2020 .. برشلونة خسرت بالثمانية ليفربول بالسبعة ويوناتيد بالستة والمريخ فاز بالممتاز 2018 عن طريق (كاس) عام 2020 الله يتمو لينا بالسلامة – شفنا العجب في هذا العام.
صابنها
محمد عبدالماجد
2020 .. برشلونة خسرت بالثمانية ليفربول بالسبعة ويوناتيد بالستة والمريخ فاز بالممتاز 2018 عن طريق (كاس)
· عام 2020 الله يتمو لينا بالسلامة – شفنا العجب في هذا العام.
· ما عاوز اتحدث ليكم عن (كورونا).
· ولا عاوز اتحدث عن الامطار والسيول الفيضانات.
· ولا عاوز اتحدث عن الاعزاء الذين فقدناهم في هذا العام.
· ما عاوز اتكلم عن الصفوف والحمي النزيفية.
· كل هذه الاشياء ما عاوز اجيب ليها سيرة.
· عاوز اقصر الحكاية على الرياضة…عشان ما ندخل في حتة تانية.
· في 2020 – خسرت برشلونة من بايرن ميونخ في دوري ابطال اوروبا 2 / 8.
· والله نحن (التمانية) دي في جداول الضرب قاعدين نشوفها كبير.
· في العدد بنقيف في سبعة.
· تمانية دي ما قاعدين نصلها ولا في الحساب.
· في زول كان بتخيل برشلونة في وجود ميسي تخسر بالتمانية.
· ليه؟.
· الحكاية شنو؟.
· الدنيا دي حصل فيها شنو؟.
· والله ناس بايرن ميونخ لو دخلوا للمباراة دي بتاتشرات وبمبان مفروض برشلونة ما تخسر بالتمانية.
· عام عجيب.
· ميسي لو قعد في المقصورة مفروض ما يخسر بالتمانية.
· مقصورة شنو؟.
· ميسي لو قعد في بيتو مفروض ما يخسر بالعدد دا.
· عام تخسر فيه برشلونة بالتمانية – اعملوا حسابكم منو؟.
· ما في زول يمشي في طرف الشارع – عادي في الايام دي يدخل فيك قندران.
· ما في زول يمشي البحر.
· او يهبض ليه مفتاح كهربة.
· الحاجات بقت ما مضمونة.
· و2020 دي عاوزة ليها سبب.
· بتلكك.
· المضحك بعد الكلام دا في ناس زعلانة عشان المنتخب السوداني خسر بالثلاثة امام المنتخب التونسي.
· في ناس اتكلموا عن صلاح نمر.
· وفي ناس اتكلموا عن اكرم الهادي سليم.
· ولديل وديل …نقول ليكم برشلونة خسرت بالتمانية.
· تاني ما في زول يتكلم في الخسائر.
· الموضوع دا بقى عادي.
· بحصل في ارقى العائلات.
· نحن زمان كنا وقت الهلال يخسر بالخمسة والستة في تونس …ما بنطلع من البيت.
· نخلي الشارع والسوق.
· ونخلي الاكل.
· والنوم يطير من عينا.
· وقت المريخ خسر بالسبعة من الوحدات الاردني ما خلينا ليهم صفحة يتقلبوا عليها.
· شلنا حالهم.
· واكلنا لحمهم.
· واي مريخابي عاوز منو قروش رجعها ليك طوالي.
· واي مريخابي هو العاوز منك قروش خلاها ليك.
· يشيلها منك كيف مع (السبعة) دي.
· في ناس في الدنيا دي اصلو ما بعملوا ليهم (شاحن موبايل)…متعتهم في الحياة دي بس يشحنوا موبايلاتهم من شواحن غيرهم.
· الواحد ما بطوق للشحن طعم إلّا اذا كان بشاحن موبايل زول تاني.
· في ناس اتعودوا كدا.
· اصلو ما بعملوا ليهم شاحن موبايل.
· عندهم شاحن الموبايل عيب وما ضروري …وممكن تشحن موبايلك من أي زول.
· في ناس عربيتهم اصلو ما بشيلوا فيها (عفريتة).
· متعتهم في الحياة دي يشيلوا عفريتة جارهم.
· هسع الكلام دا دخلوا شنة بالسبعة بتاعة الوحدات.
· ما عندو علاقة – حبيت اقول ليكم الكلام داو اوصل ليكم المعلومة دي عشان الكلام يبقى ليكم واضح.
· وعشان في زول مكرهني في شاحن موبايلي.
· وعشان ما في زول يتكلم ساي.
· في ناس الواحد لو ركب معاك في عربية يقول ليك عندك شاحن عربية.
· ما عاوز يضيع الفرصة.
· في الدوري الانجليزي وفي يوم الاحد 5 اكتوبر الماضي خسر ليفربول وهو حامل لقب الدوري الإنجليزي الممتاز بسبعة أهداف لهدفين أمام واحد من الفرق المتوسطة بالبطولة المحلية وهو أستون فيلا.
· قلت ليكم اعملوا حسابكم من 2020.
· ما تمرقوا ساكت.
· في 2020 (البحر) جانا لغاية البيت…وما عاوزين ليفربول يخسر بالسبعة.
· منذ عام 1967 لم يخسر بطل الدوري الانجليزي بهذه النتيجة.
· في 2020 خسر ليفربول 2 / 7.
· وعاملين لينا فيها شفوت.
· وكلوب.
· ومحمد صلاح.
· وماني.
· والله نحن (السبعة) دي وقت خسر بيها المريخ في الاردن – المريخاب ديل سنة ونص ما في زول فيهم رفع رأسو.
· الغريبة أي زول سافر للعلاج في الاردن بعد الخسارة دي جاء راجع في صندوق.
· الكلام دا وقتها – عشان لو في ناس سافروا الآن قلبوهم ما تطير ساكت.
· أنا بتكلم في العام الذي خسر فيه المريخ.
· الموضوع في 2020 ما وقف عند برشلونة وليفربول باعتبارهما افضل الاندية الاوربية في السنوات الاخيرة.
· الموضوع لحق بمانشيستر يوناتيد الذي خسر بالستة.
· في نفس يوم خسارة ليفربول وفي الدوري الانجليزي ايضا تلقى مانشيستر يونايتد أقسى هزيمة للنادي في حقبة الدوري الإنجليزي الممتاز لكرة القدم بالخسارة 6-1 على أرضه أمام توتنهام.
· الحكاية شنو؟.
· عاملين لينا فيها (انجليز) وما بتتفاهموا مع زول.
· لكن يا جماعة اذا برشلونة خسرت بالتمانية وبطل الدوري الانجليزي الذي يعتبر افضل فريق في العالم الموسم الماضي مع بايرن ميونخ خسر بالسبعة غريبة يعني على يوناتيد يخسر بالستة.
· بقت على يوناتيد يعني.
· كل هذه الاشياء اعتقد ان السبب فيها ما حرّاس المرمى …ولا خط الدفاع او الحكام.
· كل هذه الاشياء السبب فيها 2020.
· 2020 سنة ممكن يحصل فيها أي شيء – الله يحفظ الناس …ويعدي لينا باقى الايام دي بخير.
· السنة كلها باقى ليها 78 يوم – الله يمررها علينا وعلي السودان كله بخير.
· ان شاءالله ما تشوفوا فيها حاجة كعبة.
· سنة مشقلبة.
· السنة دي اصلا انا من البداية عرفتها ليكم سنة ما اعتاديه.
· سنة ما طبيعية.
· تتخيلوا في السنة دي المريخ فاز بكاس الدوري الممتاز 2018.
· بدون ما يلعب.
· ومن غير تعب.
· دوري 2018 المريخ فاز بيه بقرار مكتبي من محكمة (كاس) ليتم تتويج المريخ باللقب في 2020.
· دي قبل كدا لاقتكم في حتة.
· سنة اصلو ما فيها خير.
· الله يستر.
· انتوا فاكرين كورونا براها.
· كورونا وكاس.
· هسع مباراة القمة بين الهلال والمريخ في ختام هذا الدوري ممكن تكون فيها نتيجة عريضة.
· اعملوا حسابكم.
· وكلموا الحرّاس من الآن.
· عشان بعيدين ما تتفاجأوا ساكت.
· الظروف ما معروفة.
· وسنة 2020 عاوزة ليها سبب.
· اذا برشلونة خسرت بالتمانية.
· وليفربول بالسبعة.
· ويناتيد بالستة.
· والمريخ شال الدوري الممتاز 2018 من غير ما يلعب وينتصر.
· يبقى الغريب شنو تاني.
· ما في حاجة غريبة في 2020.
