وسط اللاعبين في زول غريب ولابس جلابية !!

قزاز ورذاذ

محمد الطيب الأمين

وسط اللاعبين في زول غريب ولابس جلابية !!

* في ليلة رأس السنة وبعد صلاة المغرب مباشرة ، دخل (الطفل) في نوبة بكاء متواصل .
* كان يبكي بإخلاص حتى ظننا أن الدموع ليس ملكه .
* يبكي لأن (أطفال الحلة) يضربون الألعاب النارية ، وهو يضغط على والدته بالدموع حتى تأتي له بذات اللعبة النارية .
* والدته لا تملك ثمن (اللعبة) ووالده في السجن منذ عام .
* الطفل ظل يبكي حتى نام والدمع في خده .
* الوجع عند الأطفال سببه الأول والأخير هم الأطفال الذين في أعمارهم.
* (عجلة) عند طفل من أسرة ميسورة الحال ممكن تجرح مشاعر طفل من أسرة فقيرة .
* (قطعة باسطة) عند طفل ممكن تكتل ليها طفل أحلى حاجة أكلها في حياتو (كِسرة بسكر) .
* أخطر ما في الطفولة أن الشافع كلما (شاف حاجة بكى وطلبها) .
* وبما أن ذلك كذلك فإن المريخ الشهير ب(الإصيفر) ظل يبكي بحرقة عجيبة منذ أن سمع خبر تعيين تركي آل الشيخ رئيساً فخرياً لنادي الهلال .
* بكوا حتى ظننا أن الدموع ليس ملكهم .
* مالكم ؟
* قالوا : دايرين ألعاب نارية زي حقت الهلال .
* هاك (الطلقة) دي .
* دايرين شيخ فخري.
* والله العظيم أنا أكتر حاجة أثرتني هي كلمة قالها الرئيس الفخري لنادي الهلال معالي المستشار تركي آل الشيخ قال : (بالنسبة لجماهير المريخ الرفعت لافتات بإسمي أنا بشكرهم لكن في السودان أنا بحب الهلال) .
* حارة والله .
* المريخ يحب ويغازل تركي آل الشيخ ، وتركي آل الشيخ يحب ويغازل الهلال .
* زي حكاية (عاشقة عاشقة عاشق ، والعاشقاهو عاشقة عاشق غيرها) .
* التقلة صنعة .
* مشكلة كبيرة لما تكون (وصيف وكمان خفيف) .
* والمشكلة الأكبر لما تكون (تمهيدابي وبترفع اللافتات من أجل شحدة الشيوخ والأمراء) .
* حاجة تكسف.
* لم نجد مبرراً مقنعاً لتعادل الهلال في مباراتين أتنين.
* صحيح أن فلسفة كرة القدم وحدها تبرر ذلك ولكن جاهزية الهلال أكبر حتى من جنون الكرة .
* أمام حي العرب وأمام أهلي مروي لم يوفق الجهاز الفني في إدارة ال(١٨٠) دقيقة بالشكل المطلوب .
* كما أن الروح قد غابت في المباراتين .
* العجيب في الأمر أن التعادل في المباراتين جاء بعد مباراة الاشانتي التي تعتبر أفضل مباراة لعبها الهلال خلال السنوات الماضية .
* نحن نقول الجهاز الفني لم يوفق في المباراتين ونقف عند هذه الكلمة ولا نزيدها حتى لا نظلم زوران .
* ونرجو أن نمد حبال الصبر لبعض الوقت ونحن على ثقة بأن الهلال قادم إن شاء الله .
* وتذكروا دائماً .. الله في .
* نقل لاعب مصاب بعربة بوكس إلي المستشفى هو استهتار يصل مرحلة الكارثة .
* لو سيد البوكس ده ما جاء ماري بالاستاد كان ممكن اللاعب يروح فيها .
* ننتظر حتى نشاهد لاعب مصاب يُحمل على الركشة أو الموتر.
