ناس بتكره الحُمار وناس (بتحشي) الرغيف نمل !!

قزاز ورزاز
محمد الطيب الأمين
ناس بتكره الحُمار وناس (بتحشي) الرغيف نمل !!

* في وقت سابق وعندما نجد (الرغيفة) في (رأس التلاجة) وقد حاصرها (النمل) كنا بنجدع الرغيفة ومعاها النمل ..
* والآن عندما نجد (رغيفة في رأس التلاجة) وقد داهمها (النمل) فأننا بنأكل الرغيفة والنمل ..
* (النمل) في نظرنا بقى سمك ..
* وأصلا النمل في عين أمو بلطي ..
* ظاهريا ليس هنالك وجه شبه بين (صلاح أدريس وهدى عربي وعاصم البنا) ..
* وباطنيا فأن (صلاح وهدى وعاصم) جميعهم حصل على الموهبة الفنية بعد أن تجاوزات أعمارهم الـ(30) ..
* هدى عربي الناس عرفوها بتغني بعد ما عمرها إتجاوز التلاتين سنة وكذلك عاصم البنا ..
* أما صلاح أدريس فقد ظهر كـ(ملحن) بعد أن تجاوز الأربعين عاما ..
* أنا لا أعرف هل هذه موهبة متأخرة أم موهبة بطيئة النمو ؟؟
* وغايتو جنس غايتو ..
* شربات الفرح في الغالب هو عبارة عن (كركدي) ..
* هنالك علاقة بين الكركدي و(الفرح) ..
* في كثير من بيوت المناسبات يقدمون (الخبيز والفشار وشربات الكركدي) عقب (العقد) مباشرة ..
* لا أعرف لماذا (الكركدي) تحديدا ؟؟
* ولكن أظن وليس كل الظن إثم إن (شوية كركدي) بتعمل جردل (شربات) وهذا يتماشي تماما مع موجة إرتفاع الأسعار الحاصل الأيام دي ..
* كثير من أعداء الجمال يرمون (سفة التمباك) في حديقة الزهور ..
* وكثير من عشاق التلوث (يدخنون السجائر) في الأماكن العامة ..
* والاسوأ من هذا كله (الألفاظ البذيئة) في الشارع العام ..
* الشعب السوداني تاريخيا ظل (ملول) في استماعه للبنات (الغنايات) ..
* ولذلك كثير من الفنانات يظهرن في مواسم معينة ثم تنطفئ نجوميتهن دون مقدمات ..
* لاحظ الآن ستجد كل فنانة من الفنانات المعروفات كانت لها (شنة ورنة) قبل أن تصبح منسية وغير مرغوبة ..
* في تقديري أن السبب هو أن الفنانة في بدايتها تهتم بالفن وأول ماتصل القنوات الفضائية تهمل الفن وتركز على المظهر وبالتالي تسقط من حسابات المستمع ..
* البلابل هن نموذج لمغنيات حافظن على مكانتهن وحافظ عليهن الشعب السوداني دون ملل ..
* تجربة البلابل تستحق أن نقف عندها لكي نتعلم صناعة (النجومية الجماعية) وصناعة (المرأة النجمة) ..
* علاقة الشعب السوداني بدأت وتواصلت (سمن علي عسل) مع البلابل ولن تنتهي لان (الحلو ما بيكملش) ..
* (البلبلات الثلاثة) هن زي (ميسي) تألق مستمر ونجومية لا (تسرقها) المواهب الفطيرة التي طفحت على السطح الفني ..
* الدولار .. بالصباح سعر وبالنهار سعر وبالليل سعر ..
* الدولار يشبه (حمى الملاريا) فهو في حالة (صعود وهبوط مستمر) ..
* الدولار يحتاج لـ(مكمدات) ..
* نفس الطريقة التي (تأكل بها الأرضه الخشب) يأكل بها (الحسد الحسنات) ..
* الحسد (سوس) وأخطر ما فيهو أنه يعذب (الحاسد) قبل (المحسود)..
* والحاسد لا يرضيه شئ إلا زوال النعمة من (العباد) والعياذ بالله ..
* وللأسف الطب لم يجد علاج لهذا المرض المهلك في الدنيا والآخره ..
* الحسد يهلك (الدين والدنيا) ولذلك يا عزيزئ لا تحسد مخلوق علي نعمة ونظف قلبك وكن متسامحا ولا تشغل بالك بالناس ..
* تجنب الحسد والحقد وعيش في راحة ضمير وسرور ..
* تخلي الحسد علي بالقسم (صحتك تتصلح) و(لونك يفتح) و(وشك ينور) من غير (بدرة) و(قناع) ..
* رضينا بالهم والهم ما راضي بينا .. نتذكر هذا المثل كلما وقفنا أمام باب المستشفي ..
* الدخول الي المستشفي يحتاج لواسطة في كثير من الأحيان ..
* قروش تذاكر الدخول الي المستشفيات ما ظاهرة في (المستشفيات) ولذلك من حقنا أن نسأل : القروش دي بتمشي وين يا اولاد الحلال ؟؟
* أكثر شئ أضر بالفنان مصطفي حمزة أنه ظهر في زمن كان فيه الحوت جالسا علي القمة و(خالف رجل فوق لرجل) ..
* مصطفي حمزة صوته جيد ولكنه راح ضحية المقارنة المعدومة أصلا ..
* فى الثقافة العامة إرتبط (اللون الابيض) بالفرح ..
* وإرتبط اللون الاسود بالحزن ..
* ولكن الثقافة السودانية لها فلسفة أخرى ..
* إختارت الثقافة السودانية اللون الابيض ليعبر عن الفرح والحزن فى نفس الوقت..
* (فستان الزفاف عند العروس) أبيض اللون ..
* و(توب الحبس) عند المرأة التى يتوفى زوجها ابيض اللون ..
* وأذا كان هذا الشعب يحزن باللون الأبيض فنحن نقترح أن يكون (الأسود) لونا للفرح ..
* وهذه دعوة لتفصيل أول فستان زفاف أسود اللون ..
* الأسود يليق بأفراحنا يا احلام مستغانمي ..
* يا جماعة هنالك (كراهية) متبادلة بين السودانيين و(الحمار) ..
* كراهية متبادلة وظاهرة جدا ..
* نحن ما بنحب الحمار الذى هو صاحب صوت قبيح جدا والحمار كمان ما بيحب السودانيين عشان كده بتلقى (دمو تقيل) و(عنيد) ..
* والسودانيون من (حقارتهم) لو دايرين يذكرو اسم الحمار بيقول ليك (بدون مؤاخذة) ..
* مؤاخذة شنو ؟؟ ما حمار زيو وزي اي حيوان ..
* هسه فى (عيد المولد) بنعمل (حلاوة حصان) لكن ما بنعمل (حلاوة حمار) ..
* ماحصل شفت لي حلاوة حمار ..
* الحصان مقبول والجمل مقبول لكن الحمار مكروه عندنا ..
* المهم .. بصراحة كده الحمار ما بتحب لكن كمان حقو ما نكرهو للدرجة دي ..
* مناسبة الكلام ده إنو فى حمار لما سيدو باعو قام الحمار بكى بالصوت وبالدموع وتانى يوم رجع البيت ..
* وهنالك دراسة اثبتت ان الحمار من أذكى الحيوانات لكن الحمار عشان عارفنا بنكرهو بيعمل فيها غبى ..
* وغايتو جنس غايتو ..
* يا أستاذة : عندنا حُمار في اليوم بأكل (97) رغيفة ولذلك قررنا نبيعو شوفي لينا زبون ..
* و..و..
* وأنا في شخصك بحترم …(البرتقال أبو صرة) ..

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app