انسجمت كل الحاجات الكعبة في مباراة الفاشر !!

بالعربي الكسيح
محمد الطيب الأمين

* من أهم عناصر الأناقة هى (تناسق الملابس) ..
* وتناسق الملابس يختلف بإختلاف الأذواق ..
* هناك من يحبذ أن يكون (لون القميص) هو نفس (لون الجزمة) ..
* وهناك من يحبذ أن يكون (لون القميص من مشتقات لون البنطلون) ..
* ومن سخريات القدر أن (أصحاب الكاردينال) عندما بحثوا عن سبب لإقالة عمر النقي قبل شهرين لم يجدوا ولكنهم تحدثوا عن (ملابس) النقي بإعتبارها واحدة من أهم أسباب الإقالة..
* قالوا النقي بلبس قميص بلون الجزمة ..
* وقد كان ذلك بمثابة تلخيص لمستوى الفهم في الهلال..
* بالأمس في الفاشر وعلى طريقة (تنسيق الملابس) كان الحال..
* شكل النجيلة كان يشبه شكل مريخ الفاشر، وشكل مريخ الفاشر يشبه شكل الهلال، وشكل الهلال يشبه شكل الحكم معتز عبد الباسط ، وشكل معتز عبد الباسط يشبه قناة الملاعب، وقناة الملاعب تشبه (الزول اللابس عمة القفل كاميرا الهلال بيدو)، وشكل الزول اللابس العمة القفل كاميرا الهلال بيدو بيشبه شكل البعثة الإدارية التي رافقت الهلال إلى الفاشر ..
* وشكل البعثة الإدارية التي رافقت الهلال إلى الفاشر يشبه شكل محمد الفاتح حجازي ..
* هو عليك الله لو الهلال ما هان زي حجازي ده بيدربنا ؟؟
* حجازي مدرب عاطل عن الموهبة ووجوده على رأس الجهاز الفني للهلال (فضيحة لا تقل عن فضيحة إستاد النقعة) ..
* حتى لو وجود حجازي مؤقت ..
* لو جابوهو مدرب ليوم واحد هذه أيضاً فضيحة ..
* فضيحة تدخل في إطار الهوان الإداري الذي يعيشه الهلال الآن ..
* ولذلك لم يكن هنالك شيئاً جميلاً داخل أرض الملعب يستاهل نهاية جميلة ..
* النهاية التي إنتهت عليها المباراة هي النهاية الأمثل لهذه المباراة ..
* المباراة دي كان لازم تنتهي بالشكل ده ..
* كل شئ كان كعب : (الهلال والتلفزة والملعب والحكم) ..
* الحكم عشر دقائق كان بيفتش في اللاعب عشان يديهو كرت أحمر وما لقاهو ..
* بفتش في اللاعب زي القاعد يفتش ليهو في (عتوت) ..
* والله العظيم الزول لو بيفتش ليهو في (عتوت) ما بيفتشو بالطريقة التي فتش بها معتز عبد الباسط لاعب مريخ الفاشر ..
* الغريب معتز بعد فتش اللاعب وما لقاهو قام طلع وترك الملعب ..
* الحكم منح حارس مريخ الفاشر بطاقة صفراء علما بأن الحارس ضرب حسين الجريف (بونيتين) ..
* بطاقة صفراء لشنو ؟؟
* عشان (البونية) كانت براحة وألا شنو ؟؟
* ناس مريخ الفاشر مشوا كنبة الإحتياطي جابوا ليهم لاعب للحكم عشان يطردوا بدلاً عن اللاعب الذي كان يستحق الطرد ..
* وبعد ده كلو الحكم أنذر الحارس بالكرت الأصفر ..
* معتز عبد الباسط يجب أن يكتب في تقريره الآتي: (منحت الحارس كرت أصفر لأنه ضرب حسين الجريف بونية خفيفة) ..
* أنا والله دائما تجدني لا أسعد بمثل هذه المبررات عندما يكون الهلال سيئاً ..
