نحن نغار على هذه العيون من ذلك الغاز !

بالعربي الكسيح
محمد الطيب الأمين
نحن نغار على هذه العيون من ذلك الغاز !

* الناس في بلدي كان بعضهم يضع (أصبع يده أمام النملة حتى تغيِّر اتجاهها).
* زمان ونحن صغار كانت تعجبنا هذه الحركة جداً .
* كنا لما نشوف (نملة) ماشة بنخت ليها الأصبع عشان تغيِّر اتجاه سيرها وفي ذلك سعادة لنا وشعور بالراحة النفسية .
* تخت أصبعك قدام النملة ولما تغيِّر اتجاهها أنت بتبتسم لا شعورياً .
* لا أعلم هل ما زال الأطفال يفعلون ذلك ويغيِّرون اتجاهات سير النمل بأصابعهم؟ ولَّا الزمن اتغيَّر ولا الاتغيَّر النمل ؟
* شكلو الأصبع هو الاتغيَّر .
* المهم .
* نحن عشان نغيِّر سياسة الهلال الخاصة بالتسجيلات محتاجين زول يخت أصبعو قدام الكاردينال .
* عسى ولعل يغيِّر اتجاهاتو، خاصة فيما يتعلق باختيار المحترفين الأجانب .
* الكاردينال في كل عام يشكِّل لجنة فنية للتسجيلات ثم يقوم هو بالتسجيل عن طريق سماسرة لا علاقة لهم باللجنة الفنية .
* يشكِّل لجنة فنية للتسجيلات ويستعين بالسماسرة والمنتفعين لذات التسجيلات .
* عشان كده ختوا ليهو (أصبع) عليكم الله .
* حاجة تكسف .
* العالم العربي العاشق للجمال هو الآن لا يريد للثورة اللبنانية أن تنتصر كما أنه لا يريد للحكومة اللبنانية أن تستمر .
* معادلة صعبة .
* كده أوب وكده أوبين .
* دايرين يشوفوا الكنداكات اللبنانيات في المواكب والشوارع.
* الجمال سلاح الثورة في لبنان .
* حقو مظاهرات لبنان دي ينقلوها في قناة (زي ألوان) وليس الجزيرة .
* ولبنان اشتهرت بالتفاح (المزروع) واشتهرت بالتفاح (المخلوق) .
* تفاح الله وتفاح المزارعين .
* ولو كان لابد من دعمنا للثورة اللبنانية فنحن وأولاد حلتنا نتبرَّع بتسيير قافلة محملة بـ(صفق النيم والخل) .
* نملك (مضاد البمبان) ونعلن التزامنا بتسلميه داخل أرض الاعتصام (دون وسيط) .
* تسليم (أيد لأيد).
* الجميل أن الثوار اللبنانيين تأثروا بشكل مبالغ فيه بالثورة السودانية .
* وهذا يثبت أن الثورة السودانية لم تكن مجرَّد ثورة .
* ده كان درساً لكل العالم .
* وحتى المرأة اللبنانية (تفاح الله) ما كان لها أن تخرج في المواكب وتواجه البمبان لولا إنها شاهدت بسالة وعظمة المرأة السودانية التي أدهشت العالم .
* المرأة السودانية هي الآن قدوة المرأة العربية .
* نتمنى أن تحقق الثورة اللبنانية أهدافها بأقل الخسائر .
* فنحن نغار على هذه العيون من ذلك الغاز المسيل للدموع .
* وغايتو جنس غايتو .
* المدهش في منتخبنا الوطني أنه يحقق الأفراح والانتصارات عندما يكون بعيداً عننا .
* ولما يجينا ويلعب بيننا يخيِّب الآمال ويتعرَّض للخسائر والعثرات .
* وبما أن ذلك كذلك فنحن نقترح أن يلعب منتخبنا بعيداً عننا على طوال .
* احتمال (القرب مشكلة) .
* أهلنا بيقولوا (البعد محنة) .
* جائز منتخبنا ده ما متعود على الأجواء والمناخ السوداني .
* وارد برضو .
* الواضح أن مدرب المنتخب الكرواتي (ما قدر المقام) .
* هذا المدرب وجد فرصته الكاملة ولم يثبت وجوده .
* الاستغناء عنه مبرر جداً .
* نحن من أنصار الصبر على الأجهزة الفنية .
* لأن الاستقرار من مفاتيح النجاح .
* وقد أنكرنا على الكاردينال استعجاله في الإطاحة بالأجهزة الفنية .
* ولكن الصبر لا يكون في كل الأحوال.
* مدرب منتخبنا ده لو كان في الهلال ما بيتم أسبوع مع الكاردينال .
* والله صحي .
* سياسة الكرواتي تجاه المنتخب فيها كثير من عدم الوضوح والتخبط .
* وهنالك مجموعة من اللاعبين المميزين تجاوزهم المنتخب .
* إعادة النظر في هذا الكرواتي واجبة .
* وأصلاً طالما هو هرب براهو يبقى ليهو يسهِّل وعلينا يمهِّل .
* وده كلو كوم ونجيلة إستاد المريخ كوم تاني .
* نجيلة إستاد المريخ إلا يقول ليك (دي نجيلة) .
* لو ما قالوا ليك دي نجيلة ما بتعرفها براك .
* أنا والله مستغرب نجيلتكم دي بتسقوها شنو؟
* بتشرب شنو النجيلة دي؟
* معقولة بتشرب موية عادي زي (نجايل) الناس ؟
* طيب نحن حالياً في الخريف، ليه نجيلتكم عاملة كده؟
* أي زول نجيلتو زي مستواه .
* فريق تمهيدي لازم نجيلتو تكون تمهيدي .
* الله بيديك قدر تصنيفك .
* تمهيدي بيديك نجيلة تمهيدية .
* أصلو ربنا ما بظلم ليهو زول .
* نصيحتي لكمال شداد .. أبعد المنتخب من المريخ .
* لا يلعبوا في إستاد المريخ ولا يقربوا عليهو .
* نادي الأسرة نجيلتو أفضل من نجيلة إستاد المريخ .
* نحن نلقاها من النجيلة ولا نلقاها من المدرب الكرواتي؟
* حاجة تكسف.
* ونركب صافنات ونجيبه (كردفانية) وأصلو الزول بيموت والذكرى تفضل حية .
* و..و..
* وبنحب من بلدنا…. (ومن لبنان برضو).