هاشم هارون : انا ماهر في المطبخ لكن .. ما في رمضان
رئيس اللجنة الاولمبية السودانية
هاشم هارون : انا ماهر في المطبخ لكن .. ما في رمضان
يعشق العصيدة بالتقلية والقراصة بالدمعة .. الابري الابيض والعصائر الطاذجة
حوار : هيام تاج السر
الاستاذ والمربي هاشم هارون عمل معلما ، ووزيرا للشؤون الاجتماعية والثقافية بولاية الخرطوم ، ورئيسا للمجلس الاعلي للشباب والرياضة ، ومحافظا بكوستي ،وفي فترة من الفترات كان الرجل يحمل عب ثلاث وزارات بعد ان كلف بالتربية والتعليم والان يتربع علي عرش اللجنة الاولمبية السودانية رئيسا ،هارون لايستطيع ان ينسي اول يوم صيام وقعاده ( تحت الموية ) والجرسة، ماهر في المطبخ وعلاقته ضعيفة به في رمضان .
*استاذ هاشم بتزكر أول يوم صيام ؟
-جربت الصيام وانا صغير وما كنت بكمل اليوم ، لكن أول يوم صيام حقيقي كدا كان في مدينة ودمدني كان يوم حار جدا جدا ، قعدت فترة طويلة (تحت الموية) صراحة (جرسة شديدة) ، واصل الصيام زمان بختلف من الان ياها كانت (موية الزير) والتلج كنا بنشتري ، التلاجات ما كانت متوفرة .
* حصل صمت خارج السودان ؟
– صمت كتير خارج السودان بس رمضان (سنقافورة ولندن) مختلف اليوم طويل جدا بنفطر الساعة عشرة بالليل بساعدك علي عدد الساعات اعتدال الجو ، (رمضان احلي في السودان) هنا بنشعر بي رمضان ، هناك نؤدي واجب الصوم بدون نكهة لي رمضان .
*وجبتك المفضلة في رمضان .
– رغم ان الاصول من الشمالية الا ان المنشا بالخرطوم والجزيرة في فترة الصببا والشباب جعلت وجبتي المفضلة (العصيدة بالتقلية والقراصة بالدمعة والتقلية ، كمان بحب (الفطير بالسليقة) وضحك هارون وطلب من ان اجربها كونها (حلوه المذاق ) ،ووعدته بذلك .
* مشروبك المفضل ؟
– الحلو مر لكن مافي رمضان ، في رمضان (الابري الابيض) ، وواصل هارون في رمضان ما بشرب حلو وما اشرب أي حاجة فيها لبن ماعدا (سلطة الروب) وبفضل الابري الابيض ، والعصائر الفرش (ليمون وبرتقال ) .
* برنامج تلفزيوني ؟
– عادتا اشاهد براج قناة الجزيرة وبحب برنامج (بلا حدود) لاحمد منصور ،بجانب البي ان اسبورت .
*بتشتغل في نهار رمضان ؟
– بطلع من عشرة صباحا وبرجع البيت بعد العصر .
*بتواجهك مشاكل ؟
– ابدا والله ، الهاجس الوحيد خلال رمضان دا القطوعات المتكررة للكهرباء ، نسال الله ان تنحل .
*علاقتك بالمطبخ ؟
– ماهر جدا ، عشت فترة عذابي عندي فكرة متميزة في المطبخ لكن علاقتي في رمضان ضعيفة بالمطبخ بحكم اني بطلع من الصباح وبرجع بعد العصر بلقي أي شئ جاهز بالاضافة لاني بعد العصر تاني مابتحرك .
* يعني ما بتساعد بي حاجة ؟
– الزمن ما بسمح لي لكن .. ممكن بالليل اعمل لي نفسي كوب شاي او فنجان قهوة.
* نشاطك في رمضان ؟
– نشاطي بنحصر في تلبية الدعوات ، حضور المناشط الرياضية والثقافية بعد التراويح .
*رمضان اختلف في الاولمبية من زمان ؟
– ما اختلف كتير ، المهام اقل مما كانت عليه .
*زكريات مع الدوري الثقافي في رمضان ؟
– لي زكريات جميلة مع العمل الثقافي عندما كنت وزيرا للشؤن الاجتماعية ثم المجلس الاعلي للشباب والرياضة كان العطا متصل ، ما بقول انعدمت لكنها بقت قليلة نسال الله ان تعود ، وقال (مجرد ان تضعف الثقافة نتوقع ظهور العديد من المشاكل ) .
