يا رمضان عجب العقد ده والله إلا (تِتبخر) بيهو !!

بالعربي الكسيح

محمد الطيب الأمين.

يا رمضان عجب العقد ده والله إلا (تِتبخر) بيهو !!

* مرات بتدخل فيك (خُلعة) بتخليك تخاف حتى من (ضُلك) .
* ومرات (ضُلك) ذاتو بتدخل فيهو خُلعة بتخليهو يخاف منك .
* خُلعة ممكن تعمل سكتة قلبية .
* وبما أن ذلك كذلك فإن الهلال قد أدخل في المريخ خُلعة خلتهم (يشوفو آدم سوداكال جمال الوالي عديل) .
* والله صحي .
* لحدي قبل موضوع رمضان عجب كان سوداكال في نظر المريخاب ولا حاجة .
* وبعد (ورطة العجب) سوداكال بقى في نظرهم جمال الوالي .
* خُلعة صعبة شديد .
* وقبل ما نخوض في التفاصيل أنا دايرك أنت كهلالابي (سيد بلد) تعرف حاجات معينة .
* وأنت كمريخابي (بنطلونك ناصل) برضو لازم نوريك حاجة.
* خليك من مباراة القمة وخسارة الهلال .
* شخصياً ومن قبل شهر تحدثت عن عدم جاهزية الهلال الذي عاد ولعب بعد كورونا بدون إعداد.
* وكلنا يعلم أن الهلال يعاني من نواقص كان لابد أن تظهر ويكون لها ثمن .
* وقد كان .
* لكن ده ما الموضوع .
* الموضوع إنو الهلال جعل المريخ يفرح لمجرد أنه جدد عقد لاعب حقه .
* الفرحة التي يعيشها جمهور المريخ الآن بتديك إحساس إنو رمضان عجب كان في الهلال والمريخ سجلو .
* هل تصدق إنو العجب (حق المريخ) ؟
* العجب ما كان في الهلال يا جماعة .
* يعني ديل فرحانين بحاجة حقتهم أصلا.
* الحمد لله وصلناكم مرحلة بقيتوا تفرحوا عشان في لاعب حقكم ما مشى منكم .
* وكمان بتفرحوا بتغريدة لأبو عشرين .
* أبو عشرين طبعا مُفتح جدا ، قبل أسبوع عمل ليهو تغريدة كتب فيها : (لون الدم أحمر) .
* والمريخاب احتفلوا بالتغريدة دي وكأن أبو عشرين هو الذي اكتشف لهم لون الدم .
* أي مريخابي تلقاهو يقول ليك : (أبو عشرين غرد) .
* غرد قال شنو ؟
* يقول ليك قال : (لون الدم أحمر) .
* وأنت فرحان عشان أبو عشرين غرد ولا عشان لون الدم أحمر؟
* في الحتة دي في سؤال .؟
* فرحان بالتغريدة ليه يا تمهيدابي؟
* الظريف لما أبو عشرين كتب كده قام التش خشا عليهو وكتب تعليقاً : (يعني في لون غيرو) .
* فعلا مريخاب والله .
* حصل قابلك دم لونو كُحلي؟
* حصل قابلك دم لونو رمادي ؟
* عشان تعرفهم مريخاب كيف.
* أبو عشرين الذي هو أفضل حارس مرمى في السودان لما عمل التغريدة دي كان قبض من الهلال ليهو أسبوع.
* وزي ما قلنا .. محمد الرشيد سجل للهلال قبل ٢٢ يوماً من مباراة القمة وقبض قروشو .
* وأبو عشرين سجل للهلال قبل ١٧ يوماً من مباراة القمة وقبض قروشو .
* ورمضان عجب سجل للهلال قبل ٢٤ ساعة من سفر بعثة منتخبنا إلي تونس وقبض قروشو .
* التلاتة ديل وبالقانون هم لعيبة الهلال.
* مش تقول لي رمضان جدد للمريخ ؟ والله لو رمضان ده على رأس كل ساعة بجدد برضو حق الهلال .
* لو جدد ولو شال العقد حقكم ده وعملوا (بخور ومحاية) برضو حق الهلال.
* وما ينطبق على ولدنا عجب ينطبق على الأخ غير الشقيق محمد الرشيد .
* أبو عشرين الذي هو أفضل حارس في السودان أصلا ثبتكم بي لون الدم ودخل الغرفة الزرقاء.
* خليكم أنتو مع التغريدة.
* عقودات الثلاثي ملزمة وهي عقودات سليمة ولا فيها شق ولا طق .
* ولو في مريخابي من النوع الفرحان بتغريدة (لون الدم) كلموهو إنو الموضوع ده ما زي موضوع بكري المدينة.
* ده موضوع بوديكم حتة بعيدة.
* وأبو عشرين عارف الحاجة دي عشان كده جا براهو دخل الغرفة .
* ومحمد الرشيد عارف الحاجة دي ولحدي مساء الأمس رفض يوقع للمريخ رغم إنو (معتقل عندهم) ومحروس بالدوشكا.
* زول أنت اعتقلتو من بعد المباراة وقعد معاك ٤٨ ساعة .. مالو ما وقع ؟
* حتى لو ود الرشيد وقع ليكم اليوم ولا غدا برضو حق الهلال.
* والله نحن مبسوطين وسعداء جدا بما يحدث في المريخ حاليا .
* خالفين رجل فوق راجل وضامنين أولادنا .
* رفعنا سعر رمضان عجب من ٣ مليار إلي ١٥ مليار .
* ومحمد الرشيد من ٤ مليار إلي ٢٥ مليار .
* اليوم ورغم أن العقد باطل ولكن حتى لو المريخ وقع مع محمد الرشيد سيدفع المريخ ٢٥ مليار لمحمد .
* ضر كده بس .
* وبعد ده ما بيلعب ليكم .
* عقد رمضان عجب هو (عقد عرفي) ما بيقيف دقيقة قدام الفيفا .
* العقد ده بلو واشربو مويتو أو خلوا العجب يتبخر بيهو .
* والله نحن سعداء جدا .. الآن قلبنا صفحة الكاردينال واللاعبين السجلهم الكاردينال وسيبدأ هلال السوباط بقيادة أبو عشرين ومحمد الرشيد ورمضان عجب ومجاهد فاروق وصلاح عادل والطيب عبد الرازق وجيسي وعيد مقدم ومؤيد عابدين وبقية نجوم التسجيلات والقدامى بالفريق .
* و..و..
* ونواصل .