مورينهو

عن كثب

إدراك عبدالرحمن

اطلعت على قرار مجلس ادارة نادى الهلال بتعين مورينهو مدربا عاما للنادى العملاق على كمان الله قايلوا مورينو البرتغالى وقلت هييع كاردى خطير كع 300مليون يورو معونة قطرية زى هنرى ميتشيل مدرب الاهلى المصرى..بلا كان القاهو مورينو بتاع الشرطة المابيغبانى …معقولة..بعد مشينا لى البرازيل وسجلنا لاعب برازيلى وجوهرة واناقة انبرشنا لمدرب محلى وبالمناسبة محمد الطيب انسان رائع وطيب شديد..لكن كلنا طيبين ..ويقوليك المدرب المحلى احسن من الاجنبى ..نعم اذا درب فى المانيا وايطاليا وعندو شهادات كاربة فى فن اللعبة طيب المانيو كاعى ملايين اليورو فى مورينو الاصلى ماكان يجيب مدرب انجليزى وطوالى حقق البطولة الاوربية للكؤؤس شغل نضيف..بالمناسبة مورينو بتكلم لغة انجليزية  بسيطه ظريفة بلهجة برتغالية لكن الدماغ ملئ بالكورة ..الفرق بين اليورو والجنيه..بالظبط زى الفرق بين المدرب المحلى والعالمى..اخى كرة القدم اصبحت علم .. فالهلال طبز جد بتعين مورينو المحلى لنادى عريق مثل الهلال..وكمان قاليك استجبت تلبية لنداء الوطن..الله اكبر ..ونعم بالله..طيب جيبو معاهو فاروق جبرة ..وبرهان تيه..؟؟عاملين لون ازرق وندية ليه؟وزعلانين من هيثم لمن وقع للمريخ !! خلوا البساط احمدى ..جيبو خالد احمد المصطفى راجل طيب وفاهم !؟الهلال يعتز بفخامته وخامته الهلال مدرسة ينهل من انهاره بقية الاندية نحن الاصل والاصل تتبعه الفروع..فليذهب منا الى المريخ ولكنا لانستورد اى شئ احمر ولاطماطم..الازرق هو المرجعية ذاخر بمواهبه غنى باعلامه متميز بمؤهلاته..اين واين ؟اين طارق..اين مبارك..اين النقر..اين الجنرال صلاح..اين شرف النيل شرف الكرة السودانية ..اين كسلا ..!؟صراحة قلت امكن مورينو بتكلم برتغالى ايوا لانو البرازيل بتتكلم برتغالى ..ولا امكن انجليزى مميز..ولاشهادات تدريب عالمية ..كدى جرب قول داير ادرب فريق درجة تالته فى اوروبا سنبهار كده بدون شهادات كده ولو نادى مغمور..طبعا مستحيل..الم يفيق الهلال من تجربة العشرى وخروجنا من التمهيدى ..لو الهلال هاجم بثلاثة لعيبة لعبرنا..لم يسجل كاردى اى محترف سوى البرازيلى ..مافى مشكله نصبر حتى نصل ربع نهائى وسنرى هل سيقصر محمد موسى وشلش وكاريكا وبشه وندرس ملف المحترفين عن تروى وتمهل ..ولكنا نحن بحاجة الى مدرب عام عالى الفهم فى اللعبة ..هسى فى راس بشة وكاريكا من الخبرات اعلى من مورينو ولفيف من المدربين المحليين..اللهم يسرك.

قصاصات

المريخ شطب بعض لعيبته زعل ساكت من الهزائم الاخيرة وماعندهم ذنب..

الهولوكست اصبحت هاجس المريخ منتظرين يخصموا النقاط..رسلو مندوب للحاحاخام العاصمة لسع ما نقلوها.

تسجيلات المريخ والكشوفات الحمراء بتذكرنى وكت تكون راكب البص ومزحوم يجى يقوليك الكمسارى اب طاقية ارجع وراء هوى يا اب سديرى ماتتعصر كتير ارجع ورا ياخى وبعد شوية تسمع صرير الترباس يقفل الباب…

التحية الجديدة هاى هلال هاى كاردى الصليب المعقوق بنركبو ومعاهو شنب هتلر التراس ما تتعلقو صورة هتلر لكن احلقو شنب هتلر ستايل.اها دى فيها حاجة.

بدور ببكى

شمهارووش اجمع

شبيك مولاى

مورينهو ماسك الهلال

انت جنيت مولاى مورينو ب350مليون يورو مولاى

لالالا مورينو بتاع الشرطة بتاع عطبرة

ام زيكن ام زيكن ما بصدق….الاستكس يشتغل مولاى

كازميكا …كازميكا…نورو نورو مورينو كربكينجا..

موووووههههها موههاهاهاهاههها مو ههاهاهااهاها

الترجمة

مورينو ستعود الى قواعدك فورا…طوعا او كرها

تحياتى

(قَالَ رَبِّ انصُرْنِي بِمَا كَذَّبُونِ)

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app