المدير الشامل مشغلا لينا وتصريحاتكم الكتيرة قددت عينينا
تغريدة واتساب
بقلم : معاذ ابومؤيد
المدير الشامل مشغلا لينا
وتصريحاتكم الكتيرة قددت عينينا
طبعا المدير الشامل دا بيكون الكل في الكل وبيكون عارف كل حاجة ودا بوازي الاعلامي الشامل في عالم القنوات الفضائية ….
طبعا القصة دي ما ناجحة في عالم كرة القدم يا سعادة المدير !!
قلنا ليك زمان ماتكون مشتت كدة وتملأ لينا الدكة ..
اسه كمان جابت ليها تصريحات ونظريات إعلامية !!
معقولة لكن
قلنا الدكة ممكن نكلم المخرج مايجيب صورتك كتير تقوم تشتت لينا الكلام في الجرايد!!
عرفنا كل شى كمان جابت ليها تقيم فني ..
الأخ هيقتا مدرب حراس النصر وحارس كولمبيا سابقا
عشان تدينا لعبة خلفية كدة
هيقتا جازف في كورة بحركة إزدواجية خلفية
انت عايز تجازف لينا بمباراة التاهل للمجموعات ….
غايتو تصريحك مبالغة !!!
كل يوم نقول ياناس التسيير مدير الكرة عشان يفصل العمل ويحلحل مشاكل اللاعبين !!
يظهر لينا المدير الشامل صاحب المناصب الكثيرة بتصريحات تحبط اصغر مشجع !!
**************************
تصريحوا دا لو مخاطب بيه جمال سالم نبشروا انو جمال مابقراء جرايدنا ومابعرف عربي !!
ولو الكلام دا بيخاطبنا نحن الجماهير نقول ليه عفوا الدوائر مشغولة حاليا بمهمات جديدة غير النفرة المالية..
عايز تفهمنا شنو بالزبط
ناس طالعة من فرحة نفرة
عايزها ترجع منكسرة
بتصريحك دا!!
مامكن رايك دا تحتفظ بيه لنفسك
مزعجنا بيه لشنو !!!
ولو رايك دا للإعلام تأكد انو في اعلام موازي منتظر اي سقطة او خبر عشان يشمت فينا..
نحن نسكتهم بأعمالنا ونفراتنا وانت تفتح لينا باب شماتة جديد!!
ولو كلامك موجه لناس التسيير كان ترفع تلفونك وتكلم المجلس ولا ما عندك رصيد!!
**************************
نجي لناس التسيير اها ياجماعة امبارح وصيناكم بالسترة وقلنا ليكم انستروا باقي الشهر دا …
مامكن كل يوم
مضرب لينا لاعب
ومرات مدرب
الدور الجاي منو !!
انتو قايلين الكورة دي بتمشي بالجرورة وبالدين !!
لو مفتكرين دا فريق حلة تكونوا بالغتو!!
دا المريخ عارفين شنو المريخ ..
سفر بالقطاعي وسكتنا
لاعب ومدرب مضرب سكتنا
كمان ياجماعة ماتكترو لينا السكات !!
قدر ما قلنا نقيف معاكم تفشلونا وتحرجونا!!!
وصيناكم واجهوا مشاكلكم بالصدق ،،،
يوم قلتو مباراة سطيف محتاجة لي اثنين مليار الناس اتلمت ودفعت نص مليار ويوم المباراة حتدفع نص مليار تاني تذاكر يعني الناس ماقصرت …
مقصرين معانا مالكم وتتعاملوا معانا بعدم مصداقية !!
مشكلتكم تجيبو الكلام لنفسيكم !!
**************************
تبقي من الزمن خمسة ايام والصور الوصلت للملعب ما تطمن ياناس المنشأت قلنا ليكم لو ماقادرين علي الصيانة افتحوا الباب للقروبات تحت اشرافكم …
تاني عزركم خلو الناس يشتغلوا تحت اشرافكم بدل مربعين يدينكم وتكتفوا يدين القروبات معاكم!!
الناس الايام دي مستعدة تعمل اي شي من اجل الزعيم ماتحبطوها بتعنتكم وتصريحاتكم الإعلامية المحبطة !!
ياشفوت الايام دي البسوا نظارات وما تطالعوا المنشتات
ركزوا في النفرة وفي القروبات …
باقي من الزمن خمسة ايام ماتشتتوا افكاركم بتصريحات عنترية ومستفذة !!
*************************
حنة النفرة ماشالت لسه ولونها كبدى !!
تطلع منكم تصريحات تملأ الصحف بالاحباط والنظريات
حزرنا من الشتل !!
وحزرنا من العنتريات!!
واديناكم العلاج لكن مصرين تجرونا خارج نطاق التعبئة الجماهيرية !!
نحن نبني في القروبات وانتو تهدموا بالتصريحات!!
قلنا ليكم فعلوا المكتب الإعلامي لمحاربة الشتل وتوحيد الخطاب الإعلامي..
لكن نلقاها من وين ولا من وين !!
*************************
ختاما
ارحمونا يرحمكم الله
*************************
ونحن علي المدرج نشجع ونتفرج لكن شكلو المباراة الجاية حنكون في مساطب الدوري الانجليزي المدرج والملعب فاتحين في بعض حنكون الغرفة والصالة فاتحين في الحوش!!
بس بالمناسبة دي ممكن تجيب لينا عقوبات !!
الاتحاد الافريقي مابعرف الاعذار وعندو شروط ومواصفات عايزين تجهجونا ذي موضوع الجماعة والكشافات!!
**************************
همسة اخيرة
ياريس لو مسافر مصر وشايل الرواتب والدولارات عليك الله سوق معاك مساعد مدرب ومدير كرة عشان تختفي التصريحات وكل زول يعرف مهمتو شنو
مدير الكرة مهم ذي الرواتب واحد ومساعد المدرب برضو مهم لكن كدى جيبوا مدير الكرة قبل مباراة الذهاب !!
لخبطه الكيمان في اللحمة ماسمحة عايزين تجبرونا عليها في الكورة!!
اللاعبين ديل ماواحد وماكلهم بيعترفوا بالمدير الشامل !!
وصية لناس التسيير
خففوا الخطاب الاعلامي ووحدوه ماكل واحد فيكم طالع في منبر ويخطب فينا !!
الوقت ماوقت تصريحات وخلق اعذار وتحديات مع اللاعبين الوقت وقت العمل ..
خمسه يوم ماخمسة شهور عشان تعيشونا علي اعصابنا !!
الناس طموحها دوري الابطال عايزين تشفقونا للوصول لدوري المجموعات!!!
معاكم نص مليار وزوعوها علي اللاعبين عشان نحن نرتاح …..
بالله خلونا نركز في نفرة المدرجات لو سمحتوا……
