أنا غايتو برشح حنان خالد لرئاسة المريخ !!

بالعربي الكسيح

محمد الطيب

* في عالم الواتساب والفيسبوك لما الزول يكتب كلمة غلط بصححها برمز النجمة (*) ..
* مثلاً: أنا عايز أكتب إسم سوداكال وقمت بدون قصد كتبت (سوداطار) ..
* بصححها كده : (سوداكال*) ..
* وهذه (النجمة) معروفة وسط (المفسبكين والمفسبكات والموتسبين والموتسبات) ..
* ليبقي السؤال: من القال للناس إنو الرمز ده (*) يعتبر من أدوات التصحيح في اللغة العربية ؟؟
* عموماً.. الأخ ضفر قال للناس (الهلال العاصمي) فاوضني، ولما الكاردينال نفى الكلام ده وقال ما عايزين لا ضفر لا غيرو ، أتوقع إنو ضفر يكون صحح المعلومة وقال : (هلال التبلدي*) ..
* في صحيفة الصدى قالوا: (هلال الخرطوم يفاوض ضفر)..
* ده كان مانشيت في صحيفة الصدى ..
* الآن صحيفة الصدى يجب أن تطلع بمانشيت تقول فيه: (هلال الأبيض* يفاوض ضفر) ..
* أعملوا رمز الـ(*) عشان شكلو كده ضفر ما كان قاصد سيد البلد ..
* وغايتو جنس غايتو ..
* حسم الهلال صفقة نجم النسور متوكل (كولا) ..
* صحيح أننا لم نشاهد متوكل بالقدر الكافي ولكن كل من سألناه أطنب في الإشادة والمدح ..
* وهذا يؤكد أن الهلال كسب لاعباً كبيراً فقط نتمنى له التوفيق والنجاح ..
* ونتمنى أن يتدخل الكاردينال في صفقة (التاج عطبرة) فهو لاعب صاحب موهبة حقيقية ومتواجد الآن داخل غرفة المريخ ..
* المهم ..
* اللعب للمنتخب الوطني بالفعل هو خط أحمر ..
* ومنتخبنا الوطني في عهد معتصم جعفر (هان وبالتالي أصبح الهوان عليه ساهل جداً) ..
* منتخبنا في عهد ناس الجاكومي بقى من آخر أولويات اللاعبين ..
* حتى اللاعبين تمردوا على المنتخب في عهد معتصم جعفر ..
* ولكن عودة البروف شداد ستعيد للمنتخب شخصيته المفقودة على الأقل فيما يتعلق بعدم تمرد اللاعبين وأعذارهم الواهية ..
* العقاب سيطول كل من يتمرد على المنتخب ..
* كل هذا أمر جيد ولكن هنالك أمر يجب أن لا نقفله ..
* الراحة السلبية التي تم تحديدها لمدة شهر هي (ملك حر) بالنسبة لكل لاعب كرة ..
* من حقو يرتاح ويشوف حياتو ..
* وبصراحة شديدة الدوري كان ضاغط وطويل وبالتالي نجوم الهلال مرهقين جداً ..
* الدوري إنتهي يوم (30) وتجمع المنتخب المعلن الآن يوم (10) .. يعني بعد بكرة ..
* إجمالي الراحة فقط (10) أيام..
* طالعين من إرهاق وداخلين معسكر ..
* دي ضريبة الوطن وستدفعها الأندية التي بالضرورة سيتعرض لاعبوها لإرهاق إضافي من شأنه يضعف مردودهم في موسم (2018) ..
* قلوبنا معاك يا أبوعاقلة ..
* طبعاً لعيبة المريخ أصلاً الدوري بالنسبة ليهم إنتهى قبل الهلال ..
* إحنا لحدي يوم (30) في الميدان ..
* وناس قريعتي راحت ديل من قبل اسبوعين سرحوهم والدوري بالنسبة ليهم إنتهى ..
* بمناسبة قريعتي راحت ..
* مجلس (المدفور) قال بيصعد (طعون) سوداكال لـ(الفيفا) ..
* وده طبعاً ضياع زمن ساكت ..
* عليكم الله بطلوا الخجل ده ورجعوا جمال الوالي ساكت ..
* أصلاً كل الحركات دي عشان جمال الوالي يرجع ..
* فما تعملوا لينا فيها خجلانين ..
* رجعوه أصلاً ما في زول شغال بيكم كتير ..
* المريخ (15) سنة يا يكون رئيسو جمال الوالى يا كمان يكون ما عندو رئيس ..
* والله صحي ..
* الوالى الخيار الأول والأخير ..
* هسه طالما دايرين تصعدوا الموضوع وتوصلوه (الفيفا) أنا أفتكر إنو من الأفضل تشوفوا ليكم رئيس (مؤقت) بدل قاعدين تتلفتوا كده ..
* ما ح تلقوا رئيس مريخابي لكن شوف ليكم هلالابي زعلان أو موردابي قافلة معاهو ..
* أنا شخصياً برشح ليكم (حنان خالد) ..
* جيبوها للرئاسة ..
* وأفتكر إنو ده خيار ممتاز جداً ..
* أفتكر كده وأي زول طبعاً حر في (إفتكاراتو) ..
* على الأقل حنان خالد بتفهم في القوانين والإدارة ..
* طبعاً ده إذا حنان خالد وافقت ..
* لو ما وافقت شوفو سلمى الماجدي ..
* وغايتو جنس غايتو ..
* تنتظر جماهير الهلال بفارق الصبر بشريات من (دبي) معقل مفاوضات الهلال مع الأجانب ..
* وبعد حديث الرئيس في قناة الهلال الكل يتوقع أن يكون المحترف القادم بقامة الهلال ..
* نعلم أن (الدولار) حار ولكن نعلم أيضاً أن الهلال هو ليس المريخ حتى يقف المال في وجهه ..
* القروش راااااقدة ..
* والغالي بغلاتو ..
* الإستثمار في المحترفين مهم جداً ..
* جيب الغالي عشان يشيل معاك الأبطال وبعد داك ح تفكو بالغالي ..
* ولو في طريقة يا ريت ما نجيب (مهاجم برازيلي) ..
* البرازيليين ديل بينفعوا في (صناعة اللعب) ..
* المهاجم نجيبو من أفريقيا وصانع اللعب من البرازيل ..
* قالوا الأيام دي صلاح نمر متابع تسجيلات الهلال أكتر من متابعته لتسجيلات المريخ الشهير بـ(الإصيفر) ..
* متابع تسجيلاتنا عشان يحدد ح يواصل مع المريخ ولا ح يطلب الإعارة ..
* غايتو الهلال لو جاب صانع لعب برازيلي ومهاجم المنتخب الغاني أنا بحلف ليكم صلاح نمر ح يطلب إعارة ..
* وكذلك فييرا ..
* تسجيلات الهلال هي التي تحدد (إعارات المريخ) ..
* فعلا (سيد بلد) ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (بقارية) وأصلو الزول بيموت والذكرى تفضل حية ..
* و..و..
* ومن لمسات حنانك خلاص تمينا …(الناقصة)

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق