هل يستمع قنصل غانا بالخرطوم لـ (ستونبوي)؟

صابنها

محمد عبد الماجد

هل يستمع قنصل غانا بالخرطوم لـ (ستونبوي)؟

• البيعادي الهلال بفتح عليه هذا العداء ابواب لا قبل له بها (زي المسلسل التاريخي لمن يكون فيه غسان مطر).
• البيعادي الهلال براهو بجيب الكلام لي نفسو.
• والايام بتلف وتثبت ذلك.
• التاريخ يؤكد ان من يظلم الهلال بجيب لي روحو (الهوا) – لا اريد ان ارجع الى الوراء كثيرا حتى لا احرج احد ، (خلوها مستورة) سوف اكتفي ببعض الحالات التى ظهرت في الفترة الاخيرة ، بسبب دخول الهلال طرفا في الصراع.
• ابدأ ليكم من وين؟
• من الصحافة زلط !!
• ابدأ من بكري المدينة احسن – والذي تم ايقافه بسبب الاعتداء الذي وقع منه على حكم مباراة المريخ وهلال الابيض.
• قبلها كان بكري المدينة قد قام بالاعتداء على حكم مباراة الاهلي شندي والمريخ الطريفي الصديق.
• وجاء اسامة عطا المنان لعبو في المباراة التالية.
• بكري المدينة مشى العراق عمل مشكلة…ومشى سلطنة عمان وجاء راجع ، واصبح في الفترة الاخيرة يشركه النابي في اخر (10) دقائق من عمر المباراة.
• كل هذه الاشياء وقع فيها بكري المدينة بعد ان ترك الهلال ووقع عقدا معه ثم مضى ووقع عقدا مع المريخ.
• الهلال (جنة).
• الهلال ما في حاجة زي دي بتحصل فيه.
• كله تمام.
• الهلال لم يلاحق بكري المدينة لكن (الايام) لم ترحم بكري المدينة بعد ان ترك الهلال.
• الايام لاحقته.
• الهلال شال حقه من بكري المدينة (ايقافات).
• رمضان عجب ومحمد الرشيد وبخيت خميس (انا ما عارف ناس الهلال كانوا عاوزين بي بخيت خميس شنو؟) هذا الثلاثي وبعد ان وقعوا عقودا مع الهلال ووقعوا عقودا مع المريخ (راح ليهم الدرب).
• فاكرين الموضوع سائب.
• قايلنها عايرة ساكت.
• رمضان عجب ومحمد الرشيد لغاية الآن ما عارفين الحاصل شنو؟
• جماعتكم ما فاهمين اي شيء.
• ينزلوا بيهم من لجنة ويطلعوا بيهم من لجنة.
• من لجنة المسابقات الى لجنة الانضباط.
• من لجنة الانضباط الى لجنة الاستئنافات.
• تقول كاتلين ليهم (رقبة).
• والله (اللجان) اللفوا عليها الجماعة ديل (قطر) ما يشيلها.
• اخر حاجة لجنة الانضباط عاقبتهم ليك بـ (6) شهور.
• ليه؟
• عملوا شنو؟
• اصلوا هم طلعوا من قيادات النظام البائد.
• الناس ديل ادوهم (6) شهور في شنو؟
• دولة عميقة!!
• والليلة ما بتنوم.
• غايتو رمضان عجب لمن يرجع يلعب كورة بكون محتاج ليه زول يذكروا (الكورنر).
• الزول دا (ضربة الجزاء) بكون نساها.
• اي زول يتجاوز الهلال – بحصل ليه كدا.
• الموضوع ما بقيف هنا.
• ناس الهلال ديل بعد الـ (6) شهور قالوا ماشيين (الفيفا).
• عاوزين يعملوا شنو ما عارف؟
• ناس رمضان عجب ومحمد الرشيد وبخيت خميس – انسوهم.
• قضيتهم بتصل (الفيفا).
• بي طريقتهم.
• تعالوا شوفوا اسامة عطا المنان.
• قنصل غانا في الخرطوم.
• جاء في موقع كووورة (طالب اتحاد كرة القدم السوداني اليوم الأربعاء شخصية رياضية معروفة، باسترداد سعر تأشيرات دخول منتخب السودان إلى دولة غانا التي أقيمت في نوفمبر الماضي. وخسر المنتخب السوداني هذه المباراة التي أقيمت في الجولة 3 من التصفيات المؤهلة لكأس أمم أفريقيا 2022 بنتيجة 2-0. ووجه رئيس الاتحاد السوداني، كمال شداد، خطابا رسميا لقنصل السودان في غانا مطالبا باسترداد 7 آلاف دولار. وذكر الاتحاد السوداني في خطابه الذي حصل كووورة على نسخة منه، أن المبلغ المراد استرداده يمثل الفرق بين قيمة تأشيرة الدخول لغانا، المقدرة بـ 60 دولارا أمريكيا، بينما دفع الاتحاد 300 دولار، بفارق يصل 240 دولار لقيمة التأشيرة الواحدة لعدد 32 فردا، يمثلون قوام بعثة منتخب السودان لغانا. وبرر اتحاد الكرة السوداني هذه الخطوة، بأنها تأتي ضمن متطلبات الفيفا، التي تلزم الاتحاد بمراجعة الأموال المصروفات من مبالغ برامج التطوير. وأضاف الخطاب أن مبالغ برامج التطوير المشار إليها، تشمل مستندات الصرف بنسخة من تذاكر الطيران عليها القيمة ولا يكفي الحصول على وصل باستلام المبلغ من شركة الطيران المعنية أو من وكالة السفر في حالة شراء التذاكر منها.