ما عندنا رئيس
في الصمت كلام
محمد عثمان بلل
ما عندنا رئيس
• شايف مشكلة الوصيف لسه ما إتحلت .. معقولة يا أخوانا الناس ديل يقعدوا كدا بدون رئيس الفترة دي كلها .. مش ديل زمان الوالي لو قعد ثانية واحدة في بيتو بعملوا إعتصام قدام بيتو .. لحدي ما جيران الوالي لمن يشوفوا عربيتو قدام البيت طوالي بتوقعوا جماهير الوصيف تعمل ليها حركة كدا وتعمل إعتصام .. الناس ديل شوفوا ليهم رئيس عشان نحن نرتاح شوية من الموضوع دا .. تمشي أي مكان وتلقي وصيفابي طوالي يتكلم ليك عن موضوع ما عندنا رئيس .. لو قعدت معاهم في صينية واحدة برضو يتكلموا عن الرئيس .. الرئيس .. الرئيس .. الرئيس .. تفتح الواتساب والفيسبوك وأي موقع للتواصل تلقي الموضوع دا قدام اصبعك طوالي .. كدا يا أخوانا شوفوا حل سريع للمشكلة دي .. نحن ممكن نساهم في الموضوع دا بشنو يعني .. عايزين نساعد بس .. وإنتوا في النهاية ناس جيرانا وبتهمنا مصلحتكم .. طيب ما ممكن تعملوا إعارة وتجيبوا ليكم رئيس من أي حته لحدي ما تلقوا ليكم رئيس .. أو تقنعوا جيمي يرجع تاني .. فكرة والله كدي حاولوا مع جيمي يمكن يقتنع ويرجع تاني .. وأقعدوا معاه ونفذوا طلباته كلها .. بس كلامي دا ما بعجب ناس كتار كدا .. وأحسن لي أسكت ساي وما أجيب لي نفسي الهواااااا .. السنة دي وين المانشيتات العجيبة ديك .. إكتساح الإنتخابات .. أقصد إكتساح التسجيلات .. وخطفنا النجم الضجة من الهلال .. جماهير الهلال غاضبة بسبب التفريط في اللاعب الكبير .. والوصيف سيطر على الساحة مبكراً .. والهلال يبحث عن نجوم التسجيلات بدون جدوي .. والوصيف يكمل أتفاقه مع نجم جماهيري كبير .. (يا ربي دا طه سليمان) .. وين الكلام دا إشتقنا لأيام زمان .. أيام انت زاتو لمن تقرأ الكلام دا تخاف عديل كدا .. ونقوم نوصي مجلس الهلال يعمل حسابوا في اللاعبين الموجودين في الكشف .. حليل أيام زمان.
• أمشوا سوق الجمعة.
(صمت اخير) ..
• في يوم الجمعة أكثروا من الصلاة على أفضل خلق الله.
• (اللهم صلي وسلم على حبيبك ونبيك محمد .. عدد خلقك .. ورضا نفسك .. وزنة عرشك .. ومداد كلماتك).
يا وهم المريخ بدون رئيس أفضل من هلالك بي رئيسو فأحسن تمسكو لسانكم والمريخ بي فلسو دا سجل أكثر من الهلال الهلال سجل إتنين من الأمل عطبر وواحد من الشرطة وجدد لجينارو تاني ما سمعنا بي أي حاجة …في حين أن المريخ سجل أكثر من ٥ لاعبين وسيضيف سادس … الهلال إتخدع بهزيمة المريخ في نهائي الموسم وترك مواسيره كما هي يعني نفس الفريق الذي تعادل أكثر من ١٢ مباراة قالو دايرين يجيبو بهو كأس الأبطال… قبل مباراة الهلال والخرطوم الوطني كان الشطب يهدد أكثر من ثمانية لا عبين وقلتو الهلال لازم يجدد يعني هسي بتاعين الأمل وبتاع الشرطة ح يجيبو الفرق ما أظن لأنهم أكثر من عاديين لم نسمع بأسمائهم إلا في التسجيلات.
• في يوم الجمعة أكثروا من الصلاة على أفضل خلق الله.
وأنت أكثر من اللّغو الفارغ المسيخ الضار غير المفيد
الكتّاب (الجد) يتطوّروا و(القشرة) كأنت وأشباهك تطبّزوا