* هذه من غرائب وبلاوي الكرة السودانية .
* وغايتو جنس غايتو .
* كل أهل السودان بكُوا وشكُوا من السنة الماضية (٢٠٢٠) ما عدا المغنية عشة الجبلية والمريخ .
* الجبلية ركبت نيسان باترول والمريخ تجاوز عقبة التمهيدي.
* (ود الليدو ما كتلو جمب بيتو) و(الجبلية فهم لأي وهم) .
* لا المريخ ولا عشة ما بقدروا يقول (٢٠٢٠) كانت كعبة .
* ومصائب قوم عند قوم فوائد .
* حان الوقت من أجل أن يقفل الجهاز الفني للهلال التشكيلة .
* ليس من المصلحة أن تكون تشكيلة الهلال مفتوحة لعند الآن.
* قفل التشكيلة على (١٨) لاعب يمكن أن تظهر ملامح أوضح وأفضل للهلال .
* يجب تثبيت (العضم) على أن تكون (المداورة) في حدود أربعة لاعبين .
* لا نتدخل في عمل الجهاز الفني ولكن ما يظهر هنالك (ربكة) ربما سببها (التشكيلة المفتوحة والتنظيم الذي يلعب به الفريق) .
* عموماً ننتظر الصحوة بعد التعثر الأخيرة.
* يراهن المريخ على سيف تيري بنيجيريا وانيمبا يراهن على نتيجة فحص كورونا الخاصة بسيف تيري .
* المعمل لو طلع دقيق سيتابع سيف تيري المباراة من داخل غرفته بالفندق .
* قلبي يحدثني بأن رحلة المريخ الي نيجيريا ستكون مثل رحلته الي الكنغو .
* ولمن فاتهم الإستماع إلي قصة رحلة المريخ إلي الكنغو إليكم التفاصيل :
* المريخ غادر إلي الكنغو من أجل مواجهة مازيمبي و(نادراً ما يواجه المريخ الكبار) .
* بيطير قبل ما يصل مرحلة الكبار .
* جمال الوالي جاب ليهم طيارة خاصة .
* الطيارة فيها رئيس البعثة واللاعبين و(زول غريب لابس جلابية) والجهاز الفني وعدد (١٠) بودي قارد وعدد (٤) طباخين وعدد (٢) فنيين لفحص الهواء.
* هواء شنو ؟
* قال يفحصو هواء المكيف لأنو احتمال مازيمبي يعمل ليهم مخدر في المكيف .
* المخدر ما عملوا للترجي التونسي يعملوا ليك أنت؟
* قوم على حيلك .
* البعثة وصلت الكنغو ومعاهم (الزول الغريب اللابس جلابية) .
* جمهور مازيمبي أول حاجة عملها (دق البودي قاردات العشرة) .
* والله صحي .
* دقوهم مبدئياً كده بعد داك الخال ساماتا واصل الدق داخل الملعب.
* وجماعتك شبكونا ليك كواريك : غارزيتو باع الكورة ومحسن سيد ما بعرف يرص العلامات وما عارف شنو .
* دقوهم وغلبوهم والزول الغريب اللابس جلابية ما عمل ليهم أي حاجة .
* واوع تقول لي مازيمبي أداك خمسة ، عشان ح أقول ليك الخمسة دي انت اخدتها من هلال الأبيض.
* وتعال أناقشك.
* هلال التبلدي أداك خمسة ولا أنا ظالمك ؟
* أداك صاح؟
* طيب عندي ليكم نصيحة .. الزول الغريب اللابس جلابية ما تسوقو معاكم نيجيريا .
* وغايتو الله يكفينا شر (المُصدي) اللمعتو الأيام.
* ونركب صافنات ونجيبة (نيجيرية) واصلو الزول بيموت والذكرى تفضل حية .
* و..و..
* ووراء البسمات كتمت دموع وبكيت …… (داير لعبة نارية) .