وقعت بيوت (دوختها) الظروف فرماها البحر !!
بالعربي الكسيح
محمد الطيب الأمين
وقعت بيوت (دوختها) الظروف فرماها البحر !!
* السودان و(الحمد لله) بلد المفارقات في العالم.
* مفارقات في كل شي .
* ومعاكسات كمان .
* تلقى (رصيد) ، الشبكة (تطش) ، تلقى شبكة ما تلقى رصيد.
* تجي (تكوي) الكهرباء تقطع تجي تنوم الباعوض يكون صاحي ياداب.
* الواطة تصبح تقول ترتاح من الباعوض يجيك الذباب .
* صف الوقود يختفي يقوم صف الرغيف يتمدد .
* تلقى الغاز ما تلقى القروش .
* تلقي القروش ما تلقى الغاز .
* يتم توقيع السلام يقولوا افصلوا لينا الدين عن الدولة .
* مستحيل في بلدنا دي سعادتك تكتمل .
* لازم يكون في جزء من النص مفقود .
* لازم خاطرك يتكسر في حتة .
* تطلع ما تلقى مواصلات ، ما تطلع المواصلات تكون واقفة صف .
* البحر يزيد تكون في أزمة موية .
* البحر ينقص في أزمة موية .
* نطلع من كورونا ندخل في الفيضان .
* الحمد لله على كل حال .
* بلدنا ما جاهزة لأي حاجة .
* يجي الخريف يلقانا ما جاهزين .
* بنفتح المجاري بعد المطرة الخامسة .
* يجي الشتاء يلقانا ما جاهزين .
* بنشتري السيوترات والبطاطين بعد الشتاء يقرب ينتهي.
* نحن قاعدين في السهلة .
* وبما أن ذلك كذلك كان من الطبيعي أن يفعل البحر ما فعله ولم يزل .
* أضرار كبيرة في الأنفس والأموال خلفها فيضان هذا العام نسأل الله اللطف والتيسير .
* وفي مثل هذه المحن تظهر المواقف .
* والرجال أصلا مواقف والنساء كذلك .
* فاض البحر وتضررت منه الأسر الفقيرة .
* وقعت البيوت الكانت واقفة بالكلمة الطيبة والنية السليمة .
* وقعت بيوت ليس بداخلها إلا تلك القلوب الطيبة والوجوه السودانية العظمية .
* وقعت بيوت مبنية بالعرق الحار.
* (وقعت) بيوت لان أسباب (الوقوف) لا تتوفر عندها .
* وقع بيت صاحبه عامل يومية .
* وقع بيت بداخلة طفلة ممتحنة الشهادة السودانية بعد أربعة أيام.
* وقع بيت (ستو) بتغسل كلى أسبوعيا.
* وقعت بيوت وهي اصلا كانت واقعة لكن نحن كنا بنشوفها واقفة .
* ونحن اصلا ما بنشوف.
* الفيضان رمى الحيط والغرف ولكن الأيام والظروف رمت عديد الأسر ومنذ سنوات بعيدة .
* بيوت (دوختها) الظروف فرماها البحر .
* الآن نتكاتف ونعمل من أجل دعم هذه الأسر.
* نقف مع بعض ونساعد بعض.
* الجات من الله صابت .
* والجاي من الله كل خير .
* الموضوع الآن ما موضوع تبرع بالشوالات والخيم .
* ولا موضوع غناء وكاميرات وإعلام.
* الموضوع أكبر.
* موضوع حياة ومستقبل .
* المبادرات المجتمعية التي انطلقت تبرز جمال هذا الشعب .
* وهي مبادرات عظيمة من شعب عظيم .
* ولكنها في نهاية الأمر هي مبادرات لن تحل مشاكل كل الأسر .
* لابد من أن يتحرك كل فرد في المجتمع ويقدم ما يستطيع إليه سبيلا .
* ما تقيف مكتوف الأيدي.
* قدم البتقدر عليهو .
* حتى بعد ينحسر البحر ستظل المعاناة قائمة .
* البحر لو رجع لن تعود كثير من الأسر للبيوت الواقعة .
* وعشان تاني البيوت دي تقيف دايرة أموال طائلة .
* أنا أتمنى أن لا تتوقف هذه المبادرات إذا تراجع البحر .
* استمروا في دعمكم حتى بعد تراجع البحر .
* نعمل (نفير الوطن) .
* نعمل حاجة قريبة من (القومة للسودان) .
* نفتح باب المساهمة من داخل وخارج البلد .
* ويستمر الباب مفتوح لثلاثة أشهر قادمة .
* في ظل هذه الظروف الإقتصادية القاسية لن يستطيع أحد بنيان بيته من جديد .
* نسأل الله أن يخفف عليهم ويلطف بهم ويعوضهم إن شاء الله .
* ويارب لطفك.
* ونركب صافنات ونجيبة (سودانية) واصلو الزول بيموت والذكرى تفضل حية .
* و..و..
* والله في .
