ارخص سوق عمالة في بنغلاديش واسواء من التحكيم عندنا مافيش

تغريدة واتساب

بقلم معاذ ابومؤيد
ارخص سوق عمالة في بنغلاديش
واسواء من التحكيم عندنا مافيش

زمان حكينا قصة الحكم والسبورة
حنعيد القصة تاني
عشان حكايتنا الفاتت قالو ماصحيحة
قبل الساعة الالكترونية واظهار نتيجة المباراة فيها
كان النتيجة بكتبوها في سبورة
واحد قاعد جنبها ماسك الطبشير واسفنجه يمسح ويكتب يمسح ويكتب
لو كان بتاع السبورة موجود في الزمن دا كان حيشتغل كيف مع تحكيمنا الماسورة!!!!!
العنوان فوق ارخص سوق عمالة في بنغلاديش
لكن رغم الرخصة دي عندهم اجادة للعمل
بنجضوا شغلهم
وبشتغلوا (بضمير)
ودوريهم مافيه ظلم لفريق
وعندهم حكام مشاركين اساسي في دوري ابطال اسيا
لكن مع وضعنا نقوم نستورد حكام من بنغلاديش
علي الاقل عدادهم ارخص من حكام صلاح
يعني المباراة ممكن علي مئة جنية
واهم شي بحكموا بضمير
والمهم والاهم مافي لغة حوار مشتركة الا تكون عندك اجادة (للاردو)
يعني نضمن انو مافي اي حوارات خارجية
وبالاضافة ممكن يكونوا اكثر نزاهه
وينجضوا المباريات !!
بس قصة( الاردو) دي احتمال في ناس تخش كورسات للتواصل !!
المهم والاهم كدي شوفوا لينا حكام من بنغلاديش
( رواتب معقولة-ضمير صاحي -اخلاص في العمل )
والمهم والاهم لبسة حكم من حكام صلاح ممكن تلبس طاقم المباراة كامل
احجامهم صغيرة ومناسبه
كدي فكروا في قصة بنغلاديش دي
عرض متلو مافيش
وممكن نجيب معاهم بتاع سبورة برضو!!!
••••••••••••••••••••••••••
اها نجي لعنوانا التاني
فعلا اسواء من كده مافيش
نرجع بالزاكرة شوية ونديكم احصائية طبعا علي حسب محللين النيلين وبرنامج سيحة الاسبوعي
نبداها من الدورة الاولى وانت جاي
في الدور الأول تم ظلم اهلي شندي امام الهلال بفعل حكم ود النور و نقد هدف صحيح قلنا دي بداية الدورة ومافي حساسية مباريات !!!!
اهلي مدني صاحب قضية اليوم متعود علي ضربات الجزاء في الدورة الاولي ايضا ظلم اهلي مدني باحتساب ركلتي جزاء وهمية للهلال يعني اليوم اعادة بالبطئ لنفس السناريو الاول
وقلنا امكن مامقصودة والحكم امكن تحت ضغط جماهيري !!!!
ظلم هلال الأبيض بعدم احتساب ركلة جزاء حسب كلام خبير التحكيم سيحاروبعديها حصل هجوم شديد اللهجة من اعلام العرضة شمال!!!!!
في الديربي ظلم المريخ بعدم احتساب ركلة جزاء صحيحة للمريخ وعدم اعادة ركلة جزاء الذي نفذها سادومبا قلنا امكن فوبيا القمة وموازنات والحكم كان مضغوط!!!!
ثم تاني مسرحية اليوم التي لم تكن محبوكة لانها في وضح النهار لافي كشافات ولا اضاءة خافتة
مسلسلنا اليوم لم يكن في الحساب عشرة بطاقات صفراء و طرد لاعبين
وذرد الجهاز الفني !!!
وعدم احتساب ركلة جزاء صحيحة لاهلي مدني مع احتساب ركلتي جزاء !!
انتظرنا محلل قناة النيلين درمة افتي بصحة ضربة للهلال وضربة لاولاد مدني وعدم صحة الثانية لجماعة العرضة شمال !!!
طبعا دا ماكلامي ولاكلام شخص تاني
دا تقيم للحكام من زملاءسابقين او ماتسمى فقرات تحكيمية !!!
من مازكر اعلاة
نستنتج اسواء من كدة مافيش
طبعا دا عن فريق واحد!!
لو عملنا جرد لبقية اندية الممتاز
حنلاقي كمية من البلاوي
وكمية من هضم الحقوق
وانتزاع نقاط من غير اي وجه حق!!
قلنا ليكم فوق
مطلوب علي وجه السرعة حكام من بنغلاديش
طبعا راعينا ليكم الكشكوش
وراعينا اللسان الغير معرب
وختينا في حسابتنا الملابس
يعني تم الاختيار بعناية فائقة
من دربكم عدل علي مكتب الاستقدام والعمل
••••••••••••••••••••••••••
وانا بكتب في التغريدة فجاءة حضر امامي فيلمي (هي فوضى) و(مرجان احمد مرجان)
هي فوضي عشان مافي لاحسيب لارقيب علي سلك التحكيم وعلي الرياضة عموم
منتخب حالو يغني عن السؤال
واتحاد ولجان حدث ولاحرج
ودوري مصنف عالميا في اخر الدوريات!!!
ومنظومة ورزنامة دوري وبطولات عكس الاجواء الطبيعية
طبعا دا بالنسبه للدوري الممتاز
ودوري المظاليم داك كمان مافي زول عارف الحاصل فيه
يعني احتمال فيه بطاقات ومعاها (شلوت )
الدوري المنقول تلفزيونيا تحصل فية تلك الفضائح
والكوارث !!!
مابالك بدوري لامنقول تلفزيونيا ولا اذاعيا ولا حتى صحفيا
لانسمع له خبرا الا في الدوري التأهيلي!!!
••••••••••••••••••••••••••
مسك الختام
علي جميع الصحف واجهزة الاعلام والاندية والاتحادات الفرعية وكل شخص صاحب صلة بالدوري ان لايخسر ماله ولاوقتة في شي اساسا محسوم مبكرا
محسوم بالميول ومحسوم بالحكام ومحسوم بطول (اللسان)
بس كل مسؤل من الوضع دا نحب ان نزكركم
ان الله يمهل ولايهمل
••••••••••••••••••••••••••
همسة اخيرة
نحن علي المدرج ندعم ومشجع ونتفرج
ابتداء الدوري وجمهورنا يلبس كمامات
وسيختتم الدوري ونحن نلبس كمامات ومرايل
لان الوضع حاليا فاق حد الكمامات لان الرائحة فعلا تزكم الانوف لدرجه اصاباتنا بجيوب انفية دائمة
شكرا مجلس الادارة وانت تبادر ببيان علي وجه السرعة
لكن قروبات المريخ تدعوكم لعقد اجتماع مع الوزير لوضع النقاط فوق الحروف فعليا
لابد من حسم الفوضى وان توصل الرسالة ان الدوري الممتاز اصبح الدوري المنحاز
وان يتم ارفاق كل الحالات التحكيمية في (سي دي) وعرضها علي اصحاب القرار في الوزارة
ننتظر اجتماع المجلس اليوم
ماذا يخبئ لجماهير المريخ والرياضة عامة
نعود لنفرتنا
الزمان الجمعه٢٠١٦/٨/١٢
المكان نادي المريخ
تحت شعار بنفرتنا نسدد غرامتنا
والي لقاء في تغريدة اخرى،،،،
••••••••••••••••••••••••••
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
==================

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore