هنري وبنزيما وبوغبا في تمرين الهلال

صابنها

محمد عبد الماجد

هنري وبنزيما وبوغبا في تمرين الهلال

· الكلام دا انا ما قاطعو من رأسي.

· الكلام دا أنا لقيتو كدا.

· ما عندي أي ذنب.

· ما تشيلوني ذنبها ساكت.

· تنططوا في عيونكم زي (عناقريب الحبل).

· عندنا مريخابي بسبب تسجيلات الهلال عيونه بقت زي (كراس الحساب).

· مربعات مربعات.

· أي زول يشوفو تسعة تسعة.

· هذه الالقاب التى سوف احدثكم عنها ، اتوا بها لاعبو الهلال الجدد من انديتهم.

· حضروا بيها من بيوتهم.

· يعني هذه الالقاب لم تطلق عليهم من اعلام الهلال او من جمهوره.

· أتوا بيها كدا.

· ديل جوا منقطنها من اهلهم.

· عاوزين الالقاب دي تمشي.

· من الاهلي شندي جاء المهاجم الدولي والقناص الخطير ياسر مزمل والذي يطلق عليه في شندي لقب (هنري) الى جانب ياسر مويس…المنطقة التى اخرجت الفنان الكبير علي ابراهيم اللحو ومنها جاء الهلالابي المعروف طلحة مويس والذي كان كل جهده وامنيته ان يلعب ياسر مزمل في الهلال.

· طلحة جاب ياسر مويس (هنري) للهلال زمان وقالوا ليه الولد دا صغير.

· ياسر مزمل لقبه (هنري).

· شيلوا شيلتكم معانا يا صلاح نمر.

· نمر لو لاقوه ناس الهلال في هذه الايامات بفرتكوه ليكم نمرة نمرة.

· نمر على منو يا كابتن.

· تاني الكلام دا ما عاوزين نسمعو.

· نفسي الايامات دي في لقاء قمة سريع كدا.

· هلال مريخ على السريع.

· لقاء ثوري كدا.

· عشان الهلال الحالي قالوا نزل تطبيق (السبعات).

· أي فريق نقابله بتشكيلتنا دي ممكن نضربه سبعة.

· ما بنفرز في ذلك مريخ الفاشر من مريخ ام درمان.

· كلهم عندنا واحد.

· ح نضرب سبعة من طرف.

· كل الفرق والاندية ح تشيل (سبعة) من الهلال.

· اتذكروا هذا الرقم.

· سبعة من طرف.

· اكمل ليكم ياسر مزمل لقّب على المهاجم الفرنسي تيري هنري ، لاعب برشلونة السابق.

· كذلك اضاف الهلال الى كشوفاته في هذا الموسم اللاعب (الفلتة) والي الدين خضر ، اللاعب المعروف بلقب (بوغبا).

· بوغبا ما بقل عن بوغبا في شيء.

· والي الدين خضر ماشي عليه ..نفس الاستايل والحركات والكورة والحلاقة ما في زول بقول ليه (والي الدين) رغم عظمة هذا الاسم وذكراه الجميلة في نفوس الاهلة.

· والي الدين خضر وهو في الاهلي شندي اطلق عليه لقب (بوغبا) على اللاعب الفرنسي الشهير.

· والي الدين خضر (بوغبا) من شندي.

· بل بوغبا من الدروشاب.

· ما عملنا ليه أي زيادة.

· صلاح ادريس ما عارف نحن الناس دي لماها كيف؟

· المواهب لقطها كلها في الاهلي شندي.

· هنري وبوغبا اتوا للهلال من شندي …من (النمور) – ونحن اصلا عندنا محبة كبيرة لفريق الاهلي شندي.

· الى جانب هنري (ياسر مزمل) و بوغبا (والي الدين خضر) ، سجل الهلال في هذه التسجيلات المهاجم الكنغولي (القيامة الرابطة) المحترف الاجنبي فيني كومبي الملقب في الكنغو بـ (بنزيما).

· ناس الكنغو بقولوا عليه بنزيما.

· الشيء المدهش والغريب ان هنري وبوغبا وبنزيما ثلاثتهم فرنسي الجنسية.

· ناس لجنة التطبيع ديل يا ربي يكونوا قاصدنها.

· ناس لجنة التطبيع ديل ما عندهم حاجة ساكت.

· ناس الطاهر يونس ديل يكونوا قاصدنها.

· يكونوا قعدوا ليها في الواطة.

· معقولة هنري وبوغبا ونبزيما في تشكيلة واحدة.

· صلاح نمر قلبو وقف.

· غايتو أي مريخابي قلبو ضعيف احسن الايامات دي يبعد من التلفزيون.

· ابعدوا من الاذاعة.

· واحسن ليكم وافضل ان تبعدوا من التلفونات.

· ما تدخلوا فيس.

· ما تدخلوا واتس.

· واي رقم غريب الايامات دي ما تردوا عليه.

· تقوم قلبوكم تقيف ساكت.

· بابكر (سلك) الايامات دي قالوا ليك عمل (تطش).

· مرق برة الشبكة.

· الشيء الغريب ان هذه الالقاب (الفرنسية) الموجودة في الهلال صادفت نهضة فرنسية كبرى في كرة القدم.

· منتخب فرنسا (كاس العالم).

· باريس سان جيرمان …قالب الدنيا.