ذلك إلى جانب نسخة من تأشيرات الدخول المختومة على الجواز والتي تبين القيمة ولا يكفي الوصل الصادر من السفارة أو سلطات المطار).
• فارق يصل الى 240 دولار في كل (جواز) – دي عملها مجرد (قنصل).
• طيب الزول دا لو كان (سفير) كان حصل شنو؟
• الدولار في الزمن دي زي لبن الطير.
• المبلغ كله عمل مع عطا المنان 7 الف دولار.
• فعلوا هذا مع المنتخب (الوطني).
• الهلال الله شافو.
• والله ناس الهلال (شفوت).
• عرفوها.
• الحاجات دي ما بتفوت على الهلال.
• الهلال عندما سافر الى غانا لمواجهة الاشانتي كان اسامة عطا المنان قد كذب الهلال.
• أها هسع اسامة عطا المنان ح يقول شنو؟
• بالثابتة.
• نهاية الخبر بتقول : (وأمهل خطاب رئيس الاتحاد السوداني قنصل غانا في السودان، مدة أسبوع لاسترداد فارق مبلغ التأشيرات، وذلك حرصا على تبرئة ذمة الاتحاد السوداني المالية.وأكمل الاتحاد السوداني في خطابه: “بعد نهاية الأسبوع سيقدم الاتحاد بلاغا للشرطة ويخاطب وزارة الخارجية السودانية وسفارة غانا في مصر ووزارة الخارجية في غانا مع رفع كل المستندات للاتحاد الدولي لكرة القدم).
• الموضوع (كبر) اوي.
• هي حصلت.
• الاتحاد امهمل قنصل غانا في السودان لمدة اسبوع.
• اسبوع بس.
• اسامة عطا المنان لحق بكري المدينة.
• اسامة عطا المنان لحق ناس رمضان عجب ومحمد الرشيد وبخيت خميس.
• الطريف شداد ذاتو قال بمشي (الفيفا).
• يعني بقى عندنا 4 في الفيفا.
• رمضان عجب ومحمد الرشيد وبخيت خميس واسامة عطا المنان.
• والله حق الهلال اصلو ما بروح.
• اسامة عطا المنان لم يحاول السمسرة في تأشيرات الهلال وحدها بعد السمسرة في تأشيرات المنتخب السوداني ، وانما كان عاوز يسمسر حتى في (الكورونا).
• قالوا الهلال تلاعب في تقرير (كورونا).
• هو زول في (التأشيرات) بتلاعب.
• غايتو يا اسامة العالم العربي كله بقى يتكلم عنك.
• فضيحة بجلاجل.
• والموضوع ممكن يصل الفيفا.
• هسع ناس غانا موقفهم بكون شنو؟
• رأيهم شنو في الكلام دا.
• قنصل (سمسار) دي ما سمعنا بيها.
• يبيع (التأشيرات) – دي جديدة عليها.
• يا ربي اسامة عطا المنان قنصل غانا بعرف (ستونبوي).
• سمع بي الزول دا.
• استمع ليه.
• والّا موضوع (القنصلة) دي ساي.
• خالد صالح مع احمد السقا عندهما فيلم اسمه (ابن القنصل).
• ابن القنصل في الفيلم كان بعمل اي شيء.
• اي شيء.
• البخطر بي بالك.
• والما بخطر.
• هسع سيادة القنصل بعمل نفس الشيء.
• شيء تأشيرات.
• وشيء كورونا.
• غايتو ما في حاجة بتفوت ساكت.
• على كدا لمن اسامة عطا المنان كان عندو وكالة سفر ..وكان هو في الاتحاد العام كان بيأخد راحتو للاخر.
• واي حاجة بتظهر.
• اي حاجة بتتكشف.
• ما في حاجة بتندس.
• انتوا قالوا ليكم (الدولة العميقة) دي لعبة.
• دي ما الدولة العميقة ذاتها.
• …………..
متاريس
• يا ربي (جنوب افريقيا) فيها فكتوريا.
• ما عارف.
• لكن ان شاءالله نغلب.
• ان شاءالله الهلال يرجع ليه بـ 3 نقاط.
• الايامات دي قالوا ليك مصر مطر وبرد.
• والاتنين لو اتلموا – المريخ منجد النيل من مدرب الاحمال ما بتفرزو.
• ………..
• ترس اخير : شيلوا شيلتكم.