*الجمعة وقف بعض الأهلة احتجاجاً يطالبون بسقوط (كردنة).
*اسموها مليونية.
*ومامهم جو كم..؟
*المهم انو اسمها مليونية.
*وبالسبت وقف بعض المريخاب إحتجاجاً يطالبون بسقوط المجلس.
*وبرضو اسموها مليونية.
*ولا يهم العدد كان كم ..!!
*المهم أن من خرج عبر عن مكنون نفسه.
*أيها الناس
*في المريخ لانحتاج لمليونية بقدرما مانحتاج لدولارية.
*فمشكلة (غرزة) تضع المريخ موضع المحكوم بالإعدام واستنفذ كل مراحل التقاضي.
*يعني زول محكوم بالإعدام وينتظر التنفيذ.
*ممكن في اللحظة الأخيرة وهو في طريقه للمشنقة.
*يقبل أولياء الدم الدية.
*وبالتالي يفك حبل المشنقه من حول عنقه.
*ولكن
*الدية ذاتها وين نلقاها.
*مدام أهل المحكوم أعضاء المجلس لايملكون التكتح.
*وقبيلتهم الجماهيريه مادايرة تخارج ولدها المريخ من حبل المشنقه كيتا في أهلو ناس المجلس.
*وممكن عادي ملل الإنتظار يعجل بالإعدام قبل ما الشناق يجيب حبلو.
*أيها الناس
*في أمة المريخ دي كلها.
*لايوجد كاش حااااضر إلا لدى القنصل حازم.
*يبقى فكاك المريخ من المشنقة في خزانة حازم.
*وحازم لا أظنه يبخل على المريخ.
*ولكن عدم تعاون المجلس العمدة بدون أطيان.
*مجلسنا الأقرع ونزهي.
*عدم تعاونه بودينا الخور.
*هبوط المريخ لدرجة أدنى لايعفي المريخ من السداد.
*يبقي حقو حازم يدين المجلس المبلغ ده.
*مايسددوا ساي.
*دين وبواسطة الإتحاد.
*بعد داك يعفيهو يطالب بيهو هو حر.
*وفي الحالتين يشكر على الموقف النبيل.
*أيها الناس
*إدارة المعارك التي يخرج المريخ منها خاسراً ماحبابها.
*والإنقسام على المريخ ماحبابو.
*أعتى المشاكل يمكن حلها.
*ويمكن تأجيلها.
*لننأى بها بعيداً عن المساس بالكيان.
*شوفوا الفضل مع (غرزة).
*أكيد المبلغ حاينزل قريب مية الف دولار.
*مبلغ التعويض مضاف ليهو الخمسة في المية السنوية وتلتو ولا كتلتو .
*بتخلى مبلغ (غرزة) وانطوني و(الفيفا) ما أزيد عن ميتين وسبعين الف دولار.
*حازم يقرضنا المبلغ ويمرقنا من المرمطة.
*وبعد داك نشوف مطرة المجلس صابة وين.
*أيها الناس
*فرقوا بين الحكومة والوطن.
*الحكومة عمرها مابتبقى وطن.
*والوطن طول عمرو وطن.
*وطن الجميع.
*وطن البتفاصح والرطن.
*فلانسخر من أوطاننا أبداً.
*ولكنا نسخر من الذين جعلوا أوطاننا مسخرة.
*كعبة البشتنة ورقاد الواطة.
*أيها الناس
*ضربة (غرزة) دي زي ضربة هيروشيما.
*بتغير الملامح وتخلي العيون دقاااااااق.
*أيها الناس
*إن تنصروا الله ينصركم.
*أها
*نجي لي شمارات والي الخرتوم
*يامعتمد أمدرمان
*شارع العرضة خور الصرف البعض موصل فيهو موية الصرف كيتا فينا.
*إشتكينا لكل الجهات اللينا.
*فضلت الشكية لي الله ياوالينا.
سلك كهربا
ننساك كيف والكلب قال الدور الجاي الحمام بكون في الشارع.. الاختشوا ماتوا.
وإلى لقاء.
سلك
