وجهات نظر مختلفة والمتضرر الشفوت والمريخ
تغريدة واتساب
بقلم : معاذ ابومؤيد
وجهات نظر مختلفة
والمتضرر الشفوت والمريخ
معقولة بس !!!
جماهير وشفوت يضحون بوقتهم ومالهم عشان معشوقهم …
ناس تستقطع من قوت اولادها عشان يدعموا المسيرة ولاعبين ماعندهم اي شعور بالمسؤولية !!!
صفات مابتشبهنا تدخل مجتمع المريخ!!
**سفر بالقطاعي!!
**لاعبين علي كيفهم يسافروا!!
**تأخر استحقاقات مالية !!
**مشرفي قروبات يشنو عاصفة الحزف !!
الحاصل شنو والمستفيد منو والسبب منو!!
**************************
سفر بالقطاعي
قربنا نغني معاه سفري السبب لي اذاي
معقولة اي معسكر نقعد في سافروا ما سافروا سافرت دفعة بعديه دفعة !!
يالجنة التسيير شغالين بفقه التفويج ولا فهمكم شنو !!
عزرناكم في المعسكر الاولي وطبقتوا الحنة في المعسكر التاني وجيتو طبزتوها في سفرية دبي !!
تاني فضل شنو عايزين توصلوه لينا ؟؟
دا المريخ ياناس !!
بس مايكون الرجوع من المعسكر بالقطاعي !!
تكون مصيبة والله
خلاص لو الرجعة بالقطاعي رجعوا لينا التشكيلة الأساسية أولا ومعاهم الجهاز الفني
وبعديها رجعوا الاحتياطي
وبعديها الجهاز الاداري !!
خلونا نطمن علي التشكيلة الأساسية من الإرهاق….
**************************
نجي للاعبين البسافروا بعد تحانيس وبعد يوتروا الاجواء
و البلبلة تعم الشارع المريخي!!
اللاعبين ديل ماعارفين قيمة الشعار ولا ماحاسين بالمسؤولية ولاعندهم مستحقات ؟؟
فلان سافر فلان ماجا علان وصل المعسكر فرتكان عندو حقوق !!
يامجلسنا عرفتوا قيمة مدير الكرة ولا لسة ماعرفتوها !!
يعني حنكون تحت رحمة شخص واحد يتحكم في مشاعر الجماهير يتحكم في مزاجات اللاعبين !!
عايزين تنافسوا اخنق فطس ؟؟
ابجديات إدارة كرة القدم مامرت عليكم !!
**************************
هوي ياناس
الجمهور مايقعد يتعب نفسو وانت تتعاملوا معانا بالاستهتار دا..
اصغر فريق في اصغر حلة عندو مدرب ومساعد مدرب وعندو مدير كرة!!
نحن ماشين ببركات المدير الكبير وصاحب الشخصيه الهولامية !!
طيب ياشيخنا نعمل ليك نفرة في القروبات عشان تغير من قناعتك ولاشنو !!
يلا ياجماعة نفرة مع بعضينا عشان الإدارة تحن علينا وتعين لينا مدير كرة ومساعد مدرب لنادينا…
(نفرة مساعد المدرب ومدير الكرة)
في قروبات الواتساب !!
ياخلف الله عذبتنا
**************************
كل يوم نسمع فلان استلم مستحقاتو وفلان ماستلم
مدرب اضرب ولاعب اضرب وواحد قفل التلفون
وبعدين مصرين تعكروا الاجواء بسبب المستحقات المالية
الشفافية دي ممنوعة عندكم !!
كل مره تصرحوا تم تسليم المستحقات ويظهر واحد ما استلم وتاني المكتب الإعلامي مغيب تماما عن الساحة وعن قروبات الواتس آب
المكتب الاعلامي دا غالبوا يعمل ليه نشرة يومية بترويسة مميزة بامضاء مائي علي صورة توزع علي القروبات !!
دي محتاجة ليها مجهود !!
قلنا ليكم سابقا الشتل بيكتر والجماعة الحولينا همهم نطير ويخلقوا لينا صراعات !!
والقروبات ماتصدق تلاقي عاجل وشوف التوزيع يتم اسرع من اقوال الصحف….
**************************
نجي لمشرفي القروبات عاصفة الحذف !!
عينك ماتشوف الا فلان تمت إزالته
وتهديدات صريحة من المشرفين بالإزالة!!
المشرفين نسوا انو النفرات دي مجهودات ذاتية وشعور بالمسؤولية !!
يعني الإزالة عمرها ماحتخدم الزعيم ..
الناس ظروف وفي ناس ماعندها وبالمناسبة كلامكم عن الدعم كفاية جدا لتحريك المشاعر ..
امامنا مباراة مهمه نفرات المال مطلوبة ونفرات الحضورالجماهيري مطلوبة
يعني ماتركزوا علي المال وتنسوا الحشود الجماهيرية
وحشد الاستاد ذاتو دعم ونفرة ووجود الناس في القروبات مهم لحث الناس علي الحضور..
نتمني من المشرفين إبادة الكراكات وتخفيف الإزالة الي للمنشورات المخلة وعدم المشاركه بالراي والصمت !!
لو عدم المال سبب للازالة
كانت لجنة التسيير في الباي باي
**************************
ختاما
القروبات للنفرات ودعم المال
وللحشود وتشجيع الكيان
وحدوا الكلمة ووحدوا اللمة
المال يجمعنا ولايفرقنا
*************************
ونحن علي المدرج نشجع ونتفرج وهمنا الكيان ذي ماتلمينا في المدرج اتلمينا في القروبات يعني اللمة من اجل المريخ …
الاستاد مافيهو حذف وإزالة
طيب القروب ومدرج الاستاد واحد معانا الطالب ومعانا عامل اليومية ومعانا المستطيع ومعانا الفقير اختلفت الامكانيات والهم واحد
الحضور للاستاد والدعم في القروبات اختلاف المصادر والمستفيد واحد…..
اليوم نفرتكم ستدهش الجميع ياحبايبنا
الليلة منى واحلام ياسلام …
*************************
خارج النص
كلمتين في القروبات ماحلوة
غادر…..
تم إزالته…….
اليوم ثلاثه ديربيات
برشلونه & ريال مدريد
الاتحاد& الاهلي
قروبات المريخ& خزنة المريخ
متعة مابعدها متعة
ليلة من الف ليلة
******************^******
همسة اخيرة
يالجنة التسيير في اساسيات لنجاح فريق كرة القدم
مساعد مدرب ومدير كرة ومكتب اعلامي متمكن !!
المكتب الاعلامي موجود وعليه ملاحظات !!
محتاجين فعالية اكثر ومحتاجين تواجد اكثر…
والاتنين الباقين مع وقف التنفيذ منتظرين بركات صاحب الايقونة وصاحب الراي الواحد للموافقة …
