فلنخلع ذاكرة الاسماك من جماجمنا لجنة ماعندها اي جديد واضافة لمستقبلنا
تغريدة واتساب
بقلم : معاذ ابومؤيد
فلنخلع ذاكرة الاسماك من جماجمنا
لجنة ماعندها اي جديد واضافة
لمستقبلنا
نرجع بالشريط الي الخلف قليلا لنشط الذاكرة ونعمل جرد حساب بسيط من غير اي عواطف او انطباعات ،،،
نرجع من ايام التعين والكلمات التي تم صياغتها لتسربيها للمجتمع المريخي
لجنة تصدت في ظروف صعبة
لاتوجد لدينا اي مشاكل مالية
لجنة تصدت حين هرب الاخرون
جمل منمقة وكلمات سحرت بعض المريخاب وللان يصفقون !!!ومبهورين بنفس الجمل مع علمهم التام بعدم مصداقيتها وجدواها !!!!
••••••••••••••••••••••••••
الفتره مابعد التعين التسجيلات والمدرب والاعداد
نستهلها مع ام المعارك !!!
تخبطات ومعلومات مسربة كل يوم عن تعاقدات وسفريات واستقبال لنجوم ماكانو في الحسبان والمحصلة شنو صفر اي والله صفر
وطبعا المهمه كانت تحت اشراف جون سينا !!
تم الاستغناء عن ايمن سعيد المحترف البلعب في خانة الوطنين لاحظو خانة الوطنين !!!
وتم الاستغناء عن ليبري !!
بيلعب في خانة المحترفين !!
اتخيلو يتم الاستقرار علي عمو كريمو ليكون محترف !!
اسه دا يسموه شنو !!
واشراف التسجيلات قلنا عند منو جون سينا نجم الشباك الاول ،،
وتستمر مسلسل التسجيلات ويظهر فيلم شيبوب الموهوب في نط الحيط!!!
دراما حقيقه ماخيال علمي
اصرت لجنه التسيير عدم لعب الكومبارس ؟؟
فاستخدمت دور البطوله فشتت شيبوب وفاااااااات ،،،
ولجنة التسيير شغالة في الجمهور تطمينات،،
ومرت ساعات وايام وشهور والتطمينات شغالة في موضوع شيبوب وتمارس نفس الهوايه وشعارهم :
(نحن حقنا مابنخليه وسنرفع الامر للفيفا) وموضوع شيبوب في الواقع خلاص مااااات ،،،
والبطل منو لجنة التسيير
انتهى مسلسل شيبوب واشغلونا بمسلسل ودراما اخرى تسجيل الوك وكل يوم مراوغه جديدة
رقم وطني والفيفا واكتمال الاجراءت وفي النهايه الوك سافر جوبا وفات !!!
ورجع وعاد ويشكو لطوب الارض الاهمال والمرارات !!
ودا كلو عشان شنو عشان يمتد الزمن للجلوس اطول فتره ممكنة علي قيادة دفة نادي المريخ،،
يشغلونا بي قصة عشان يلهونا بيها في القروبات والمجتمع المريخ اطول فتره ممكنه
ولمن يشوفنا سكتنا وحنلتفت عليهم او شعروا بشوية حراك في المجتمع المريخي تجاههم اشغلونا بحكاية جديدة وقصة جديدة عشان عمرهم يطول في قيادة المريخ ،،،،
••••••••••••••••••••••••••
جات قصة المدرب
وغارزيتو مدربي
وغارزيتو قاعد
والمجلس يتفاوض معاه
وصوره لغارزيتو هنا وهناك والتخدير حاصل وفجاءه
المجلس يستعرض سيرة ذاتية لبعض المدربين واللوردات
ونسمع بلوك ايمال هو اقوى المدربين واللوردات!!
اتخيلوا بس الماسك الملف منو ارجعوا قليلا وتكتشفوا المفاجاءت!!!
وغارزيتو شتت بعد خداع الناس والقروبات بالمماطله في الاسعار!! وبيع بعض المباريات !!
دا علي صدر الصحف وفي اولى الصفحات!!
مش قلنا ليكم في صحافة صاحبني واصاحبك وادافع عنك ونكون نحن درعك الواقي !!
رحل غارزيتو وخلي فريق عندو ثقافه الفوز خارج الارض في البطولات الخارجية ،،،
وبعديها مسلسل المساعد الوطني وجابو دامر وكتفوه ببعض القرارات وفي النهاية دامر ذاتو رحل فات !!!
والسبب منو المرة دي قولوها براااااكم !!!
وظهر اخيرا برهان فهل نشاهد مناطحه السحاب ام برهان يكون جبل الثباااات،،،
••••••••••••••••••••••••••
بعديها اصبح المعسكر شغل الجمهور الشاغل ،،
وتم اقتراح اثيبوبيا من قبل الشخص نفسه سبب النكبات!!
والبعثة سافرت علي دفعات قلنا مامشكلة امكن حجوزات !!
بدايه معسكر بمباريات ودية
من غير تمارين ولا احماءت ولا كسب لياقة !!!
ونحن حاليا نحصد في الاصابات بسبب غياب الرؤية الفنيةً
ثم استلمت رابطة قطر المهمات ويسافر الفريق لمعسكر في دوحة العرب ،،،،
والمعسكر ماشي في ثبات ومية مية الي في ناس عايزة تقبض وتمشي الامارات !!!
رئاسة البعثه تحرج ناس قطر وتزنقهم جنس زنقات!!
والمحصلة ناس قطر يدفعوا مال عشان غلطات اداراية وحماقة في التصرفات!!!
والسبب منو انتو عارفنوا اكيد ياشفوت المدرجات،،،،
••••••••••••••••••••••••••
جينا للبطولات والمشاركات المحلية والخارجية
مباريات محلية تأجل بسبب معسكرات بوصاية من بعض الكتاب واشادة من التيسراب بافكار الكتاب والمعسكرات تنفذ واتحاد كرة يؤجل ونجى الان تتردم في ضهرنا المباريات !!
وياريت المعسكرات القصيرة كانت بي فوائد او مكتسبات !!
شي تمرد وإضرابات!!
وشي خلافات!!
وشي خلق بلبلة وسط اللعيبة وشلليات!!
ومافي مستحقات
وجون سينا الحكمدار في المعسكر
ومباريات ودية تنسق مع فرق ماعندها مسميات وفقيرة فنيا
دي المعسكرات القصيرة!!
ومين اول واحد بيكون في سلم الطائرة اكيد
جون سينا الهمام ملك التصريحات!!
••••••••••••••••••••••••••
ختاما
حاولنا نستعرض بعض الاشياء في جرد الحساب الأول
عشان الذاكرة لاتمحى ونكون كالاسماك !!
••••••••••••••••••••••••••
ونحن علي المدرج ندعم ونشجع ونتفرج،،،
كجمهور مافي تقصير
لكن كإدارة بقينا مافهمين عندهم نوايا شكلها شنو!!
وجمهورنا دا عندو خطوط
انتو قايلين الجمهور دا شجع من أجل الادارة!!
نحنا مسمين نفسنا شفوت المدرجات يعني ناس الصقيعة ساااكت،،،
لكن عندنا امخاخ تعرف تفرز الصالح من الطالح،،
ونحن اسه فرزناكم تماما وعرفناكم شايتين وين !!
نحن من كتره فرجتنا للمباريات اللاعب من وقوفه للتغيير او دخوله للميدان نعرفوا ماسورة ولا عندو حاجة!!
مواسير اللاعبين عندنا علاجهم
لكن المواسير الادارية علاجها شنو!!
خسرتوا الجمهور بعد كان ممكن تكسبوا اضاعفه !!
استهلكتوا التصريحات الاعلامية والتخدير والجمل المنومة !!
لكن نسيتوا او تناسيتو نحن جمهور مصحصح وواعي وفاهم واجباته،،
وزمان طالبنا برحيل جون سينا وابجضوم حاليا نطالب برحيلكم مجتمعين خلوها لينا في الصقيعه و ضاربها الهواء!!
بنعرف نخليها مخدرة تاني ونقدر نراعي ذرعنا ،،
أرضنا ماحتضيع وتصبح ارض بور
دي ارض المريخ وارض البطولات،،
••••••••••••••••••••••••••
همسة اخيرة
قبل رحيلكم ياريت توضحوا لينا
الايرادات كلها والمنصرفات؟؟
ولو في ديون ياريت نعرفها قبل موسم الشتات!!
وتعويض شيبوب مشي وين
وياريت نعرف منكم عدد الناس الدائنين!!
وياريت تورونا قروش تحويل الرصيد؟؟
لانها لم تورد في تقرير امين الخزينه الاخير!!
وعايزين نعرف كل واحد دافع فيكم كم من المال ياحلوين واحد واحد عشان نعرفكم اقطاب داعمين ولا ناس ونسة ومكنكشين !!
دايرين نعرف بالتفصيل الممل ماسمعنا ليكم دعومات او وقفات !!
اهم شي قروش رعاية شيبوب الحكم بيها الفيفا راحت وين !!
وقروش الشباب الاتسجلوا في الهلال برضو راحت وين ؟؟
نحن ماحبينا نحكها او نسأل منها لكن طالما ناس المعارضة والتجمع قاعدين في جريدة النادي ويصرحوا عن المال وبالخط العريض!!
نحن ذاتنا حنصرح ونملأ القروبات اصلو القروبات راشه اكتر من الصحف بس حبينا نوريكم ،،،
خلونا في فراغ اداري احسن من الدمار المالي!!
خلونا نأكل نارنا برانا وارحلوا بهدؤ قبل واحد مايو !!
••••••••••••••••••••••••••
خارج النص
المريخ مريخ الشعب والشعب هو الجمهور والجمهور هم شفوت المدرجات
الجمهور ساندكم وانتم مستمتعين بتنويع العذاب عليه !!
ساندناكم من أجل الكيان
وانتم ماإحترمتوا الكيان وتاريخه
رسالتنا موجهه لكبار المريخ
ياكبار المريخ لو موقفتوا الان بجانب جماهير المريخ حتقيفوا بتين بعد تشيع المريخ لمثواه الاخير !!
اسمكم مجلس شورى المريخ والمريخ الان محتاج شورتكم ووقفتكم والجمهور الان منتظر كلمة كبار القوم
تاريخ المريخ يضيع والمدرج مليان ضجيج ومتفق علي رحيل السادة الكرام ،،
ياكبارنا المريخ عاصرتوه في كل الحقب هل شاهدتم مثل هذا الضياع !!
المريخ يعاني ياكبارنا ولاعبين متمردين بسبب مرتبات وحقوق
المريخ لم يهضم حق لاعب في السابق الا ماندر والمريخ عالم جميل تعلمنا علي ايديكم حب الزعيم فلاتنزعوا بصمتكم الغير مبرر حب الزعيم من جماهير المدرج
الحوبه حوبتكم ياناس الشورى
والماعندو كبير يشتري ليه كبير ونحن الان نريد شراء صمتكم بتغيير الواقع المرير ،،،
هل سنصبح علي خبر سعيد ورحيل من زبحوا المريخ من الوريد للوريد !!
حلم لمعظم الجماهير
سمعتوا حلمنا ياكبارنا
وسمعتوا حلمنا ياتيسيراب!!
••••••••••••••••••••••••