نتغدى بـ (انيمبا) ونتعشى بـ (الاشانتي)

صابنها

محمد عبد الماجد

نتغدى بـ (انيمبا) ونتعشى بـ (الاشانتي)

• عمنا (عرديبة ود سلطان) – عندو (العشا) اهم من (الغدا) ، والاهم من (العشا) عندو (كباية اللبن) – يقرطع ليك كباية اللبن متل (المسوح).
• المعني الزول البتمسح بالفازلين في البرد دا – لو حكاية (المسوح) دي وقفت ليكم في (الزور).
• في حاجات ما بتنزل.
• ولا بتفوت.
• كورة المريخ الساعة 3.
• وكورة الهلال الساعة 5.
• واحدة غداء.
• واحدة عشاء.
• ونحن مع (العشا) عندنا (كباية لبن).
• ناس المريخ ديل ما عارفينهم بتصرفوا كيف؟
• لكن نحن معاكم.
• بتلعبوا في ستادنا.
• وعندنا معاكم رمضان عجب ومحمد الرشيد.
• بخيت خميس ما تعدوه لينا.
• ما بنحسبوا.
• خلوه يأخد راحتو.
• الليلة نحن عشان رمضان عجب ومحمد الرشيد ح نقيف مع المريخ عشان يحسم لينا فريق (انيمبا).
• بي طريقتكم.
• اتشاوروا وتعالوا.
• المساء مباراة الهلال والاشانتي.
• نعمة الله المباراة متلفزة.
• ح نشوف (الغربال) في اول مشاركة رسمية له مع الهلال.
• والله محمد عبدالرحمن دا مفتري اول ما يبدأ يبدأ من الاشانتي كوتوكو.
• الزول دا مشاركته امام الاشانتي اليوم ان شاءالله مشاركة زول (شبعان).
• عندنا خالنا (السعن ود فضل) وقت زول يقول ليه كلام سمح او يعمل ليه حركة عجيبة بقول عليه : الزول دا زول (شبعان).
• كتير ما سمعنا منه عباراة الكلام دا كلام زول (شبعان).
• او السواقة دي سواقة زول (شبعان).
• او القميص دا قميص زول (شبعان).
• والليلة قطع شك كدا الغربال قونو في الاشانتي ان شاءالله قون زول (شبعان).
• ح يجدع ليك باكات الاشانتي ديل زي (القصب)…(عمو حسبو شتت قصبو).
• 3 في حتة.
• و4 في حتة.
• والحارس ح يطلع من القون.
• يجدعها وراه.
• الشبكة تتمغى وتفلق ..زي حيطة حميد.
• الغربال متعود على الكلام دا.
• اها دا بالنسبة للناس الواقفين معاي في موضوع العشاء – دا (العشا).
• بتكونوا راجيين (كباية اللبن).
• كباية اللبن يمكن يجيبها ليكم وليد الشعلة.
• ويمكن عيد مقدم.
• ويمكن نزار حامد ذاتو.
• نزار حامد طول من (التبصيرة) في القون.
• المهم الكلام العاوز اقوله ليكم ..ما تملأوا بطنكم شديد في (العشا) ، عشان في (كباية لبن) ماشي عليكم.
• كباية شُب.
• حليل زمن كبابي الشب.
• ما تشبعوا بي هدف الغربال.
• لسه في كباية لبن كبيرة.
• وكان للغداء …الغداء بتاعنا مجهجه – ناس بكري المدينة ديل ما مضمونين.
• الجماعة ديل لا ابوعشرين.
• ولا محمد الرشيد.
• ولا رمضان عجب.
• ولا صلاح نمر.
• ولا التش.
• الجماعة ديل البيلعب ليهم منو؟
• الظاهر كدا الغداء بتاعهم الليلة (سليقة).
• والسليقة ذاتها لو طلعت كويس.
• السليقة مجهجهة.
• نحن عاوزنكم تنتصروا انتصار مريح.
• وعاوزين الهلال ينتصر في غانا.
• الغتاتة ما سمحة.
• خلونا الليلة في مقام الوطن.
• لكن برضو (الغداء) المجهجه ما بنقبل بيه.
• الزول وقت يتغدي غداء مجهجه بجي للعشاء زي (الدو) البفكوه في اول اللعب.
• جاري جري.
• عندنا جارنا مريخابي اسمو (التليحة ود سعد ).
• التليحة ود سعد دا لو المريخ لاعب (تمرين) اعصابو بتكون بايظة.
• اصلو ما عندو ثقة في المريخ.
• وقت المريخ يكون عندو مباراة ببدل حجارة الراديو في المباراة (5) مرات.
• تقول مدرب.
• المشكلة تكون في صلاح نمر بقوم يبدل الحجارة!!.
• المهم مرة المريخ كان عندو مباراة صعبة كدا.
• التليحة ود سعد رسل الولد قال ليه شوف لي تشكيلة المريخ.
• طبعا ما بستحمل يعرف (التشكيلة) مرة واحدة.
• قلبو ما بستحمل الكلام دا.
• التليحة رسل الولد قال ليه : عليك الله شوف لي ابوعشرين واقف في المرمى.