· ونجوم فرنسا قدامي وجدد.

· بلاتيني وريكارد وجوليت وزيدان وهنري وحتى بوغبا وبنزيما.

· فرنسا من اكثر الدول الاوربية التى اخرجت عظماء في كرة القدم.

· عشان كدا نحن بنتفائل بوجود هذه الالقاب في الهلال (هنري وبوغبا وبنزيما).

· تاني ياسر مزمل دا ما في زول يقول ليه ياسر.

· قولوا ليه هنري.

· مع هذه الالقاب الهلالية المبشرة تعالوا شوف القاب لاعبي المريخ.

· في المريخ القاب اللاعبين طبنجة وكومر ومرفعين ونمر وكركتيلا.

· يا ناس في شنو؟

· ناسكم ديل مع هنري وبوغبا ونبزيما ما بنستروا ليكم.

· ديل لا بثبتهم (طبنجة) ولا (دبابة).

· الجن الاحمر ذاتو ما بثبتهم.

· لا بد من القول ان رفع كشف اللاعبين في الاندية الى 30 لاعبا سوف يحدث طفرة كبيرة في كرة القدم.

· كشوفات الاندية في الفترة السابقة كان ما فيها غير 14 لاعب.

· التمارين ما كانت بتم.

· عشان كدا كان في دلال من اللاعبين.

· هسع الكشف بقى فيه (30) لاعبا.

· الهلال فيه (30) لاعب لو لعبوا امام منتخب فرنسا بوقفوا قلبه.

· التنافس اصبح شديد.

· أي خانة فيها عدد كبير من اللاعبين.

· تتخيلوا الهلال في الموسم الماضي كان ما عندو قلب دفاع.

· الهلال كان بيلعب بالسمؤال وبويا في قلب الدفاع.

· وفي مباراة القمة رجعنا الشغيل.

· غايتو الكاردينال عمل فينا عمائل.

· شطب الدفاع كلو.

· المضحك ان اعلام الكاردينال الآن بنتقد في شطب نزار حامد.

· ونزار ما مشطوب من الاساس.

· ناس الكاردينال نسوا شطب حسين الجريف اثناء الموسم وبعد خطأ طبيعي في مباراة كرة قدم.

· نسوا شطب السمؤال وهو في التمرين والاعلان عن ذلك واعادته مرة اخرى.

· انتوا يا ناس الكاردينال مفروض اصلو ما تتكلموا في الشطب.

· اسكتوا احسن.

· مواضيع زي دي ما تفتحوها.

· بتجيبوا لي روحكم الكلام.

· بمناسبة الخانات انا شايف من الافضل للهلال ان يستغني عن حارس مرمي ..في وجود جمال سالم وابوعشرين وكديابا الى جانب حارس الشباب عمر يوسف.

· ما في داعي لأربع حرّاس في الكشف وانتوا عندكم جمال سالم وابوعشرين وكديابا.

· ما محتاجين لهذا العدد من الحراس.

· يمكن اعارة ابوجا او حتى شطبه وتسجيله في احد الاندية الصديقة.

· كذلك اعارة محمد موسي في ظل العدد الكبير من المهاجمين في الهلال الآن او اعارة موفق صديق.

· وان كنت ارى ان موقف صديق سوف يكون له دورا كبيرا مع المدرب الصربي.

· موفق لاعب سريع …ومع مزمل (هنري) ومقدم عيد ومنير يونس ممكن يعمل (حول) لباكات الفريق الخصم.

· والله ما في زول بقيف قدامهم.

· ………….

متاريس

· لا بد من الاستفادة من خانة ابوجا بعد الاستفادة من خانة يونس الطيب.

· الهلال يملك ابوعشرين وجمال سالم وكديابا.

· استمرار جمال سالم مهم – خاصة في ظل الاعتماد على ثلاثة حراس.

· طبعا لو جمال سالم رحل من الهلال يبقى تلقائيا عندك خانة فاضية.

· وكدا يكون محتاج لخانة وحيدة لتسجيل عزام عادل.

· عزام ود البيه …الهلال يحتاج له بشدة.

· ما في لاعب وسط في الهلال يلعب بقدمه الشمال غير سليم برشاوي.

· لذلك لا بد من عزام عادل.

· عزام اسلوبه بختلف عن لاعبي وسط الهلال.

· عزام بعمل اضافة جديدة لوسط الهلال.

· عزام زول تفاصيل صغيرة.

· بيلعب في المساحات الضيقة وفي المناطق الزحمة.

· بعد عزام نحن ما عاوزين حاجة.

· ولا حتى الغربال.

· كفاية كدا.

· اختموا لينا بي عزام.

· والسلام.

· استهداف الطاهر يونس يعني نجاحه.

· الطاهر يونس عمل شغل في التسجيلات ..لم نر له مثيل منذ سنوات طويلة.

· تمارين الهلال الايامات تحظى بمشاهدة عالية.

· ولا حتى مباريات الدوري الاسباني او الدوري الانجليزي.

· ناس هنري وبوغبا وبنزيما بتمعوا في الناس.

· جهاز فني عالمي من 5 جنسيات يقود الهلال.

· ربنا يحفظ الهلال.

· ويغطي عليكم.

· عاوزين نشوف صورة الطاهر يونس مع عزام عادل.

· …………..

· اخر ترس : احلي ثنائية ممكن تشوفها بين بوغبا ونزار حامد.