* كل الناس تتحدث عن التحكيم وعن قناة الملاعب ولكن هل سألنا أنفسنا سؤالاً يقول : (لماذا أصبح الهلال هيناً لهذه الدرجة) ؟؟
* والله أنا لا أتحدث عن التعادل ولا أتحدث حتى عن الخسارة إن وقعت لا قدر الله ..
* ولكن أتحدث عن هلال غير موجود ..
* أتحدث عن فريق لم تبقى منه سوى الملامح والشبه ..
* فريق بلا روح وبلا قيادة وبلا ثقة ..
* تخيل .. لو لعب الهلال وسجل هدفين في الشوط الأول ومثلهما في الشوط الثاني هل كانت ستكون هنالك مشكلة ؟؟
* أو خليك من تسجيل الأهداف .. تخيل لو تسيد الهلال الملعب وفرض شخصيته الفنية وتناقل لاعبوه الكرة بحيوية هل كانت ستكون في مشلكة ؟؟
* المشاكل بنجيبها لرقبتنا لأننا عاجزين والناس طمعانين فينا ..
* وكل هذه المضايقات التي يتعرض لها الهلال بالولايات وداخل ملعبه سببها (العشم) ..
* الكل بقى يعشم في الهلال ..
* الفرق بقت عشمانة فينا ..
* فريق يكون في آخر الترتيب ومع ذلك (شهيتو فاتحة) عشان يشيل نقطة من الهلال ..
* والغريبة بيشيلوا النقطة عادي من الهلال ..
* بيشيلوا النقطة لأن رئيس الهلال مشغول بالطوب والسيخ وترك أمر الفريق لمجموعة سماسرة ومنتفعين أوصلونا لهذه المرحلة ..
* سماسرة ومنتفعين يخدعون الرئيس عند كل تسجيلات حتى أصبح حال الهلال لا يسر حتى الأعداء ..
* بعيداً عن أي حاجة حصلت في الفاشر أمبارح، وين الهلال ؟؟
* الهلال في عضمو وينو ؟؟
* فريق غير قادر على الإحتفاظ بالكرة لـ(60) ثانية ..
* لاعبون بدون روح وبدون فهم ومدرب ضعيف الشخصية ومسير من الخارج ..
* نحن قبل أن ننتقد الحكم علينا أن ننتقد أنفسنا ..
* هل لعب الهلال (كورة قدم بالأمس) ؟؟
* ح يقول ليك الملعب كعب ..
* طيب هل لعب الهلال كورة قدم هذا العام ؟؟
* مشكلة المنتفعين أنهم يظنون أن مشاكل الهلال ستنتهي بالمبررات الفطيرة ..
* المنتفعون لما الهلال يلعب كورة زي كورة أمس دي وتحصل مشاكل بيفرحوا ..
* بيفرحوا لأنهم بيلقوا ليهم حاجة يصرفوا بيها النظر عن مستوى الهلال ..
* وعلى فكرة دي من الأسباب التي أوصلت الهلال لهذا المستوى ..
* التبرير الفطير من أكبر مشاكل الهلال ..
* زمان الهلال لما يمشي الولايات حتى جماهير الولايات بتشجع الهلال على حساب فريقها..
* وأمبارح الجماهير بتهتف ضد كاريكا وهو خارج من أرض الملعب ..
* تهتف ضده لأن الشخصية مفقودة ..
* شخصية كاريكا مفقودة وشخصية الهلال مفقودة ..
* والأزمة كبيرة ..
* الأزمة أكبر من ظلم التحكيم ..
* التحكيم ذاتو (عشم) في الهلال ..
* مجلس الهلال ما فيهو زول عندو شخصية ..
* عشان كده الحكام وغيرهم يستحقرون الهلال ..
* الهلال محتاج غربلة ..
* غربلة على المستوى الإداري وغربلة على المستوى الفني وغربلة حتى على مستويات النفوس والنوايا ..
* و..و..
* والله في

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق