مجلس الوالي انعش نادينا والنيلين تستهتر بينا

تغريدة واتساب
بقلم : معاذ ابومؤيد
مجلس الوالي انعش نادينا
والنيلين تستهتر بينا

كدي تعالو نتخيل
انو المباراة دي في عهد لجنة التدمير!!!!
نتخيل بس لي لحظات
عرفتو الفرق بين الكاش والنقة والنقاش!!!
دا حالتوا المجلس ماخش العظم ذي رمضان
تميتوا الخيال
شفتو الفرق
قروباتنا كان حاليا حتكون نار منقد وانتقاد وشتائم ومغادرات!!!
عرفتوا ليه كنا ننادي بالرحيل؟؟
عرفتوا قيمة جهاز فني مدرب ومساعد
عرفتوا قيمة مدير كرة هادي ورزين!!
عرفتوا يعني شنوا الروح المعنوية
عرفتوا الاطمئنان عند اللاعبين لمستحقاتهم المالية!!!
القصة ماقصة صورة في الجرايد
ولاقصة تخدير للجماهير انو المرتبات اندفعت
القصة انو اللاعب عارف قيمة المجلس المعاه،،،
دي القصة ياسادة
بين شاي مسيخ وشاي سكر ذيادة
وفي فرق بين شاي لشاي
في لبتون علاق وفي شاي فلت مابنطاق يبقى ليك خشمك مر
دا احساس اللاعبين الان
••••••••••••••••••••••••••
بس ماحننوم علي حلاوة الشاي
وننسي المكملات ناس القرفة والهبهان والنعناع
يامجلسنا ناقصنا كتير
نبتدي من الملابس وشعار الفريق
لايعقل ان يكون دا شعار نادي المريخ!!!!
حنقول العافية درجات
لكن الشعار هو عنوان للنادي
وراحة نفسية للاعب
نمشي قدام حبة
محتاجين مدرب لياقة يخلي اللاعبين في لياقة عالية
عشان كدة وصيناكم سابقا
وحنوصيكم الان
جماهير نادي المريخ
همها التيم بتاع الكورة فقط،،،،،،
زبطوا التيم واعدلوا الكيف
عشان الجماهير باكر معاكم بالمال تقيف،،،،
••••••••••••••••••••••••••
نجي لناس قناة النيلين
معقولة لكن ؟؟؟
انتو جادين الدوري يكون حكر عليكم!!!
دا مستوي نقل مباريات
كل دول العالم حتى لو الدوري مستواه تعبان
بتكون خدمة نقل المباريات كويسة
مصر القريبة دي ماعندهم جمهور
لكن قنواتهم مشكلة اقوى حضور
وتقدر تتفرج المباراة في اكثر من قناة!!!!
الناس كسرت رقاب طباقتهم من اللف الكتير
صواميل الطباقة اتحلجت!!!!
انتو محتاجين ليكم مجلس ذي حق جمال الوالي يعمل ليكم انعاش!!!
لاصورة لاصوت
طيب اسمها قناة كيف؟؟؟؟
قمة الاستهتار بالمشاهدة السوداني!!!!!
ارحمونا يرحمكم من في السماء
الدوري دا شيلوا منوا الاحتمار وبيعوه لشركة انتاج اعلامي تسوق الشارة لاكتر من قناة
بعد داك نحن حرين نختار الاستديو التحليلي العاجبنا
ونختار المزيع العاجبنا
لكن تكونوا انتو مادة اجبارية علينا؟؟؟؟
عفوا قناة النيلين
نحن في عام ٢٠١٦
وشاشتكم في عام مامعروف تابع لياتوا قرن من القرون الحجرية
نقل المباريات غلبكم عديل
حالتو المباراة داخل السودان!!!!!
حسوووووووووا حبة واغلبرا القناة دي اس حاجه تاني انشاء الله تقلبوها صحيفة ورقية،،،،
••••••••••••••••••••••••••
مسك الختام
العايز يستمتع بفريق كرة قدم جميل ساعد بالدعم لو بالقليل،،
ماتكون راقد في سريرك ومربط جيبك ومنتظر بطولة
اعطي الكيان واجبوا عليك
حتى لو جنية
الفرجه والرقاد من غير ماتدفع مابتلموا
••••••••••••••••••••••••••
ونحن علي المدرج ندعم ونشجع ونتفرج
يعني حتى شعارنا مقدمتوا الدعم بعد داك يجي التشجيع والفرجة
لو مادعمت ماتحلم بفريق جميل
ادعم وبعديها نشجع
جنيهك دا من اصل التشجيع
لو مفتكرين التشجيع صفقة وكواريك تكونوا ذي قناة النيلين!!!
تكونوا عايشين في القرون الحجرية!!!
ادعم عشان تحصل ركبنا في الالفية الجديدة،،،،
••••••••••••••••••••••••••
همسة اخيرة
باقي لدعمنا فقط ثماني واربعين ساعة
ندعم قبل القمة بثماني واربعين ساعة
يعني عدد الساعات متوافق جدا
حندعم عشان اللجنة تقدم اجمل ماعندها
وحندعم عشان اللاعبين يقدموا السهل الممتع،،،
دعمنا قائم يوم السبت٢٠١٦/٦/١٨
لن ننكث بالعهد مع الادارة
ونلتزم بوعدنا للوالي رجل الحارة
الالتزام بالعهود من شيم الصفوة
والالتزام بالعهود مامحتاج لية شحدة
البجلس مع الكبار
والبجلس في جلسة رجال
لابد ان يحترم كلمتة معهم
والكلمة كانت من نائب الرئيس
والقسم كان من غير تسيس
يعني الالتزام التزام
النفرة ماشة للكيان ماماشة لجيوب الاشخاص والاعلام
يعني نفرة للكيان
ماعشان الشو والاعلام
رفعت الجلسة
السبت موعدنا في النادي
والسامع يكلم القاصي والداني
••••••••••••••••••••••••••
خارج النص
من كان عهده مع الله واقسم له فليبر بقسمه
ومن كان عهد مع نفسه وللخداع فذلك يحاسب به امام ملك الملوك،،،
لن نتوقف كثيرا امام الاعزار
ولن نتوقف كثير لانو عندنا المهم وهو الكيان،،،
لن توقفنا كلمات اوبيانات
طالما ارتضينا العمل في الحقل العام
المريخ كبير برجاله
ولاكبير علي الكيان مهما كان اسم الشخص،،،
الشهرة والتلميع لن ياتي علي اكتاف الجماهير الغلابة الكادحين
عملك من يتحدث عنك
عملك فقط
وليس الكلام الكتير والمعارك المن غير معترك
جود عملك تنال احترام الاخرين
غير ذلك لن يتوقف قطار الكيان في محطتك وستعتبر (سنده)
ودي يعرفوها ناس السكة حديد المحطات ال(سندة)،،،،
••••••••••••••••••••••••••
# تغريدة طبية

بعد تناول البرتقال او عصير البرتقال
لاتغسل اسنانك بالفرشاة مباشرة
قد يجعل الاسنان اكثر هشاشة
بتاثير الاحماض واحتمالية ان توذي الفرشاة الاسنان
وربنا ينعم علي الجميع بالصحة والعافية
•••••••••••••••••••••••••
# تغريدة مرورية
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع
الصيام يحتاج الي التركيز في الطريق
لاتجعل صيامك يؤثر علي قرارتك اثناء القيادة
قيادتك بامان والتذامك بالتوجيهات المرورية حزام امان لك ولغيرك
لاتسرع فالموت اسرع،،،،،،،،
لاتسجل اسمك في قائمة الوفيات بتهور واستعجال وعدم ثبات
كل السرعة توصلك الي دارك الي السرعة القاتلة،،،،،
••••••••••••••••••••••••••
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطاءنا في يوم من الايام،،،،،،،،
====================