* سجل التاريخ السياسي إنهياراً كثيراً من الأنظمة العالمية الحاكمة بسبب (تقارير) غير دقيقة ترفعها (أجهزة الحاكم) للحكام فيعمل به علماً بأنها تقارير تجافي الحقيقة ..
* ولعل كثير من المحللين العالميين قد أرجعوا نجاح ثورات الربيع العربي إلي عدم دقة التقارير الأمنية التي تُرفع للقائد الحاكم ..
* وهذه (الحالة) بحسب ما ذهب إليه المحللون ظهرت في إنهيار مملكة العقيد معمر القذافي ..
* القذافي إتخدع بسبب تقارير غير دقيقة صورت له أن الأمور في السليم ونام على العسل حتى كانت النهاية بالشكل الذي شاهده ووقف عليه العالم أجمع ..
* القذافي ظل يُكابر حتى إنتهى به المطاف داخل (حُفرة) ..
* وما أقصده في هذا (المقام) هو (التقارير) التى تُرفع للقائد ..
* والقائد المقصود هو الكاردينال..
* الكاردينال في كل مقابلاته التلفزيونية يُكثر من كلمة (تقارير) ..
* يقول ليك: أعضاء المجلس رفعوا لي تقرير ..
* أو يقول ليك : أنا ما قاعد أقرأ جرايد لكن رفعوا لي تقرير ..
* المشكلة كلها يا ريس تكمن في هذه (التقارير) ..
* الذين يرفعون التقارير في الغالب هم يراعون لمزاج القائد ويجتهدون في سبيل أن لا يتعكر صفوه وبالتالى يجملون له الحقائق ويخففونها له بل يمكن أن يجدون له مبررات حتى يصل لقناعة أن كل من ينتقده (صاحب غرض) ..
* يشك في الذي ينتقده ولا يشك في الذي يمدحه طوال الوقت ..!!
* هذا القلم مدح الكاردينال كثيراً وإنتقد الكاردينال كثيراً وسيمدح الكاردينال كثيراً وسينتقد الكاردينال كثيراً طالما يجمعنا حبيب فوق كل الحبايب إسمه (الهلال العظيم) ..
* الليلة ننتقدك وبكرة نمدحك والغرض والمصلحة هي الهلال ولا شئ دونه..
* وأنا في ختام سلسلة هذه المقالات أحب أن أنبه الكاردينال لأشياء مهمة جداً ..
* أشياء تتعلق بالتقارير ..
* على الكاردينال إذا سمع نقداً أو قرأ نقداً أن يطلع عليه بدون مؤثرات حتى يقف على حقيقة الحروف وما إذا كان النقد في محله أم في غير محله ..
* دي حاجة مهمة جداً ..
* يعني حتى لو إنتقدك زول تابع لصلاح ادريس انت يفترض تشوف النقد ده صاح ولا ما صاح بغض النظر عن الشخصية ..
* لأنو لو إعتمدت عل التقارير ومبررات الناس لن تعدل أي ميل في مسيرتك ..
* ومجتمع الهلال للأسف بقت فيهو تصنيفات قبيحة جداً بدأت منذ عهد (الملحن) صلاح إدريس وزادت في عهد الكاردينال ..
* هذه التصنيفات ستضر الهلال بشكل عام وستضر الكاردينال على وجه الخصوص ..
* مثلاً.. لما الجمهور ينتقد فريق الكرة بسبب سوء النتائج والعروض فليس من حقك أن تصنف هذا الجمهور بأنه معارضة أو بأنه يتبع لصلاح إدريس أو يتبع لجمال حسن سعيد ..
* الهلال لما يكون كعب أكيد الناس ما بتسكت لأنهم بيحبوا الهلال بحق وحقيقة وبدون مصلحة ..
* وأي زول بيعبر بالطريقة البتريحو ..
* في زول بيشيل (لافتة) بعبر بيها وفي زول بكتب في جريدة وفي زول بكتب في الواتساب وفي زول بيزعل وبيقاطع المباريات ..
