وكمان هلالاب في الفيفا!!

لهيب النار

هاشم الطيب

………………………

# غاينو جنس غاينو كل ماترفع ليك حجر تلقى تحته هلالابي قلنا نتخارج من هلال شداد طلعوا لينا هلالاب الفيفا

!# قبل المغادره انتظرنا ماتجود به لجنة إستئنافات هلال البلوله لكنها كانت أشطر رفعت الجلسه لزمن تاني وزمن لسع ياريت باكر يابلبل يكون هسع!!

# هلالاب الفيفا أيدوا كلام شداد وقالوا كلام البروف يمشي مافيش تطبيع وسوداكل يقعد بس الحبه ما تجيه!!

# هلالاب سويسرا قالوا كدا ماكفايه لازم العرضه جنوب يضوقوا سهر الليل ونقول ليهم الشافوه خلوه !!

# و.. قاموا هلالاب العرضه شمال حرشوا لاعب المريخ البرازيلي ماركوس وعلى طول ماركو فوض أمره للمحامي والمحامي شاطر جاب الخبر الأكيد وحرمان الأحمر الوهاج من التوهج ثلاث تسجيلات يعني هلالاب الفيفا عملوها عشان هلال العرضه شَمال يمتلك الساحه ويسجل اللاعبين بتراب القروش ويمكن بالمجان !! ومريخاب العرضه جنوب لعام ٢٠٢٣ ماتسرع تخفف لينا نار وجدي ! وجدي التمكين؟

# لازم يكون وراء استقالة مولانا جمال حسن سعيد رئيس أمل الحديد والنار أمر خطير جدا يتطلب من دكتوره آمنه النزول للميدان وتشوف الحاصل في الأمل الأتبراوي شنو، ؟ لو قروش عليها عمل لحل المشكله ورفع الأمر لحكومة حمدوك والفريق البرهان ما بعيد غاينو يا ناس أتبرا شيلوا الشيله الأمل في محنه ساعدوه للخروج من هذا المطب،، ويا مولانا راجع قرارك الزعل مرفوع !!

# نرجع لنادي حلتنا نجوم حي العرب السداري بطل الأولى الأتبراويه هذا كما قال وصرح حجر الدرب المسئول عن شئوون اللاعبين وأكد ذلك الأرباب التوم أن رئيس النادي الوجيه ابو الحاجه أفاد أن هنالك دعما مادي ضخم سيضخ  من أجل الإعداد للموسم الجديد ليظهر الفريق في كامل حلته والأستعداد ويتقدم الصفوف وغير الممتاز مابيقيف …

لحن الختام ::

=========

من نيالا البحير غرب الجبيل أكدت الأستاذة الصحفية الشاملة أيمان بدوي بأن حكومة الولاية أكملت كافة الإستعدادات من سكن وملاعب وترحيل وإعاشه لكافة الإداريين والحكام والإعلاميين واللاعبين والأجهزة الفنية كما شمر أهل المدينة ساعد الجد اإستضافة الضيوف…