يعني ننفصل ؟!!!!

في السلك

بابكر سلك

يعني ننفصل ؟!!!!

*المتابع لمسيرة وسيرة منتخب سلة دولة جنوب السودان الشقيقة الحبيبة الحنينة
*تلجمه الدهشة
*ويثور بدواخله سؤال
*معقولة ديل كانوا معانا في دولة واحدة؟
*كل هذا الابداع والفن كان قاعد في بلدنا ولم نكتشفو؟
*جميع هذه القامات الابنوسية السامقات كانت بين ظهرانينا ولم نراها؟
*وهل تعمي العيون عن تلك القامات الليها ضل؟
*هل كان السودان الواحد اعمي بصيرة ام اعمي بصر؟
*اظن اننا كنا مصابين بخلل في شبكية البصيرة
*نرجسية اعمت بصريتنا عن كل ماهو ممتاز في بلدنا
*لذا كان الاهمال والتهميش
*والغريبة ماكنا نضعه خارج هامش صفحاتنا الغير منتجة
*كان اجود مما نضعه داخل الهامش كموضوع رئيسي
*معقولة بس
*كل هذا الجمال كنا لانعيره اهتماما؟
*معقولة بس في ناس كدة
*فن وغيرة وجمال وقوام وحرفنة وبطولات؟؟؟؟
*ولسة كأس العالم للسلة ياما حانشوف ابداع حد الامتاع
*في باريس
*وفي منافسات السلة
*حيث كان فن جنوب السودان حاضرا
*كان حضور شمال السودان يتمثل في النشيد الوطني الذي تم عزفه بالخطأ
*عله خطأ جاء ليعبر عن اخطاء كثيرة
*اولها خطأ شق الشعب الواحد
*وثانيا خطأ سوء ادارتنا للشأن الرياضي الذي عجز عن الوصول بكرة السلة للمستوي الذي وصلت له سلة جنوب السودان الحبيب عالميا
*عشان كدة كنت دايما بقول القصة ماقصة موارد طبيعية
*القصة قصة ادارة تخلق و تستفيد من الموارد البشرية
*فاليابان لاموارد طبيعية فيها
*ولكنها صنعت كوادر بشرية اعتلت العالم في مجالات الصناعات والتكنلوجيا والاقتصاد
*حسن الادارة عندهم ارتفع بالارادة فاصبحوا كما نري
*ونحن لسة بنرفل في سوء الادارة وضعف الارادة الذي اوردنا حروبات وخلافات وتخلف وتعنصر ونرجسيات كبلت الغير ومنعته من المشاركة في بناء الوطن
*فينا ناس يقتنعون بانهم خلقوا ليحكمونا ويتحكموا فينا
*نرجسيون فرز اول
*وناس مقتنعين بانهم ما خلقوا الا ليحكموهم ويتحكموا فيهم الناس المقتنعين بانهم ما خلقوا الا ليحكموا الناس ويتحكموا فيهم(احساس بالدونية وعدم ثقة بالنفس صنعه النرجسيون في نفوس الشعب فساقوه بالخلا)
*فكانت الخيبات والفشل وسوء ادارة الدولة الذي ولد ضعف ارادة مواطن اكتفي بالفرجة وارتضي الفشل في كل المجالات بما فيها المجال الرياضي والذي يعتبر المتنفس الوحيد لشعب مقهور ومجهول ومجهل(بضم الميم وفتح الجيم) اغلب حقب الزمان فاضحي في خطوطه العريضة جاهل ومرات بتجوهل براهو
*ما علينا
*لكن نرفع القبعات وندمي الاكف وتبح الحناجر لمنتخب جنوب السودان لكرة السلة
*وللقائمين علي امر الرياضة بدولة جنوب السودان الحبيبة
*وللعداء الجنوب سوداني الذي اتي بالذهب
*لاجابو من جبل عامر
*لا من دهابة ابو حمد
*ولا من اسواق دبي ولا هربوا عبر مطار الخرطوم باشراف نافذ
*ولكنه اتي به عرق جبين من مضمار عالمي تتشرف دولة جنوب السودان برفرفة علمها به
*ويتشرف المضمار العالمي بدولة جنوب السودان التي ذادته القا وجمالا
*اما نحن
*فخلونا نتصارع علي المناصب
*دعونا نحفر لبعضنا
*فنحن دولة لا تصنع من فاشل ناجح
*ولكننا نبدع في صناعة الفشل من النجاح
*نفشل ناجح ونعض بالبنان علي المناصب مما يجلب المصائب لهذا الشعب
*غيابنا عن مضمار المنافسات العالمية رياضيا
*اليس مصيبة؟؟؟؟
*اللهم اجرنا في مصيبتنا يا الله
*ايها الناس
*ان تنصروا الله ينصركم
*انصروهوا يا اهل الله
*خلونا نتفكه
*اها
*نجي لي شمارات والي الخرتوم
*والينا
*ليل نهار حايم فينا
*متين للاولمبياد تودينا
*ولا ماشغلتك يا اخينا؟
*يعني نمشي برانا يا والينا؟؟؟؟؟
*ننفصل عشان ننجز ولاشنو قول لينا؟؟؟؟
سلك كهربا
ننساك كيف والكلب قال لما اختلفتوا داخليا قسموهوا وانفصلوا يمكن تلتقوا بالاولمبياد هناك واهو برضو لقاء
والي لقاء
سلك