يا الكاردينال ما تنسى حافز صلاح نمر!!

بالعربي الكسيح
محمد الطيب الأمين
يا الكاردينال ما تنسى حافز صلاح نمر!!

* لا يرى (تاج العافية) إلا المريض ..
* عندما تمرض تتأكد بما لا يدع مجالاً للشك أن العافية تاج علي رؤوس الأصحاء ..
* وإن كنت من الذين لا يحمدون الله على نعمة السمع والبصر وسلامة البدن فما عليك إلا بزيارة خاطفة لحوادث أم درمان ..
* عند زيارتك للمستشفى ستحمد الله على كل النعم وستعرف حقاً أن العافية لا ثمن لها وإن الصحة لا تقدر بكنوز الدنيا ..
* كثير من الاشياء لا نحمد عليها الله إلا بعد أن نشاهد الأسوأ منها ..
* إن كنت تعاني من قضروف في الركبة وشاهدت شاب مشلول الأطراف ستحمد الله على القضروف ..
* وإذا كنت أعمى وتعرفت على صديق (أعمى واطرش) ستحمد الله على نعمة العمى ..
* وبما أن ذلك كذلك فان مباراة القمة جعلتني وعلى الصعيد الشخصي أحمد الله كثيراً على نعمة الهلال ..
* الهلال في الأصل نعمة من نعم الدنيا الكبيرة ولكن بعض الاشياء التي تحدث تجعلك تعيد إكتشاف بعض النعم من زوايا أخرى ..
* مبدئياً كده لما تشوف صلاح نمر في دفاع المريخ بتحمد الله على نعمة حسين الجريف ..
* رغم إنو عندنا رأي سابق في حسين ..
* ولما تشوف أمير كمال في ارتكاز المريخ بتحمدالله علي نعمة ابوعاقلة ..
* ولما تشوف حمزة داؤود بتحمدالله على نعمة الشغيل ..
* وهكذا ..
* انتفخ وهماً المريخ الشهير ب(المدفور) وظن جمهوره أن الفوز على الهلال سهل وميسور ..
* صدقوا الأوهام وتعشموا وافرطوا في الاحلام فصحاهم وليد الشعلة بهدف حلال ..
* الوهم مشكلة ..
* لما تتوهم وتوسع خيالك قطعاً ستصحو على واقع مرير واليم ..
* بصحيكم الشعلة ..
* وأنا حقيقة أكثر شئ محيرني كيف يطمئن جمهور المريخ وصلاح نمر في دفاع الفريق ..
* صلاح نمر مع كل هجمة هلالية بتحس إنو محتاج ليهو لمدافع ..
* مدافع محتاج لمدافع ..
* يعني لما شلش يكسر لنمر (بيضة) يفترض يكون في مدافع من المريخ مكلف بمراقبة صلاح نمر ..
* والله صحي ..
* نمر ده لو عندنا في الهلال بنلعبو وبنلعب وراهو محمد المعتصم ..
* لو عندك في فريقك زي صلاح نمر ده يفترض تشيل هم السنة كلها ..
* أول أمبارح أنا بشاهد في نمر وبتذكر في عفاريت الترجي التونسي والهلال السعودي والأهلي المصري الذين ينتظرون المريخ في البطولة العربية ..
* لما تتخيل صلاح نمر واقف وهجوم الترجي ماشي عليهو بتشيل هم لركبة نمر وسلسلتو الفقرية ..
* غايتو السنة دي بالذات يا متنا من الضحك ويا كمان الضحك كتلنا ..
* قلنا ان فوز المدفور على الهلال في مباراة القمة السابقة بضربتي جزاء إنما هو (فاصل إعلاني) تخلل مسلسل الانتصارات الزرقاء على المدفور ..
* وبالفعل (14) يوم فقط وعاد الهلال لمواصلة انتصاراته من باب العادات والتقاليد ..
* هم يهربوا مننا لدواعي أمنية ونحن نفوز عليهم (عادات وتقاليد) ..
* وأجمل ما في اللقاء أن الفوز (عرق جبين).
* فوز حمرة عين ..
* هدف ذكي لنجم ذكي وقع على الشباك الحمراء وأتوقع أن يكون من ضمن قائمة الهدافين التاريخيين لمباريات القمة في السنوات القادمة ..
* وليد الشعلة القاتل البارد يدخل الآن في علاقة مع شباك المريخ ..
* الغريبة وليد دخل الكورة القون وصلاح نمر دخل معاها ..
* يبدو إنو صلاح نمر ما عندو (فرامل) ..
* دخل المرمى بعد معانقة الكرة للشباك بدقيقة كاملة ..
* أول مرة في حياتي أشوف لي زول كان جرى ما بقيف إلا يثبت في حاجة.
* أكثر ما أحزنني ان المريخ دخل الملعب وفي نيته يخسر برقم فلكي ..
* كانوا عندهم نية يخسروا كتير …
* والحاجة دي ظهرت من خلال تعاملهم مع المباراة وخوفهم الشديد من الهلال ..
* من التسخينة أنا عرفت المريخ خايف ..
* واصلاً من قمنا لقينا المريخ بيخاف من الهلال ..
* ما بخافوا مننا إلا لما يكونوا ضامنين (الدفرة)..
* مريخ أول أمس ده بيشبه مريخ الوحدات الأردني ..
* والله صحي ..
* لو استغل نجوم الهلال نصف الفرص لحدثت شلباية جديدة بالجوهرة ..
* إنها الروح والعزيمة ..
* تعافى الهلال نفسياً ومعنوياً واستعاد شخصيته بشكل كبير ..
* نفس العناصر التي خرجت من كأس السودان والكونفدرالية هي ذاتها التي تقدم في مستويات رفيعة في الفترة الأخيرة ..
* وهذا تأكيد على أن المشكلة في الهلال كانت لها علاقة بالجو العام والبيئة والثقة ..
* نحيي نجوم الهلال على هذه الروح الكبيرة ، التحية الأكبر للنجم الكبير ابوعاقلة ويونس الطيب والشغيل ووليد الشعلة وفارس الفارس وحسين والمعتصم وسموأل والنجم الحريف المشاغب جوفياني والخطير جداً الصادق شلش وشيبوب كواي القلوب ومحمود امبدة والضي وصلاح نمر ..
* نحي صلاح نمر ونتمنى من الكاردينال أن يحفزه أسوة بنجوم الهلال ..
* وتبقى كل التحايا للنجم والقائد بشة الذي قدم أجمل (30) دقيقة وصنع هدف اللقاء ولو واصل لكان الحال الأحمر يغني عن السؤال ..
* أيضاً نحي مجلس الادارة الذي منح اللاعبين حوافزهم قبل مباراة القمة فكان لها تأثير ..
*نحي رئيس الهلال الذي حفز النجوم عقب خسارتهم (الصدفة) أمام المريخ ..
* الكاردينال قدم السبت للاعبين عقب خسارة القمة والآن قدموا له الأحد فكان الفرح للذين تفرح بهم البلد ..
* وتأكدت الحقيقة .. إذا لعب المريخ في وجود تحكيم نزيه سيخسر لا محال ..
* المريخ بعيدا عن الدفرة خفيف ..
* بطيخ وفي البطيخ مسيخ ..
* وغايتو الله يكفينا شر (المصدي) اللمعتو الأيام ..
* ونركب صافنات ونجيبة (هلالابية) واصلو الزول بيموت والذكرى تفضل حية ..
* و..و..
* وتسيبني في عز الجمر وانت من حولي…. بتاكل في ايسكريم (الشعلة )..