• الولد قال ليه ابوعشرين ما واقف.
• التليحة قعد يبلع في ريقو متل (باقى الحساب).
• عيونو بقت زي الارسال القاطع.
• زمن الارسال وقت يقطع بتنزل (خطوط) في شاشة التلفزيون.
• التليحة ود سعد ما عرف يمشي وين؟
• شوية كدا التليحة رسل الولد قال ليه شوف لي الدفاع لاعب فيه منو؟
• الولد مشى غطس وجاء وقال ليه صلاح نمر برة التشكيلة.
• التليحة عاين للولد سمح وقشطو كف ..قال ليه يا ولد اتكلم كويس ..ابوعشرين عرفنا مشى الهلال صلاح نمر مالو كمان؟
• الولد ما قدر يقول أي حاجة.
• خاف من (الكف) التاني.
• التليحة ود سعد صبر شوية وقال للولد امشى شوف لي خط الوسط فيه منو؟
• الولد مشى وجاء راجع قال ليه وسط المريخ لا فيه التش ولا رمضان عجب ولا محمد الرشيد.
• التليحة قال ليه يا ود انت ما تتكلم كويس؟
• التليحة قال ليه كدي قول لي التشكيلة.
• الولد قال ليه التشكيلة.
• التليحة قال ليه والله الاسماء دي ما بعرف فيها أي اسم.
• يا جنا انت بتتكلم عن ياتو مريخ؟
• انتوا جنيتوا ؟
• انتوا انيمبا دي عاوزين تلاقوها بي لجنة الانضباط.
• لجنة الاستئنافات عاوزة تلعب ليكم؟
• مالكم انتوا فرطتوا في المريخ كدا.
• المريخ بقى قاعد ساي.
• وين مزمل ابوالقاسم – بعمل في شنو؟
• وين بابكر سلك؟
• وين معاوية الجاك؟
• الناس ديل قاعدين يتفاصحوا في الجرايد ساكت.
• بتكلموا ساي.
• المريخ فضل فيه منو؟
• الباقي لينا شنو؟
• انتوا ناس الهلال ديل موش نادي الحركة الوطنية.
• الهلال دا موش نادي الخريجين الاوائل.
• خلاص خلوهم يفكوا لينا رمضان عجب ومحمد الرشيد.
• كفاية علينا مغصة ابوعشرين.
• والله مغصة ابوعشرين باقي لي متل (الشرك) في الحلق.
• ابوعشرين خلوه.
• والغربال ذاتو خلوه.
• الغربال قاطع قلبنا.
• والله الهلال جاب ليه لاعب من شندي اسمو عيد مقدم …الزول دا العيد يجيبو ليك في القون.
• سرعة.
• وذكاء.
• وحرفنة.
• عيد مقدم …بقدم المدافع وبفوتو.
• سرعة ما شاءلله.
• اسرع من الانترنت.
• سرعة خيالية.
• الليلة كباية اللبن مع عيد مقدم.
• والعشاء مع الغربال.
• تاني في شنو؟
• والغداء (مجهجه).
متاريس
• بعثة الهلال في غانا برئاسة الطاهر يونس وبرفقة حسن محمد صالح وعبدالمهمين الامين قفلوا أي منفذ يمكن ان ينفذ منه فريق الاشانتي.
• ما ادوه فرصة.
• كذلك لا ننسى ممثل الاتحاد ورئيس البعثة من قبل اتحاد الكرة عبدالرحيم الدلنج.
• الطاهر يونس قال ليهم في الاجتماع التقليدي للمباراة …نحن عاوزين نلعب مباراة داخل الملعب.
• حذر الطاهر يونس من اللعب خارج الملعب.
• الطريف ان بعثة الهلال عندما وصلت للفندق في اكرا وجدت هناك عرس …العريس امه غانية وابوه سوداني.
• الطاهر اخذ هذا الكلام لتأكيد سمو العلاقات السودانية.
• وان شاءالله زي ما كانت اول ليلة للهلال اكرا هناك عرس في الفندق سوف تكون الليلة في الفندق عرس اخر في الفندق وذلك بانتصار الهلال ان شاءالله على الاشانتي.
• نتمنى ان توفق قناة الملاعب بعد ان اكتملت الترتيبات في نقل المباراة والعرس السوداني في غانا.
• الهلال ان شاءالله منتصر.
• الى دور المجموعات باذن الله وتوفيقه.
• كذلك نتمنى التوفيق للمريخ اليوم امام انيمبا.
• ونتمني لهلال الابيض الخروج بنتيجة جيدة اليوم خارج القواعد.
• فريق الامل قدم مباراة كبيرة امس لكن التوفيق لم يحالفه.
• الامل قادر على قلب الطاولة في مباراة الاياب.
• كل المباريات تلعب بدون جمهور.
• يعني الامل ما ح تكون عنده مشكلة كبيرة في مباراة الاياب.
• والى الامام دائما.
• ……
• ترس اخير : بكرة ان شاءالله فرحة قدر الكتلة.