مصالح.
الموضوع انعكس على اللاعبين.
لاعب يوقفوه.
ولاعب يشطبوه.
ولاعب يرجعوه.
ولاعب يبعدوه.
جيش بس.
وبعد دا يأتوا ويخسروا من ناشئين الزمالك.
نحن ما رضيناها ليكم يا امير كمال.
يا بكري المدينة الكلام دا ما صاح في حقكم.
السن ليها احكام.
ما في داعي للحراج دا.
سمعة المريخ واسمه اكبر من ان يلعب امام ناشئين الزمالك.
نحن الزمالك عندنا فيه رأي.
كمان عاوزين تلعبوا مع مواليد 2003.
الكلام دا في الدورة المدرسية ما في.
انا مالي.
خشمي وعندي.
ولا بتكلم.
ولا بقول حاجة.
بي طريقتكم.
لكن كمان ما للدرجة دي.
سكتنا.
ولا بتكلم.
اتصرفوا انتوا في الموضوع بي طريقتكم.
متاريس
الحمدلله ..الهلال ما ممكن يعمل كدا.
اسم الهلال برضو كبير.
المرمطة ما في داعي ليها.
لو دا معسكركم ..كان اخير تعسكروا قبلكم.
كان تلموها.
مواليد 2003.
انتوا ح تلعبوا مع الهلال مباراتين في المجموعات.
….
ترس اخير : ابقوا كتار ..تحموا بعضكم.