البطريق

في السلك

بابكر سلك

البطريق

*تم اعلان كلية المنتخب الجديدة
*أعني كلية المنتخب السياسي
*والذي يشبه المنتخب الكروي
*فكورتنا بتشبه سياستنا وسياستنا بتشبه رغيفتنا ورغيفتنا بتشبه رهيفتنا المقدودة دوماً
*كالعادة نهلل لكل تشكيل جديد للمنتخب
*مع الإبقاء على الكابتن (رغم إنو بكون ما رفع ولا كاس) وتلاتة أربعة من الكلية القديمة
*القصة ماقصة اختيار لاعبين جدد
*وإن كان تجديد الدماء محور مهم في عملية التطور والتقدم أو على الأقل الثبات في الحتة الما قادرين نثبت فيها
*ولكن القصة قصة خطط وتكتيكات تخرج بالمنتخب من القاع في التصنيف إلى مراكز أعلى من القاع
*قبعنا في القاع سنينا حتى ظننا أننا بني قينوقاع
*اقتصادياً في القاع
*سياسياً في القاع
*رياضياً في القاع
*حتى الهلال بصفره تجوز تسميته القعقاع
*إنتاجياً في القاع
*علمياً في القاع
*حتى جنيهنا وسط العملة في قاع القاع
*في أي روليت دولي لا ينافسنا بشر على القاع
*وحينما نخجل
*نغيّر الكلية لنبقى أيضاً في القاع
*لأننا شعب كده
*لا يتنسم القومية على إطلاقها
*نحبها جهوية وقبلية وحزبية
*وننظر للوطن ككيكة يجب على القبيلة أو الجهة أو الحزب أن يكون له نصيب الأسد منها
*الوطن كيكة نأكلها طالما الأقدار رمته تحتنا
*وكلو زول ياكل أكلتو ويفرتق حلتو
*ونسأل
*هل لدينا قناعة بفشل التشكيل السابق؟
*أم أن المحاصصات بالذات بعد توقيع الإتفاقيات أوجبت إعلان تشكيل جديد نزيح فيهو المجال لرفقاء اقتسام الكيكة؟؟؟
*مش قلت ليكم بننظر للوطن ككيكة ؟؟؟؟
*أيها الناس
*ندرك إفرازات عهد الفساد
*ونعرف أنها من مسببات التردي الإقتصادي الذي نعانيه الآن
*ولكن هل هذا مبرر لسقوط المواطن بسرعة الصاروخ في قاع المعاناة وسقوط الجنيه بسرعة البرق في أحضان التلاشي؟؟؟
*مع العلم بأن كلية المنتخب المحلول
*الدولة دي ما قصرت معاها في شئ
*واجهات ووجاهات ومرتبات لو قالوا للواحد فيهم أكتب الدايرو ما بكتب الرقم البقبضو ده
*أيها الناس
*هذه الثورة تحتاح لتلك الثورة
*وإلا
*الفورة مية
*وليبق المواطن مية سنة مستني قيمو
*قوموا لثورتكم يرحمكم الله
*المهم
*البطريق طائر ولكنه لا يطير
*كان دخل البحر تأكله الحيتان
*وكان مرق البر تأكله الفقمة
*وكان مشى الجليد يأكله الدب
*عليكم الله بالصفات دي البطريق ما بشبه
الهلال؟
*طائر وما بطير
*يقوم يدخل المجموعات
*لو قابل تيم من فرق البحر الأبيض تأكله الحيتان
*ناس الترجي والنجم والتطوان
*وكان قابل تيم أفريقي صِرْف تأكله الفقمة
*ناس مازيمبي
*وكان مشى على دول الغابة تأكله الأفيال
*ناس إينمبا والمطرة كابه
*الدور ده أخير البطريق
*ناس صن داونز ديل كرونتهم ذاتها ما زي حقت الناس خليها كورتهم
*المهم
*زمان تمشي السوق تقول بي كم
*يقول ليك مثلاً بي ميه
*تقول ليهو وتاني
*يقول ليك جيب تسعين
*تقول ليهو كتيرة
*يقول ليك جيب ستين وعلي الطلاق ولا من محلها
*أسي تمشي لي نفس الزول
*وتسأل عن نفس السلعة بكم
*هب
*هب ساي في الخيال قال ليك بي ميه
*لو قلت ليهو وتاني
*بقول ليك اشتري سريع لأنها أسي بتزيد
*لو اتلايقت بقول ليك عملت مية خمسة وتسعين
*واذا فتحت خشمك تاني بقول ليك تلتمية ما بتجيبها ليك
*علي الطلاق ولا من محلها
*قلت لي منتخبنا الجديد كيف؟؟؟؟؟؟
*أيها الناس
*أكتب قبل لقاء الشرطة
*أتمنى أن لا تعتقلنا
*اليومين دي ما بنتحمل
*كفانا سهر الجداد المسويهو فينا الأهلي القاهري
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*من أعظم شعارات الثورة لدينا
*عندك خت ما عندك شيل يا أخينا
*يبقى شوفوا ديل منو يا والينا

سلك كهربا

ننساك كيف والكلب قال لما سمعت إنو المعجون بي أربعمية كنت قايلو معجون تركيب القزاز… أتاريهو معجون تركيب المواطن!!!!…. كر علينا
وإلى لقاء