* هل تفتكر كل الناس ديل تبع صلاح ادريس أم هم طابور ؟؟
* لا طبعاً يا ريس..
* لما الهلال يكون عندو فريق كورة بحجم روعة الجوهرة لو في زول قال ليك (تلت التلاتة كم) ده معناها زول معارض وزول كعب ومندس ..
* لكن الهلال كعب .. انت عايز الناس يكضبوا عليك ويقول ليك والله فريقك سمح وتسجيلاتك ناجحة ؟؟
* ما بنكضب والهلال عندنا أهم من أي زول ..
* عارف يا ريس.. لو كل ما زول بيتنقدك الجماعة بيقول ليك ده مرتشي وده ما عندو موضوع صدقني ما ح تقدر تعرف عيوبك وما ح تقدر تحل مشاكل الهلال ..
* حاول يا ريس ما تلقى مبرر للنقد ..
* يعني ما عشان هو إنتقدك تقوم تشكك فيهو وتقول الزول ده معارضة وما معارضة ..
* هي وينا المعارضة عليك الله ؟
* كان لصلاح إدريس ده تاني في السماء ما بيشوف الهلال بأمر السواد الأعظم من شعب الهلال..
* ما في معارضة ..
* وحتى لو في معارضة يفترض إنك ما تخاف من معارضة صلاح ادريس لأنها لن تكتل ذبابة..
* ما في معارضة يا ريس..
* لكن في ناس ما عاجبهم شكل الهلال والناس ديل طبيعي يتكلموا وينتقدوا ويعملوا العايزنو..
* من حقهم ..
* زمان جمهور الهلال ده لما الفريق يتعثر داخل المقبرة (قلبوا الركشة وبداخلها أنور الشعلة) ..
* ركشة عديل قلبها الجمهور من الزعل ..
* الركشة إتقلبت وفي لاعبين جروا عديييل كده ..
* وده الجمهور كده لما ينفعل ولما الحال ما يعجبو ..
* وفي الزمن داك لما حادثة الركشة دي حصلت ما في زول قال ديل مندسين ولا في زول قال ديل مرتشين ..
* ناس بتحب الفريق وزعلانة لأن الفريق أقل من الطموحات ..
* المهم ..
* بكررها ليك تاني يا ريس.. ما كل التقارير البتجيك بتراعي مصلحتك وتأكد أن أكثر التقارير تراعي مصالحهم فهم لا يحبوا أن يكون مزاجك عكراً ولذلك يبررون لك النقد ويجملونه على حساب الهلال ..
* وما زال الأمل قائماً في إن ينصلح حال الهلال في الموسم الجديد وهذا يتطلب تسجيلات بمعايير فنية وليس معايير مصلحجية ..
* نجوم التسجيلات معروفين أمشي عليهم بالباب وإذا دعا الأمر أمشي ليهم بالشباك ..
* حتى لو في لاعب المريخ فاوضو إنت برضو فاوضو، مش إحنا القوة المالية الضاربة في البلد دي ؟؟
* حكاية إنو المريخ أرسل خطاب لنادي الشرطة وأرسل خطاب لنادي الخرطوم هذه أشياء يجب أن لا تمنع الهلال من ضم المواهب ..
* المريخ يرسل خطابات علي كيفو لكن يفترض الكلمة النهائية تكون عند الهلال طالما رئيسنا بعضمة لسانه قال: (نحن القوة المالية الضاربة في البلد دي لو شئنا لسجلنا ميسي)..
* هسه ميسي خليهو يا ريس جيب لينا نجوم التسجيلات المحليين وتلاتة محترفين ماركة الأخطر من الساماتا، ونضف الهلال من المنتفعين، وأبعد (القوالين) من إطار فريق الكرة ، وأمنح اللاعبين الأمن والأمان وبعدها ح تشوف هلال بحجم روعة الجوهرة وح تشوف (غزل) رفيع و (شو) مكثف ..
* و..و..
* والله من وراء القصد
