العمل العام ماعايز ليهو بدل ومناصب عملك من يتحدث عنك وليس لسانك

تغريدة واتساب

بقلم معاذ ابومؤيد
العمل العام ماعايز ليهو بدل ومناصب
عملك من يتحدث عنك وليس لسانك

سبحان الله
الشهرة مامحتاجه ليها حلاقة وقطعية وملابس تسر الناظرين
الشهرة لاتبحث عنها يااخي
الشهرة من تبحث عن الرجال
كل شخص يبحث عن الشهرة علية الترجل من العمل العام
العمل العام دا عمل تطوعي فية نكران الذات وانجاز الملفات
تعمل في صمت وتضع بصمتك تاتيك الشهرة زاحفة علي ركبتيها ويشار اليك بالبنان
غير ذلك اجلس ودع الاخرين يعملون!!!
ليس كل ممثل مشهور
وليس كل فنان مشهور
وليس كل صاحب قلم مشهور
وليس كل اداري عندو صيت وهيلمانه
عملك وحدك من يشفع لك عند الاخرين حتى تتقدم الصفوف
( وقل اعملوا فسيرى الله عملكم والمؤمنين )
عمل فقط !!!
الكلام دا للباحثين عن الشهرة
ام الباحثين عن ترك بصمة فحتما يطرقون الابواب والابواب في عالمنا الحديث تفتح بالبصمة
وبصمتك عملك
غير ذلك ستكتب لك علي الشاشة كلمة (Erro)
لانو بصمتك حتكون غير مفعلة لان اهتميت بمنظرك ولسانك ونسيت بصمتك
بصم ياحبيبي
بصم ياصديقي
بصم يااخوي
بصمتك من تفتح لك الابواب
••••••••••••••••••••••••••
الجديد في المجتمع المريخي
ناس تحث بيها عايزة خير
وناس تحث بيها عايزة تقدمنا قربان للغير
المريخ ياناس محتاج حتى انفاسنا
ومحتاج لمالنا
ومحتاج تضحياتنا
المريخ اب شرعي لكل مريخي غيور
ياتطيع والدك وتكون ابن بار
او ماتجي تزرف الدموع عند اقرب مكان
الاب محتاج مننا الرعاية
لانو ابونا
وكل واحد عارف واجبات الابن تجاه ابوة
عشان كدى مامحتاجين وصية لرعاية الوالد المريخي
ابونا المريخ محتاج لرعايتنا
هلموا لتلبية طلباتة
••••••••••••••••••••••••••
مسك الختام
كلنا يطالب اللاعبين يختوا الكوره واطه
ونحن محتاجين زول يكورك لينا نخت الكلام واطه
نطالب في اللاعبين ومحتاجين نطالب انفسنا قبلهم
عشان كدى نحن كجمهور واعلام علينا نخت الكلام في الواطة
ونخلي كل زول يشوف شغلتو
ختوا الكلام واطة ياناس
عشان مركبنا محتاج النوع دا من التعامل
••••••••••••••••••••••••••
ونحن علي المدرج ندعم ونشجع ونتفرج
وامس الفرجة كانت مختلفة
في الاستاد
والجمهور ختة مصعب عمر في راسوا بالذات
وباقي اللاعبين كلو واحد خايف الدور يجيه
وكدى الجماعه حيفقدو التركيز
خلونا ندعمهم حبة ونعيد ليهم الثقة
ويامجسن ويابرهان
اي لاعب حاسين بيه في مشاحنات مع الجمهور خلوة يتقل ليكم الدكة
ويونسكم حبة لحدي ما الموجه تعدي !!!
الجمهور الان يغلي وطو ليه النار بتشكيلة ترضي طموحاتهم
ماتعلوا النار عشان الحلة ماتحرق
••••••••••••••••••••••••••
همسة اخيرة
تاني ياناس الادارة نزكركم ونفكركم انو تكليفكم مدتو سته شهور والشهر الاول خلاص قرب يخلص وباقي لينا خمسة شهور
ملفات كتيرة مانفتحت
الجهاز الفني والمحترفين
والديون محتاجه تهامل رزين
والعضوية محتاج فتح باب النادي ضلفتين
وتجهيز الانتخابات محتاج لتغنين
امس رسلنا ليكم رسالة بخصوص المحترفين
الكونفدرالية والابطال شغال ياحلوين ركزوا لينا عليها والله فيها لعيبة فنانين صغار ورخيصين
قفلوا الباب دا بدري بدري
وشوف لينا خواجه عيونوا ملونين
خلونا ننام مرتاحين
الجمهور منتظر قرارتكم وساكت ولي يدينا مربعين
ادونا خبر يسعدنا ويخلينا من الفرحة نطير فرحانين
الخواجات كتار والدوريات واقفة واغلبهم الاااااااااااااااان متفرغين
خلونا من زحمة نهاية الموسم والمدربين المقالين ،،،،،،
••••••••••••••••••••••••••
خارج النص
الايام دي كتروا من الدعوات في الايام المباركات
اترحموا علي موتانا وموتاكم
وادعوا لمرضانا ومرضاكم
اعفوا وعافوا
تحابوا وتهادوا
الحياة الان لاترحم ضعيفنا
والزمن سارقنا
والتواصل بين الناس قل
دعونا ندعوا
وربنا يتقبل صيامنا وقيامنا
وكل زول يخلف زكرى طيبة وراه
اي عمل طيب يجبر الاخرين علي الترحم عليك وتزكر محاسنكم عند الرحيل
لاتسرح بلسانك وتغتاب وتؤثم ولاتسرح بتعاملك فتنفر الاخرين من مصاحبتك او صداقتك
تعاملك عطر فواح يحزب الاخرين لمصادقتك والبحث عنك
اترك عطر تعاملك يجذب الاخرين اليك ،،،،،
والي لقاء في تغريدة اخرى…….
••••••••••••••••••••••••••
# تغريدة طبية:
للأشخاص الذين يعانون من الإصابة بالصداع والدوخة الناتجة عن نقص معدلات السكر لديهم خلال فترة الصوم، ننصحهم بدء الإفطار بتناول حبتين الى ثلاثة من التمر وذلك لتعديل مستوى السكر في الدم.
وربنا ينعم علي الجميع بالصحة والعافية
••••••••••••••••••••••••••••
# تغريدة مرورية:
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع،،،،،
نصائح للسائقين
لا يجب الكشف عن حالة البطارية بتوصيل طرفي قطبيها بكابل أو مفك، لان ذ لك يؤدي إلى مرور تيار ذي أمبير عالي يتلف أجزاء البطارية الداخلية، ويفتت المادة الفعالة بها من على الألواح
وربنا يكتب السلامة للجميع
••••••••••••••••••••••••••هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore