(50) مليار و(8) اهداف وحصة (رياضيات)

صابنها

محمد عبد الماجد

(50) مليار و(8) اهداف وحصة (رياضيات)

• ونحن طلبة كنا ما بنحب (الرياضيات) وكنا بنعتقد ان حصة الرياضيات ما هي إلّا مؤامرة كونية علينا.
• افتكرناهم قاصدننا.
• كنا نظن ذلك – وفي اعتقادنا .. اللوغريثمات دي ما في ليها أي داعي .. وما في زول ممكن يستفيد منها في الحياة العامة.
• لوغريثمات شنو عليكم الله؟
• في زول فاضى ليه لي لوغريثمات في الزمن دا.
• كان عندنا رأي في حساب المثلثات وكنا بنشوف حساب المثلثات كلام فارغ .. وان الاستاذ الذي يقوم بتدرسينا هذا العلم ما عندو موضوع.
• طيعا أي حاجة ما بتفهم فيها بتشوفها حاجة فارغة.
• وما في داعي ليها.
• جدول الضرب كنا بنعاين ليها عشرة عشرة.
• كنا بنزعل من جدول تلاتة شديد.. تقول عندنا معاه تار.
• هسع كبرنا وعرفنا قيمة (الرياضيات) بصورة عامة .. وفهمنا الحاصل… ورجعنا نقدر اساتذتنا.
• يمين ناس جاجو وايمورو بعلموا ليهم في (لوغريمثات) بالطوة.
• لوغريمثات بالطوة دي اول مرة اسمع بيها.
• اللوغريثم يجيك طالع من النجيلة زي (الكديسة).
• ليليبو بعمل في حساب مثلثات بالفرن.
• زي نازل وشيء طالع.
• مرة بعمل في المثلث المتساوي الاضلاع… ومرة المثلث قائم الزاوية.
• المثلث قائم الزاوية ناس صلاح نمر ما بقدروا عليه.
• شيء زي دا انا ما شفت.
• ولا سمعت بيه.
• ناس المريخ قبل مباراة الهلال الاولى امام الاشانتي كانوا معترضين على مشاركة (5) محترفين في المباراة في وقت واحد.
• قالوا كتيرة.
• ناس كرشوم ما بقدروا على الكلام دا.
• بعد مباراة الهلال والاشانتي قالوا مشاركة ثلاثة محترفين في المباراة كتيرة.
• بعد المباراة الثانية مع الاشانتي .. قالوا مفروض الاتحاد العام يمنع مشاركة أي محترف عشان المنتخب الوطني.
• ناس المريخ قنعوا من فريقهم ورجعوا يتكلموا عن المنتخب الوطني.
• لعب الهلال امام سيمبا .. شافوا عيسي رمضان .. قالوا السودانيين العندهم جواز امريكي هم ذاتهم مفروض الاتحاد يمنع مشاركتهم في المباريات الرسمية.
• الناس ديل عاوزين مننا شنو؟
• شافوا روعة استاد الهلال .. قالوا الهلال ما يلعب في استاده عشان (تكافؤ الفرص).
• نجيلة استاد الهلال عملت ليهم مشكلة.
• الجاكومي كب ليه قلاب رملة في استاد المريخ نزل الصورة والخبر في صفحتو.
• الجاكومي لو عمل البعمل فيه العليقي يا ربي كان ح يعمل شنو؟
• قلاب رملة شالوا فيه حال المريخ.
• قلاب الرملة هسع عاوز ليه (الدعم السريع).
• ديل كانوا عاوزين ينسحبوا من الدوري عشان (النجيلة).
• مع ناس ليليبو ديل تاني ما اظن اشوف لي مريخابي في الدوري السوداني.
• في السوق العربي تاني ما اظن اشوفهم.
• ولا شارع النيل.
• بعد تركيب الاضاءة الجديدة في استاد الهلال .. توقعوا ان يشترطوا المريخ ان يلعب الدوري الممتاز (عصرا).
• عشان تكافؤ الفرص.
• الضلمة فيها (تكافؤ فرص) كمان؟
• بعد افتتاح الملعب الرديف .. اتوقع ناس المريخ يقولوا ما في تكافؤ (ملاعب).
• محترفين المريخ التسعة الظاهر مافي رجاء منهم .. غايتو إلّا يستفيدوا منهم في تأهيل استاد المريخ.
• احسن ليكم من (الدعم السريع).
• قالوا ليك مريخابي اصيب بحالة تسمم … ناس الرابطة شالوه وجري على المستشفى .. الدكتور عاين ليه من فوق وقال ليه اكلت شنو؟
• قال ليه : والله يا دكتور ما اكلت أي شيء بس شفت هدف جون مانو.
• اذا هدف جون مانو عمل فيك كدا وانت مشجع .. الهدف ح يعمل شنو في صلاح نمر؟
• الدكتور قال ليه نحن الايامات دي ما قلنا ليكم ابعدوا من الهلال.
• ما في (تكافؤ فرص).
• الدكتور ذاتو قال كدا.
• غايتو صلاح نمر لو قعد يشكى ليكم من (دعاش) ولو النوم طار من عينو ونفسو مرقت من الاكل … اعرفوه شاف ليليبو.
• ليليبو شغال زي (الكشة).
• أي مدافع يلقاهو قدمو بكشو.
• زي المجروس.
• ما شاءالله.
• الصيني لو مشى المحكمة الرياضية الدولية .. وشال ليه مقطع فيديو لمهارات لامين جاجو .. ناس (كاس) منهم وليهم بفسخوا ليه عقده.
• جاجو دا قلت ليكم عاوز ليه عمود براهو.
• اصبروا انتوا بس.
• ما تضيقوا.
• قلنا ليكم زمان نحن أي حاجة عندنا بي نظام.
• قعدتوا تغالطوا.
• تغالطوا زي الفول في الغدا.
• زي سلطة الاسود البجيبوها ليك براها.
• قالوا ليك في مريخاب اجتمعوا ومشوا على مزمل ابوالقاسم .. وقالوا ليه شوف لينا حاجة (نخدر) بيها جماهير المريخ – الناس ديل حالتهم بقت صعبة.
• الناس ديل القعدة غلبتهم.
• والنوم طار من عينهم.
• مزمل ابوالقاسم قال ليهم ادوني فرصة افكر.
• ابوالتفكير ما بتلفت.
• مزمل ابوالقاسم فكر وقال ليهم ما عندكم أي مشكلة .. امشوا اطعنوا في تسجيل الصيني للهلال.
• قالوا ليه علاقة تسجيل الصيني في الهلال شنو بالشيء البعمل فيه ليليبو وايمورو وفكتور وجاجو؟
• مزمل قال ليهم انتوا العلاقة عاوزين بيها شنو؟.. انتوا موش قلتوا لجان الاتحاد العام كلها يسيطر عليها المريخاب.
• قالوا ليه انت يا مزمل قاعد تنسي .. انت براك ما قلت اسامة عطا المنان ومعتصم جعفر مسيطر عليهم (العليقي).
• البرلوم مسيطر على الاتحاد.
• انا اول مرة اشوف لي (برلوم) في الادارة يعمل كدا.
• مزمل قال ليهم والله انا ما عارف … ليليبو دا زي بخلي الزول يقول كلام برة رأسو.
• بابكر سلك قنع من المريخ وبقى يفكر في سان جورج.
• سلك كوّن رابطة مشجعي سان جورج في الخرطوم.
• تتخيلوا باريس سان جيرمان الفرنسي ما عندو رابطة في الخرطوم وسان جورج الاثيوبي عندو رابطة.
• قالوا ليك وقت فريق المريخ وصل اثيوبيا … الضرب ولع .. شيء خبط وشيء قنابل وشيء تفجيرات.
• اثيوبيا ولعت.
• حازم مصطفى قال للاعبي المريخ .. الضرب الحاصل في اثيوبيا احسن ليكم من الضرب البعمل فيه ليليبو في الخرطوم.
• مباريات الهلال الثلاثة امام الاشانتي وسيمبا حققت (50) مليار جنيه.
• في ضرب اكتر من كدا.
• الهلال سجل في المباريات الثلاث (8) اهداف ولم يستقبل الهلال أي هدف في المباريات الثلاث.
• دا ضرب ولّا ما ضرب يا متعلمين يا بتوع المدارس!!
• الكورنر تاني مع ناس فكتور (مستحيل).
• الفريق البحقق ليه (كورنر) على الهلال .. مفروض يضبح.
• الكورنر في الهلال تاني بي نقطة .. وليس التعادل.+
• في مباراة الهلال وسيمبا فكتور طلع احدى الهحمات (كورنر).. فكتور كان عاوز يموت من الغضب.
• عاوز يطق.
• الكورنر مشكلة.
• قالوا ليك الصيني سدد الشرط الجزائي في عقدو للمريخ من شباك المسطبة الجنوبية لاستاد الهلال.
• سدد الشرط الجزائي من شباك واحد.
• طيفور وقت شاف مباراة الهلال وسيمبا وشاهد الجمهور والجوهرة قال عاوز يفسخ.
• هسع ناو.
• قالوا ليه يا زول فسخ شنو ؟ باقى ليك شهرين في المريخ كملهم وتعال.
• الجوهرة ما ح تطير.
• اصبر يا طيفور.. انت ما شايف التش مخندق كيف؟
• بالمناسبة مفروض ناس المريخ يشتكوا التش ما يشتكوا الصيني.
• التش بعد ان اعاد تسجيله للمريخ لم يشارك مع المباريات إلّا في مباريات معدودة.
• من قطر وللهلال.
• غايتو بعد تسجيل التش في الهلال إلّا تشيلوا (تكافؤ الفرص) وتمشوا بيها على (المحكمة الجنائية).. بقى ما في أي (تكافؤ).
• التش وجاجو في تشكيلة الهلال ح يكونوا زي ثنائي العاصمة.
• كلو من البرلوم.
• البرلوم عمل عمايل في المريخ.
• بالمناسبة المريخ بقى ما فيه أي (تكافؤ فرص).
• العليقي رئيس القطاع الرياضي بيباشر عمله من الخرطوم وبشرف على الهلال بنفسه … وابوجريشة في المريخ شغال بالتلفون من الخارج.
• تكافؤ الفرص دي ليه ما بتتكلموا فيها؟
• السوباط جوة البلد … وحازم ما بقدر يدخل للسودان.
• دي (تكافؤ فرص) ولّا ما تكافؤ فرص يا متعلمين يا بتوع المدرس؟
• تكافؤ الفرص بقت على (النجيلة).
• المريخ بقى زي الحكومة يدار من الخارج.
• المريخ يدار من الخارج وبلعب برة البلد.
• وناس مزمل ابوالقاسم حدهم يتكلموا عن قضية الصيني.
• دي قدرتهم.
• ما بقدروا يمدوا كراعهم اكتر من كدا.
• …………
متاريس
• الراقي شيبوب يتابع مباريات الهلال من الملعب.
• ابوبكر الشريف …خير وبركة دائما على الهلال.
• مجلس الهلال يجب ان يلتفت لياسر رحمة.
• ياسر رحمة افضل مدافع في الهلال من تاريخ التحاقه للهلال وحتى وقتنا هذا.
• لا نزيد.
• ولا نقول اكثر من ذلك.
• الغربال مع المحترفين ديل ممكن يشكلوا لينا الحكومة المدنية عديل كدا.
• 50 مليار.
• و8 اهداف.
• وحصة رياضيات.
• مباريات الهلال بقت حصة رياضيات.
• يوم 5 سبتمبر يلعب الهلال امام هلال الساحل.
• عاوزين نشوف الشيخ.
• وامجد قلق في فاصل براهو.
• …..
• ترس اخير : عليكم الله شوفوا الحاجات الغريبة دي .. المريخ في اثيوبيا .. والدعم السريع في استاد المريخ!!