درابه في راس (حيطة) جالوص

نفاج المداد

ابوبكر عبدالله (بيكو)

درابه في راس (حيطة) جالوص

* نعود لمجريات مباراة (الكرتون) التي جرت احداثها سابقا ، ونحن في غاية الاسف والخجل لكوننا باسم الوطن نقدم فريقا بهذه السخافه لدوري ابطال افريقيا ..

* فريق لما يخرج من منطقته الا قليلا ، رغم ان الذي في مواجهته من اضعف الفرق المصريه ، وهو معزور برغم ضعفه لانه يلعب خارج ارضه ولم يكرم الله عليه ولو بهدف خارج الارض منذ انطلاقة البطوله ..

* ولكن اين العذر لمن صدعونا بان فريقهم معجزة ! ولم تنجب افريقيا مثله !
عجبي لهذا التواضع (القبيح) !

* فريق (يتكوم) لاعبيه امام مرماهم طيله المباراة ويعتمدون علي سذاجة خصمهم ، ممن اوقعت بهم الاعيب (القرعه) في طريقهم..

* لم اتفاجأ بكثافة (التلميع) فهي سياسه قديمه يتبعها اعلام (الزناطير) لحجب ضعف مستواهم وتواضعهم ، وعدم ادراك لاعبيهم ابجديات كرة القدم ، وهم في كل مباراة يتحفونا باداء هزيل ومثير للشفقه والسخريه ..

* واتعجب اكثر لمن يفرحون لهدف الشغيل (الصدفه) ، وهو نفسه لا يعلم كيف ولجت الكرة الشباك ، متلفتا يمني ويسار باحثا عن طريق العوده امام مرماه …

* ان كانو يظنون ان (رص) اللاعبين امام مرماهم برغم تواضع الخصوم (تكتيكا) فهم في غاية السذاجة ولا يدركون ابجديات كرة القدم الحديثه …

* مباراة امس الاول احبتي تأسفنا علي مشاهدتها ، فهي مجرد (ضياع زمن) لفريقين كل منهما ينافس الاخر في السوء ..

* (عكل كروي) ورتابه (ممله) واداء باهت ومستوي متدني ،
ظننت للحظه انني اشاهد احدي مباريات (الحواري والازقه) ،

* تلك هي الحقيقه دون اي تزييف او اقنعه ومكياج ، كالذي استخدمه اعلام (الزناطير) وهو (يطبل) لسيد (الزفه) في نفخ (بايخ) وطفولي ومكرر..

* حتي يداري (خيبة) جماهيرهم وصدمتهم في (المحترفين) الذين لم يقدمو ما يشفع لهم تواجدهم (بالخرطوم) ناهيك عن (كنبة الاحتياطي) ،،

* ان ظن البعض ان (اندرزينهو) محترف ! فحق لجماهير (الزنطور) ان تتحسر علي مهند الطاهر صانع الالعاب (الزهبي) الذي تم الاستغناء عنه في ابشع صور (نكران الجميل) ..

* الغزال الذي لاقي من الوصف سابقا والدلال ما لم يجده احد في عصره !
وها هي الايام تدور ! و (فتح عيونك) يا كاريكا (الدور ماشي عليك) ..

* ولا تتمشدق يا (شغيل) فربما تكون (التالي) وحينها ستعلم الفرق جيدا ، بين من يحفظ جميل من سكب له (العرق) داخل الملعب ، وبين من ينكرون افضال من قدمو للنادي ، ولكم في (البرنس) بيان …

حاحه اخيره كده :

اندرزينهو يشيل ويدي الكوره ناس سموحه ! وناس سموحه يشيلو ويرجعوها ليهو (زي الناس البتتعازم علي كباية شاي)

الكوره لو كانت بتتكلم كان خلت ليكم الميدان وقالت ليكم (بطلو العبط البتعملو فيهو ده )

اما (جوليام) ده حكاية تانيه ! انتو متاكدين الزول ده (برازيلي) ؟
يعني لمن مشيتو تجيبهو اتاكدتو منو ؟ ما يكون (صومالي) ماخد الجنسيه !

زول (جاري) المباراة كلها بين (التسلل) و (الدروشه)، ولو بالغ (بتدق) فيهو وطلع (ضربة مرمي)
الراجل ده حد ما لمعوهو ما نفع فيهو !
(جوليام) يثير الرعب !
فعلا (الواسير المصديه) ممكن تنكسر في اي لحظه ومويتنا المافي دي تقطع !

لاعب (درابه) في حيطة جالوص يعني قاااعد ساااي من غير (فايده) ، حبة (مطره) ترميهو !

طبعا اخيرا عرفنا ليه (الكوكي) بلعب بي (عشره) مدافعين) !
اتير توماس براهو محتاج ليهو ثلاثه مدافعين يكونو جنبو لمن (يقلشه) عشان مكسيم ما تبقي عليهو حكاية (جمعه) !

مسعولين من الخير انتو (جمعه) ده لسه قاعد ؟

يوم تسجيلو قال (افوت الهلال امشي وين) ؟
هسه الزول ده يكون مسي وين ؟

نقطه اخيره :

زنطونا العجيب جاب لينا نحن الخجله

قدام الدفاع واقفين صفوف بالجمله

في دوري الكبار لعبوها كورتا خمله

محترفين ضعاف دخلو الكشف بالهمله ..