* غني سيد خليفة (عليه الرحمة): (غشت الجيران لثواني وقليبي التايه ودر) ..
* وأنا حقيقة أموت وأعرف الزولة دي (غشت الجيران لثواني) ليه ؟؟
* لشنو يعني ثواني بس ؟
* ومن متين عندنا في السودان المرا لما تمشي بيت الجيران بتقعد (ثواني بس) ؟
* معروف المرا لما تمشي بيت الجيران بتقعد أربع ساعات وأكتر، بل ما بترجع البيت إلا لما راجلها يرجع من الشغل ..
* لكن (جارت ناس سيد خليفة غشت الجيران لثواني) ..
* وأظن وليس كل الظن إثم إن الزولة دي في (الثواني دي) مشت تودي (شمار) ..
* يا مشت تودي شمار ويا كمان مشت تجيب شمار ..
* غايتو واحد من الإتنين صاح ..
* وأنا أرجح إنها مشت تودي شمار ..
* هكذا أرجح ..
* وأي زول طبعا حر في (تراجيحو) ..
* المهم ..
* خلال العامين الماضيين ظل الكاردينال يسجل المحترفين الأجانب على طريقة (غشت الجيران لثواني) ..
* المحترف بيجي شهر (حداشر) وشهر (واحد) برجع أهلو ..
* أ تقول المحترف ده جاي يجيب لينا (شمار) وراجع ..
* السنة دي تيتيه اتشطب في نص الموسم ..
* والسنة الفاتت موكورو اتشطب في نص الموسم ..
* ثواني بس ..
* وقطعاً العيب ليس في موكورو ولا تيتيه بل العيب في الطريقة التي أحضرنا بها هؤلاء المحترفين ..
* طريقة (الفيديو) و(السمسرة) ..
* الآن الكرة في ملعب الكاردينال حتى يتعاقد مع محترف أجنبي يقعد معانا زي ما قعد معانا مكسيم ..
* ما دايرين محترف زي (جارت) ناس سيد خليفة ..
* وغايتو جنس غايتو ..
* تمر علينا هذه الأيام الذكرى الشهرية الرابعة (والمريخ بدون رئيس) ..
* أربعة شهور والمدفور بدون رئيس ..
* وحقيقة دي فضيحة ما بعدها فضيحة ..
* عيب والله ..
* عيب أن يكون المريخ الذي هو النادي (الثالث) في السودان بدون رئيس لفترة أربعة شهور..
* أقول المريخ هو النادي الثالث في السودان لأن المريخ سنتين طلع من (مولد الموسم بدون حمص) ..
* مولاي كما خلقتني ..
* والأجمل من كده المريخ الشهير بـ(المدفور) سنتين ما وصل نهائي كأس السودان ..
* علماً بأن هذه البطولة هي المحببة للمريخ أو كما يدعون ..
* حتى بطولتهم المحببة سنتين ما قادرين يصلوا النهائي ..
* ولذلك المريخ الآن يجلس في مكان الموردة ..
* يجلس في مكان الموردة عندما كانت الموردة تمثل الضلع الثالث للقمة ..
* المريخ حالياً بحساباتنا إحنا وأولاد حلتنا مجرد ضلع تالت..
* والله صحي ..
* الضلع التاني السنة دي كان أهلي شندي والسنة الفاتت كان هلال الأبيض ..
* ونحن نتمنى أن تعود الموردة للممتاز وتعود لمكانها الطبيعي (الضلع التالت) حتى يتدحرج المدفور للمركز الرابع ..
* وبمناسبة الموردة ..
* شايف حنان خالد استقالت من مجلس القراقير ..
* فشنو.. ممكن تفاوضوها لمنصب رئيس النادي ..
* حنان خالد لو مسكت رئاسة نادي المريخ ممكن ترتب ليكم الأمور لحدي ما جمال الوالي يعود كالعادة بالتعيين ..
* الدوري ده لو بدأ والمريخ ما لقى ليهو رئيس أتوقع إنو السماني الصاوي يعتكف في البيت وكذلك التش والعقرب ..
* وغايتو الله يكفينا شر (المصدي) اللمعتو الأيام ..
* نتوقع اليوم أن يمدد مجلس الهلال عقد النجم محمد أحمد بشة وكذلك عبد اللطيف بوي ..
* بشة بخلاف مستواه ومردوده الفني فهو قائد يقوم بأدوار كبيرة داخل وخارج الملعب ..
* نجدد لبشة ونتركه يحدد موعد اعتزاله بنفسه ..
* زي بشة ده نخليهو براحتو يلعب لحدي ما يجيب لينا (خليفتو) بعد داك يمشي ..
* المهم ..
* ورد في الأخبار أن المريخ صرف النظر بشكل نهائي عن اللاعب النيجيري كونلي ..
* طيب السبب شنو ؟
* قالوا عندو (كبد وبائي) ..
* الله يشفيهو لكن الكبد الوبائي ده ما جديد عليهو ..
* الزول ده لما لعب الموسم الفات لعب وعندو كبد وبائي ..
* والكبد الوبائي أكيد ظهر في الفحوصات الطبية قبل التسجيلات ..
* ومع ذلك سجلوه ..
* الجماعة ديل عندهم الغاية تبرر الوسيلة ..
* واللوم كله نرميه على جمال الوالي..
* جمال الوالي لو لم يكن على علم بمرض كونلي مصيبة، وإذا كان يعلم مصيبتين..
* معقولة وصلنا للدرجة دي ؟
* معقولة بلغنا مرحلة نتستر فيها على هذا المرض لمجرد خوفنا من النقد والشماتة ