يا مزمل سمعت ولّا جابوه ليك؟..!!
صابنها
محمد عبد الماجد
يا مزمل سمعت ولّا جابوه ليك؟..!!
• زمان نحن كنا فاكرين احلى حاجة في الدنيا (الباسطة).
• وكنا فاكرين خلط الزبادي مع (الطحنية) بعد فطور (البوش) شيء منتهى الروعة.
• زبادي بالطحنية لا تكلمني!!
• كنا بنتلم (شلة) عشان نصل الى هذه النتيجة .. ونطلع على كدا.
• هسع كبرنا.
• وفهمنا.
• سمعنا وردي.
• وعثمان حسين.
• شفنا (كأس العالم).
• وشارع النيل.
• شربنا القهوة والشاي.
• وانتظرنا ليلة اكتمال القمر.
• كتبنا شعر في قمر 14.
• قرينا لصلاح احمد ابراهيم ..(ومددت كفي بالسلام .. لكن كفك في الطريق .. ترددت وتعثرت وكأنما كفي حرام).
• قلنا دا شنو دا؟
• نحن نوع دا ما قابلنا.. ولا سمعنا بيه لا في العصر الاموي ولا العباسي.
• سافرنا.
• واتغربنا.
• وسمعنا حسن خليفة العطبراوي وقت يغني في مثل هذه الايام (انا سوداني انا).
• الموضوع دا كان بخلينا ننتل ضرعاتنا .. زي ما بقول الشاعر محمد طه القدال.
• الدوش.
• وحميد.
• تشبع (نضمي).
• تمشي تفحص الملاريا .. تلقاها مافي.
• وكل اعراضها انت عندك.
• الدكتور بقول ليك عملت شنو؟
• بتقول ليه : ابدا سمعت بس للدوش (الحزن القديم).
• يكتب ليك (الحزن القديم) عند اللزوم.
• شفنا حاجات كتيرة.
• ورجعنا البلد.
• وتاني جينا العاصمة.
• الخرطوم دا كان لو كنت ما شايل ليك (قاموس انجليزي) ما بتدخلها.
• شارع القصر لو ما بتتكلم (4) لغات ما بتمشي فيه.
• الدنيا كانت عجيبة.
• وجامعة الخرطوم كانت للناطقين بغيرها.
• ام درمان .. امنا كلنا .. وقت نمشى في شوارعها أي زول بلاقيك بوقفك .. يسلم عليك ويتكلم معاك.
• ويحلف تدخل على البيت.
• الشاي جاهز.
• كل الحاجات دي وقفنا فيها.
• الحلقة الاخيرة من مسلسلات اسامة انور عكاشة.
• وسهرتنا الليلة.
• وحفلات محمود عبدالعزيز في الفندق الكبير.
• والماهية.
• وأول مرتب.
• والسمك.
• والكرسي لازم يكون جنب الشباك في (البص).
• وكباية اللبن الكبيرة.
• والخميس وقت يقع اجازة رسمية .. ما في مدرسة.
• والحصة بتاعة الانجليزي لمن تكون فاضية .. بتشعر انك شلت (كأس العالم).
• وجلابية العيد.
• وحفلة ثنائي العاصمة.
• كل هذه الاشياء … مرينا بيها.
• ووقفنا فيها.
• وكانت بتمثل عندنا قمة الفرح.
• حاجة ما بتخلص.
• لكن بأمانة شديدة.
• ومن غير ما تقعدوا تتغالطوا فينا.
• والكهربة تقطع.
• ما في اجمل من انك تشوف الكورة في شباك مرمي الفريق الذي يلعب امام الهلال.
• حاجة ابداع.
• روعة.
• ما في اجمل من القون وقت يكون للهلال.
• امس امام هلال الفاشر .. ياسر مويس عمل رسالة واضحة.
• وقت ما فهموها.
• تاني عمل ليهم رسالة.
• ما وقعت ليهم.
• جاب الثالث.
• كدا وضحت .. وإلّا عاوزين تتغالطوا فينا في (البرد) دا؟
• هو وينو البرد؟
• البرد بقينا نسمع بيه في الجوابات القديمة.
• حليل (البرد).. زمان فانلة السقط .. كانت ثروة قومية.
• زمان (البرد) كان حاجة رهيبة … أي زول بتلقاه ماشي مع الحيطة.
• الناس تفتش في (الشمس) متل الدواء.
• والقراصة.
• والشاي بالزلابية.
• المهم ما تعملوا فيها ما عارفين.
• وما فاهمين حاجة.
• ياسر مويس عملها ليكم واضحة.
• (3) اهداف.
• أي هدف من حتة.
• عشان لو عاوزين تشوفوا ليكم (تأجيل) للقمة تتحركوا من الآن.
• امشوا مجلس السيادة طوالي .. بيأجلها ليكم.
• موش حميدتي جاب ليكم (النجيلة).
• صلاح نمر اكتر زول مبسوط من اهداف ياسر مويس.
• صلاح نمر (اتخارج).
• ارتاح في عضمو.
• يا زول مالك ومال (التلتلة) دي؟
• احسن ليكم.
• اضربوا لي كرشوم .. شوفوه وصل وين؟
• حكمة الله صلاح نمر موقوف (داخلي).
• وبخيت خميس موقوف (خارجي).
• برة.
• وجوة.
• وابوجيبين من استاد لي استاد.
• من كي لي كي.
• الناس ديل قولوا ليهم عزلة السودان (الدولية) انتهت بعد الثورة.
• احمد بيتر .. لا شارك .. لا لعب .. لا عمل حاجة .. برضو الاتحاد الافريقي اوقفه.
• كلموا برهان ومحسن سيد.
• انا خايف برهان بعد (الايقاف) دا يقوم يختار احمد بيتر في المنتخب.
• ما في زول كان ضامن مكانو في المنتخب الوطني اكتر من احمد بيتر.
• بيتر وقف.
• شوفوا ليكم (نغمة) تانية يا برهان.
• نحن فترنا من الكلام الكتير.
• فترنا من الشرح.
• لمن الموضوع جاء من فوق.
• جاء من الاتحاد الافريقي.
• نرجع لمباراة الهلال وهلال الفاشر.
• المباراة في الشوط الاول وترتنا.
• قدر ما نتحرك ونعمل الكورة ما تدخل.
• مرة ما يحسبوها.
• ومرة تدق في العارضة.
• لمن ياسر مويس نزل في الشوط التاني بي فهم تاني.
• القون بجي .. بجي.
• انتوا ما تستعجلوا.
• نحن ما استعجلنا.
• بس ناس هلال الفاشر صدقوا.
• قعدوا يتكتلوا فينا.
• ويدافعوا.
• تقول في كأس العالم.
• لمن ياسر مويس (رفع الجلسة) ونطق بالحكم.
• الكلام دا وقع ليكم يا ناس المريخ؟
• ولّا اقول تاني؟
• انا من الصباح بقول في شنو؟
• بقول ليكم افهموها براكم.
• ياسر مويس احسن ما تنسوه بي حالتكم دي.
• لا عندكم مجلس.
• لا عندكم نجيلة.
• قاعدين تعملوا في شنو؟
• ابوجيبين بقى كل مرة يظهر ليهم في استاد.
• زي القمر الصناعي.
• القمر الصناعي علاقتو شنو بالموضوع دا؟
• والله الحوامة التى حامها ابوجيبين على الاستادات كمال ترباس ما حامها.
• كمال ترباس ذنبو شنو؟
• ابوجيبين ذكرني ليك وقت بتكون بتفش ليك في بيت ايجار.
• كل مرة يضرب ليك سمسار .. يقول ليك في بيت فضى.
• طلعوا منو.
• تركب عربيتك وتمشي عليه.
• واي بيت تدخلو تلقى فيه مشكلة.
• بيت ما فيه (منافع).
• يا ما فيه (ابواب).
• او ما فيه (سقف) من الاساس.
• او الموية والنور لسه ما وصلتو.
• يا ابوجيبين … قطر التى نظمت (كأس العالم) الله يسألني ما تعبت زي تعبك دا.
• والله الهلال دا (نعمة).
• الحمدلله.
• نحن ما بنصل لمرحلة (شيل الحال) دا.
• في استاد برندة وغرفتين.
• وفي استاد مكتمل .. وجاهز .. بس سيدو قال ما عاوز يدخل فيه كراع غريبة.
• اسمع يا ابوجيبين استاد الابيض ما عاوز حاجات كتيرة.
• وفي استاد في ام درمان قالوا ناقص بس (المكيفات).
• مالي زي العاوز ألخبط.
• لخبطت بين الاستاد وبيت الايجار.
• اصلو البعمل فيه ابو جيبين دا يلخبط.
• الحمدلله على نعمة الهلال.
• الهلال رجل صالح.
• نرجع للمباراة.
• اصبروا.
• لمن يكون في ضغط الهدف بيأتي.
• الرغبة والإصرار اهم من تمريرة الهدف.
• الهلال عندو الرغبة.
• وعندو الاصرار.
• نحن تاني ما عندنا مشكلة.
• الهدف سوف يأتي زي ما حدث في مباراة سانت جورج.
• اتسجل في الدقيقة 85.
• ما في زول غضب.
• او جدع ليه قارورة.
• او صبرو نفد.
• خليكم كدا.
• الكلام دا ما للمريخ براهو.
• الكلام دا للاهلي المصري.
• وصن داونز.
• وكل ضحايا المقبرة في السنة دي .. والسنة الجديدة.
• نضحي بالمريخ في نهاية السنة.
• وننتظر الاهلي المصري في فبرائر.
• عشان الكلام يبقى ليكم واضح.
• ليليبو دا يوم بشق ليه (باك) على اربعة.
• كلمتكم.
• ماشي ألحق مباراة المغرب فرنسا.
• نشوف كأس العالم دا .. كل يوم بجينا بفهم جديد.
• والله نحن ذاتو ما عرفنا نتصرف كيف؟
• ونعمل شنو؟
• ………………….
متاريس
• تتخيلوا مباراة امس غاب منها ابوعشرين والطيب عبدالرازق وارنق وصلاح عادل وفارس عبدالله والغربال وجارجو وسنغوني.
• الهلال ما شاءالله عليه.
• والي الدين خضر .. نقل لينا كأس العالم في قناة النيلين.
• الجماعة بفتشوا في القناة المفتوحة .. بوجبا جابها ليهم في قناة النيلين.
• تاني عاوزين شنو؟
• صلاح نمر قالوا مبسوط شديد من لجنة الانضباط.
• يا زول مالك ومال (النجيلة) التركية؟
• الناس ديل لا عندهم مجلس.
• ولا عندهم استاد.
• ولا عندهم هجوم.
• الجابرك على (التلتلة) الفي البرد شنو؟
• هو ويينو البرد؟
• عليكم الله خلوني اقوم ألحق مباراة المغرب وفرنسا.
• امشي اشوف النتيجة واجيكم راجع.
• لو ما رجعت … اعرفوا في حاجة كبيرة حصلت.
• ما بتم ليكم العمود.
• ………….
• ترس اخير : فرنسا جابت قون.
بنغلبك حتي لو جينا بالصف
التاني.. المريخ بمن حضر..
لا تعتقد يا محمد عبد الماجد
الناس ديل بيأكلوا قش لجنة
الزفت او لجنة المسابقات
ماذا فعل للهلال الم يؤجل
مباراة الهلال في كاس
السودان لاخر مباراه.. لماذا
خوفا من الهزيمه الخامسه
وبعد ذلك تم تأجيله اونقله
للعام الجديد حتي يتسني
للهلال لملمة اوضاعه..
وبعد دا كله هزم الاهلي
بالجلاله بضربات الجزاء..
الهلال ماشي بالدفره
ومحترفي العليقي ما
فوقهم فائده.. مواسير
بمحترفينك حتكون مغلوب
محليا من المريخ وخارجيا
من الاهلي ومن صن داونز
متل العام الماضي وتحوا
راجعين وساقية جحا تبدأ
تاني من البدايه..
كل سنه بالطريقه دي الي
ان يرث الله الارض وتكونوا
مكوكشين صفركم واثبتوا
فيهو….
يا سلام يا ود عبد الماجد، عمود ذي شية الجمر الشطتها وليمونها وبصلها الأخضر يقولوا يا ليل، ما ذي أعمدة التخدير وتكسير التلج ديك، والأجمل إنه لا فيه (إبتزاز) ولا إساءات لخلق الله….. ربنا يديك الصحة والعافية ويديم علينا وعليك نعمة الهلال !!
حليل جامعة الخرطوم وحليل التعليم ذات نفسه، البقي فيه شهادات تمكينية، وحليل الخرطوم وأم درمان الدخلوهن ناس أبو المستعار !!
الحلامبشة باكين ومجقلبين من المباراة يا ود عبد الماجد، واليومين ديل الموضوع ده خففوا من سيرته، شكلو أدوهم تطمينات بتأجيل المباراة، وإحتمال كبير ينجروا ليهم مسيرة بتاعة فلول في يوم المباراة، وإتحاد اللقيمات خطاب التأجيل بكون مجهزنه في الدرج، وما بعيد يكون كاتبه ليهم الكاهن الأعظم أليخماو 😝😝😝
واااااااي أنا حلمبوشابي !!
عاوزين لينا عمود عن مجموعة حلمبوش يا ود عبد الماجد !!
انت اكيد شارب مصيبة …
انصحك باخد كورس عند دكتور مزمل..
والله كل سنة تقول كلامك دا ويجي المريخ يقوز عليكم ويعفصكم التش رجع وكرشوم رجع والرشيد رجع والجزولي رجع والعقرب رجع وخميس رجع وامير رجع واي واي المشكله كلهم رجعو مع مباراه الهلال غايتو حظكم كعب