يا متعلمين يا بتوع الفيفا واللوائح (التمديد) ما بحلكم!!
صابنها
محمد عبد الماجد
يا متعلمين يا بتوع الفيفا واللوائح (التمديد) ما بحلكم!!
· صديقي عصام السنوسي عندما سمع ان المريخ ابرم عقدا مع رمضان عجب في استاد الخرطوم قبل مباراة القمة ، عندما جاء مجلس المريخ جاري للاستاد وهم شايلين العقد…قال لي انت تعال هنا الناس ديل وقعوا مع رمضان عجب في استاد الخرطوم عاوزين يدوه كشك في الاستاد؟
· قلت ليه لأول مرة اشوف لي (عقد) مع (التسخينة).
· وعندما عادوا ونكروا عقدهم هذا وقالوا ان المريخ قام بتمديد تعاقده مع رمضان والرشيد ، قال صديقي : تمديد شنو؟ هو رمضان عجب دا (مقاول) ام (سمسار) عشان يمددوا التعاقد معه؟
· كل هذه الاشياء يطلقها المريخ بصورة غير رسمية – لم يجد المريخ في نفسه الشجاعة الكافية للإعلان عن هذه الخطوات.
· يخشوا نشر هذه العقود ، بل يخشوا حتى نشر صور اللاعبين – عشان الفيفا ما تجيب ليهم الكلام.
· والله ورطة.
· والله مدرسة.
· ويا متعلمين ويا بتوع الفيفا دا (تمديد) ولّا موش ما تمديد؟
· مزمل ابوالقاسم في المريخ اعطوه كوم (كمونية) وقول ليه اثبت لينا ان الكمونية دي لحمة صافية.
· مزمل بعملها.
· بقول ليك نفس الكلام.
· نفس الحنك.
· طالما ان هذا الامر في مصلحة المريخ – ما برمش.
· بقول ليك الفيفا قالت.
· واللوائح.
· والقواعد.
· ونفس هذه المواضيع عندما لا تكون في صالحه بكون مزمل في الجهة الاخرى.
· اعتقد ان امام الهلال فرصة تاريخية لتلقين المريخ درسا لن ينساه طول حياته.
· مددوا على راحتكم.
· نحن معاكم لغاية (التطبيع).
· تذكروا عندما تعاقد الهلال مع جمال سالم.
· تذكروا المريخ قال شنو؟
· المريخ اكد ان تعاقد الهلال مع جمال سالم غير قانوني.
· وطلع مزمل ابوالقاسم في الاذاعات والفضائيات يؤكد ان عقد جمال سالم مع المريخ لم ينته بعد.
· نشروا ليهم عقد مع جمال سالم وقطعوا فيه بان اللاعب لاعب للمريخ.
· بعد الكلام دا.
· والقسم والحليفة والطلاقات اين لعب جمال سالم؟
· خلوه جمال سالم.
· المريخ عندما تعاقد مع لاعبين من البرازيل اكد صحة تعاقده مع اللاعبين ونشر صورهم وادخلهما معسكر مع الفريق وتمرنوا مع اللاعبين وسافروا معه الى الامارات ، وفي كل خطوة من هذه الخطوة كان بأكدوا ان اللاعبين رسميا في المريخ.
· عليك امان الله ما شفنا من البرازيليين الاتنين غير عقوبات فرضتها الفيفا على المريخ.
· طيب في الحتة دي وبدون انفعال …خلونا اقول ان المريخ تعاقد مع اللاعبين البرازيليين دون ان يقبل اتحاد الكرة او السيستم اللاعبين بسبب عقوبات الفيفا للمريخ بالحرمان من التسجيلات.
· مع ذلك الفيفا عاقبت المريخ على هذا (التعاقد) ومنحت اللاعبين حقوقهما التى نص عليها العقد.
· يا متعلمين يا بتوع الفيفا دا عقد ولّا موش عقد؟
· اذا فعل الاتحاد الدولي لكرة القدم ذلك مع لاعبين وقعوا مع المريخ ورفضهم السيستم ماذا سوف يفعل الاتحاد الدولي مع لاعبين وقع معهم الهلال في فترة السماح وقبلهم السيتسم؟
· والله يا مريخاب الكلام دا احسن تطلعوا منو.
· ونسة الواتساب.
· وكلام البكيات.
· وتنظيرات مزمل ابوالقاسم ما بتمرقكم.
· من الافضل ان لا يدخل المريخ في تحدي مع الهلال في معركة خسرانة.
· يا متعلمين يا بتوع الفيفا الكلام دا بجيب ليكم الهوا.
· يا متعلمين يا بتوع الفيفا انتوا الكلام دا ما قدروا.
· جهابذة المريخ بقيادة مزمل ابوالقاسم وكوراله الذين رفضوا (التمديد) لمجلس سوداكال ، خرجوا علينا بنكتة جديدة ، يلعبون بها على العقول ويوهمون بها انفسهم ، عندما اهتدوا الى طريقة حسبوا ان تخرجهم من الورطة التى ادخلوا فيها اللاعبين وادخلوا المريخ نفسه.
· خلاص يا عباقرة.
· خلاص يا فلافسة.
· حلتوها.
· اولئك الجهابذة الخاطرين والحافظنها والعارفين أي شيء في القوانين واللوائح قالوا ان المريخ قام بتمديد عقوده مع رمضان عجب ومحمد الرشيد.
· طبعا هذا الكلام ممكن يكون فصل عادي من مسرحية (المهرج) للكاتب السوري محمد الماغوط ، ويمكن ان يكون رمضان والرشيد انفسهما (شاهد ما شافش حاجة).
· في الصحافة الرياضية ممكن تطلق (الكذبة) ثم تصدقها وتكون انت اول ضحاياها.
· هذا ما فعله اعلام المريخ في سبيل (التخدير) الذي يتبعه مع انصار النادي.
· الغريبة في ناس بصدقوا الكلام.
· ربما العواطف الرياضية والانتماء دائما ما تجعلك تصدق أي شيء في صالح فريقك.
· في الوقت الذي ترفض فيه قبول أي شيء لا يأتي في هواك.
· الكلام دا طبعا بالنسبة للمريخ وبالنسبة للهلال.
· صحافة المريخ خرجت علينا امس وهي تظن انها جابت الذئب من ذيله عندما قالت ان (التمديد) لعقود الرشيد ورمضان عجب سوف يجعل وضعهم القانوني مع المريخ صحيح.
· فالحين.
· خطرين انتوا.
· دعونا نقول اولا ان ذلك الامر هو اعتراف رسمي من مجلس المريخ ببطلان (العقود) التى ابرمت مع لاعبي المريخ.
· وهو محاولة للتحايل على العقود التى وقعها الهلال مع اللاعبين.
· تخيلوا ان المريخ اصبح يبحث عن ثغرة و (تمديد) بعد ان قطع عليه الهلال الطريق.
· الهلال ادخلهم في مدرسة.
· دخلهم في (فتيل).
· الناس البيسمعوا عن (الفتيل) وما عارفنو …نقول ليهم لو عاوزين تعرفوا الدخول في الفتيل كيف؟ انظروا للمريخ الآن.
· الامر الثاني والذي نوجهه للمريخاب هو كيف لمجلس المريخ ان يمدد عقود لاعبين انتهى تعاقدهم مع المريخ منذ شهر مايو – التمديد يأتي في وقت يكون فيه العقد ساريا.
· أي تعاقد اخر بعد انتهاء التعاقد مع لاعب لا يسمي (تمديد) – وانما يسمي عقد جديد.
· انتوا كدا بتمددوا (عقد) منتهي وهذا يعني ان اللاعبين احرار الآن.
· بتمدد ليك حاجة انتهت – والله دي ما سمعنا بيها إلّا عندكم.
· راعي الضان في الخلا عارف الكلام دا.
· الموضوع دا ولا عاوز ليه عبقرية.
· ولا دائر ليه درس عصر.
· الامر الثالث وهو كيف للمريخ ان يمدد عقود لاعبين وقعوا مع نادي اخر.
· التمديد هنا في صالح الهلال الذي تعاقد مع اللاعبين.. يمكن ان يمدد الهلال مثلا معهم عقوده من 3 مواسم الى 5 مواسم.
· ويمكن ان يقبل ذلك (التمديد) لو انه تم قبل تعاقد الهلال مع اللاعبين..وقبل انتهاء عقود اللاعبين مع المريخ.
· يمكن ان يقول قائل ان المريخ ربما قام بتمديد العقود بتواريخ قديمة قبل تعاقد الهلال مع اللاعبين وهنا يمكن الرجوع للسيستم لمعرفة النادي الذي سبق الاخر في التعاقد مع اللاعبين.
· الموضوع دا بدخلكم في حتة ضيقة.
· اضيق من الفتيل.
· المريخ يعيد بهذا (التزوير) قصة بصمة علاءالدين يوسف.
· انتوا براكم بتجيبوا الكلام لي روحكم.
· كمان ظهر فيها (تزوير).
· كل هذه الاشياء سوف تثبتها الايام القادمة وسوف يسترد الهلال حقوقها كاملة ، وسوف يرجع لاعبيه اليه.
· ولن يفلت المريخ بهذا (التحايل) و (التلاعب) و (التزوير) والذي يمكن ان يزيد العقوبات على المريخ وينزل به الى الدرجة التانية.
· الايام سوف تثبت ما نقوله هذا – وحتى وان كان هناك تعاطف وتهاون من الاتحاد السوداني مع المريخ فذلك لا يعنينا في شيء ، لأن القضية سوف تذهب الى (الفيفا) واي تساهل من الاتحاد العام سوف يعرف الاتحاد العام نفسه للعقوبات.
· لذلك اطالب لجنة تطبيع الهلال ان تولى هذا الامر عناية كبيرة وان تستعين بخبراء قوانين ومحاميين دوليين حتى تكون العقوبة للمريخ ناجعة ، توقف تلاعبه في العقود والقوانين بهذه الصورة.
· نحمد الله اننا شاهدنا اخيرا المريخ في هذا (الوضع) ، بعد ان راح عليه الدرب وأصبح النادي الاحمر عاجز حتى من اعلان تعاقده مع لاعبيه السابقين او نشر حتى صورهم.
· هذا عجز عجيب يعيش فيه المريخ وتلك دروس قاسية يلقنها الهلال للمريخ.
· اظن اننا اخدنا كل حقوقنا من المريخ عندما شاهدوا لاعب المريخ السابق رمضان عجب اللاعب الملتزم والخلوق يوقع مع الهلال ، ويسعي اليه.
· سعداء ان نشاهد المريخ يدفع (24) مليار في لاعب كان يمتلكه المريخ وكان يلعب بين صفوفه.
· سعداء بهذا الوضع الذي جعل النوم يطير من عيون المريخاب وهم لا يعرفون ماذا يفعلون؟
· المريخ عرف الطفأ النور منو؟
· ولسه للدروس بقية.
· لم ينته الدرس بعد.
· يا متعلمين يا بتوع (الفيفا) ما كنتوا عاملين فيها حافظنها ورونا شطارتكم.
· الفيفا التى كنتم تسعوا لها وتجروا ليها في البتسوي والما بتسوي الآن سوف تعاقبكم عاقبا يبقى للتاريخ.
· انصح المريخ الاعتماد على سيف الدمازين والاتكال على مصعب كردمان ومحمد عباس.
· ناس عجب والرشيد خلاص الطريق اليهم اتقطع.
· ركزوا مع وجدي عوض.
· شوفوا ليكم موضوع تاني.
· هداف الوسيط.
· ابحثوا عن حلول اخرى.
· الهلال لن يتنازل عن لاعبيه – موضوع عجب والرشيد انتهي.
· اقلبوا الصفحة.
متاريس
· ناس الهلال مفروض ما ينشغلوا بهذه الفرفرة.
· كملوا تسجيلاتكم.
· وسط الهلال في حاجة لعزام عادل اخصائي (التفكيك) وكابتن بشير اختصاصي (التركيب).
· الهلال عاوز ليه لاعب وسط يلعب بقدمه الشمال – ولا يوجد افضل من عزام عادل.
· وعاوز ليه لاعب حوام ولا يوجد افضل من كابتن بشير.
· بوجبا الفنان وياسر مزمل الخطير – الاتنين مفروض يكونوا في الهلال اليوم قبل بكرة.
· انجزوا.
· مباريات البطولة الافريقية سوف تنطلق في 20 نوفمبر.
· وهذا يعني ان ينطلق اعداد الهلال من يوم 2 او 3 في نوفمبر.
· هناك عناصر جديدة تحتاج الى اعداد جيد وتجانس وتفاهم.
· المحترف الكنغولي فيني دا احسن من هسع تشوفوا ليه حرّاس جدد.
· الحراس الشايفهم ديل ما بنستروا قدامو.
· ناس منجد النيل ومحمد عبدالعظيم (الدرس) دا ما ادوه ليهم.
· فيني بكشح القون زي (الطايوق).
· ولا بعاين وراء.
· المحترف المدافع القادم من الوداد يجب ان لا يستعجل الهلال في تسجيله.
· ابحثوا عن الافضل.
· رئيس الوداد اعلن عن تسريح اكثر من 12 لاعبا بعد الخروج من البطولة الافريقية.
· ما تدفعوا ليكم قروش في زول ما بيستحق.
· جيبوا لينا مدافع رابط.
· ………..
· ترس اخير : السيستم جاب ليه (صوت).
مستمتعين بولولتك ولول وجعر وسمعنا جعيييرك مسمار السماني خلاك تنسي حاجه اسمها ثوره 😁😁😁
ابو عبدالماجد استااااااذ الاساتذه يا ليتهم يتعلموا الدروس والمحاضرات التي تتحفنا بها بس تقول شنو الفهم قسمه حفظك الله للاسياد
منتهي الابداع ياود عبد الماجد. اليخماو قام اتفولح وجاب ضقلها يتلولح 😂😂😂. لقد اصيب بالغرور بعد الدغمسة والتزوير الذي كسب به شكوي كاس زورا وبهتانا وساعده في ذلك هوان الكاردمار واستهتار شداد بالشكوي المضروبة. وخلاص افتكر الحكاية ستكون سمن علي غسل علي الدوام ولكن هيهات. يمهل ولا يهمل. يجب علي لجنة التطبيع التمسك بحقوق الهلال وتلقين الكاهن اليخماو وكورال البلطجة والضلال درسا لن ينسوه حتي يعرفوا قدرهم بجانب سيد البلد.
هجام دا مسكين تاعب نفسه مع مزمل تعب شديد ذي محمد كامل سعيد ،
يا اخ محمد منذ اكثر من عقد ونفس الكلام عن المريخ وانو الهلال افضل وانو حاتسجلو زيد وعبيد من المريخ وحتي الان النتيجة صفر كحالكم مع البطولات الخارجية الظاهر ميما الصاوي لسع مولع جواك استهدي بالله واكتب عن اسعار المحروقات احسن ليك
والله انت ممتع وخطيير ………………