اعلامنا يصدر مشجعي السودان للخارج ومضيع زمنا وزمنه
?تغريده واتساب?
بقلم : معاذ ابومؤيد✍?
اعلامنا يصدر مشجعي السودان للخارج ومضيع زمنا وزمنه
قلنا راس المال جبان في الإعلام السوداني وخاصه التلفزيوني لكن علي الاقل قدر القنوات العندنا البرامج الرياضية فيها معدومة او أسبوعية
وحتي البرامج البتقدم دي يحفها الخوف وعدم المواجهة وفي بعض الأحيان المجاملة
معقولة ماعندنا برامج بقوه اكشن يادوري ولا كورة روتانا ولا المجلس قناة الكأس ولا مساء الانوار ولا مع شوبير ولو قعدنا نعد التغريدة تخلص والبرامج ماتخلص
يعني نفهم شنو مافي محاورين و مذيعين عندهم الكارزيما للتقديم ولا ماعندنا الاعداد الجيد
المشكلة المادة الصحفية متوفرة وبكثرة لكن حدها صفحات الصحف الورقية وتنتهي علي رفوف المكتبات
معقولة مافي برنامج ليلي واحد يومي يعكس الحال الرياضي بصوره قوية ناس النيلين مجتهدين لكن البرامج ما بنفس القوة المطلوبة للشارع الرياضي
والقنوات المشاهدة برامجها الرياضية ضعيفة جدا ولاترقي لطموح المشاهد
الرياضة كواليسها واساسها الاثارة ونحن كل شي عندنا بارد تلج
الجمهور عايز المتابعة اليومية وعايز تحريك الملفات الصامتة و المنتهية علي اوراق الصحف
معلومة صغيرة
اي مسؤل لايحسن من شغله الا يكون تحت الضغط والضغط الاعلامي هو السيف لقص كل الرقاب المتخازلة والمتسببة في ضياع الرياضة السودانية
لابد من وضع الرياضة والرياضيين ان فوكس والضغط بيولد الابداع
الناس ماشة لي قدام في موضوع شفافية الاعلام ومحاسبة المقصرين
ونحن خايفين من شنو الله اعلم دي كورة ورياضة ماعندها علاقة بالسياسة عشان الناس تتحفظ وتخاف
والسؤال العند الجمهور مباريات القمة منقوله ولا لا
كل زول عايز يتمتع ويشوف معشوقه
لكن الاجابه الله اعلم
معقولة مافي نادي قادر يسوق لمبارياته
ومافي قناة قادرة تسعى لنيل الحقوق الحصرية للنقل وتسوق وتطمن الجماهير بنقل المباريات
والمكاتب الإعلامية للناديين ماقادرة تخت الناس في الحدث اول باول
نحن بعيدين ياناس من العولمة وبعيدين من وسائل التواصل الاجتماعي في نقل الاحداث بالصورة والصوت
مافي اجتهاد مننا والكل منتظر المعلومة
مفروض كل واحد فينا يكون هو الاعلامي والصحفي والناقل للحدث بالصورة عشان المصداقيه في نقل الحدث
ختاما
عايزين نحس انو نحن من دول العالم
السودان كان مميز في كل شي وحاليا نحن نبعد بسنين ضوئية
ونحنا علي المدرج ونتفرج وناس الخارج متلهفين لأخبار السودان وكل مايمسكو ريموت ويقلبو القنوات لايوجد جديد ونسة وفنان ووجوه عبارة عن علبة الوان
راجعوا القبول للقنوات والقصة ماسماحة ولاوجاهة وممكن تراجعوا البرامج المذكورة معتمدة علي السماحة ولا علي الزكاء الرياضي وكيف تصنع الحدث
سماحة جمل الطين مابتصنع لينا دوري جميل ولابتشبع طموحاتنا
والدوريات الخارجية بقت تسرق الجمهور السوداني بالبرامج المصاحبة للبطولة
وجمهور القمه السودانيه والقروبات لم تجي مباريات خارجيه هامه
تدخل القروبات وتكتب حضرنا ولم نجدكم
خلوا الخوف وناقشوا القضايا الرياضية بشكل يومي ومن غير تعقيد وماعيب نتعلم من غيرنا
دورينا دا مابيت بكا ولادوري حواري
انعشوه يااعلاميين بالبرامج المصاحبه واليوميه وخلونا من اقوال الصحف
الحقوا الجمهور دا قبل يتخارج بعقلوا وعيونوا
جمهور الداخل الدوريات الخارجيه تسرق فيه كل يوم
كفاية الهاجروا باجسادهم وبشجعوا في دوريات الإقامة