· اعملوا حسابكم.
· وما تطلعوا ساي.
· 2020 دي ممكن يحصل فيها أي شيء.
· ما في شيء غريبة في 2020.
· كله جائز.
· كله ممكن.
· وان شاءالله الناس والبلد بخير وسلام وصحة وعافية.
· ……………
متاريس
· ارنق مدافع هلال الساحل كل من شاهده اشاد به وتوقع ان يحقق نجاح كبير مع الهلال والمنتخب في السنوات القادمة.
· العناصر الشابة والقادمة من اندية التأهيلي والدرجات الدنيا نجاحها مضمون.
· يا ريت مجلس الهلال ينتبه لشاب مبدع اخر في الخرطوم الوطني اسمه عزام عادل.
· وهناك ايضا يوسف فداسي.
· هذه العناصر يمكن ضمها للهلال تحت السن بعد ان تم رفع الكشف الى 30 لاعبا بشروط معينة.
· اذا نجح الهلال في التعاقد مع لاعب الزمالك المعار سيسيه سوف يحدث نقة كبرى في ملف المحترفين في الهلال.
· الفيفا فرضت غرامة على الزمالك بقيمة مليون يورو.
· يمكن للهلال ان يستفيد من هذه الظروف التى يمر بها الزمالك ويقنع ادارة الزمالك باطلاق سراح سيسيه للهلال.
· طبعا دفع مبلع مليون دولار في اللاعب امر مفروض وغير مقبول.
· اذا لم ينجح الهلال في التعاقد مع سيسيه المبلغ الذي اخرجه مجلس الهلال للصفقة يمكن ان ينجز صفقة جيدة للهلال.
· مصر ودول شمال افريقيا بيرفعوا السقف.
· سيسيه عندما كان يلعب في نادي اسوان لم يكلف النادي 10 الف دولار.
· وعندما اشترى الزمالك اللاعب من اسوان لم يدفع فيه اكثر من 50 الف دولار.
· عشان كدا الحديث عن مليون دولار او نصفها امر لا يدعمه منطق ولا عقل.
· التركيز في العناصر المحلية افضل.
· الساحة الآن فيها عناصر ممتازة.
· مع عناصر الخبرة المرصودة اتمني ان يركز مجلس الهلال على العناصر الشابة التى تلعب في عدد من الاندية.
· ياسر مزمل هو المهاجم الافضل في الساحة الآن.
· والي الدين خضر بوجبا هو لاعب الوسط الافضل في الساحة الآن.
· تعاقدوا مع هذه الاسماء ثم انطلقوا الى الصفقات الاخرى.
· عزام عادل لاعب مهاري وصغير في السن وبيلعب بقدمه الشمال.
· تتخيلوا امام مريخ الفاشر لعب الهلال بتشكيلة لا يوجد فيها لاعب واحد يلعب بقدمه الشمال.
· فارس كان موقوف.
· وسليم مصاب…وكذلك بويا.
· ومحمد موسى في الكنبة.
· لهذا نحن نشدد من ضرورية التعاقد مع تمبش لاعب الامل والمدافع الذي يلعب بقدمه الشمال.
· وعزام عادل ايضا لاعب وسط يلعب بقدمه الشمال ويحتاج له الهلال.
· اتاحة الفرصة للشيخ محمد والاستفادة من قدمه اليسار في هذا الوقت امر لا بد منه…في ظل الندرة التى يعيشها الهلال في اصحاب اللعب بالقدم الشمال.
· كابتن بشير لاعب حركي وجوكر وبيلعب في اكثر من خانة وجوده في الهلال ايضا مهم.
· ……..
· ترس اخير : قالوا عاوزين يرفعوا الدعم – لو رفعوا الدعم تمرين المريخ تاني بكون فيه خمسة لاعبين فقط.
يا ود عبد الماجد كلامك ده لو عينة أبو المستعار المندلاوي فهموهوا بيركبوا الشارع، ولو ما نخاف الكضب طوالي بطب ساكت ويدخل الإنعاش، أسي في داعي تقول جملة شفنا “العجب” دي؟ الجملة دي لو فهموها المرخرخين جملة مرعبة خلاص !! بس والله خايف إبو المستعار المندلاوي بكدويته الكبيرة دي يكون برضو الشغلانة ما وقعت ليهو هههههههه
ضربة في الأنكل والله !!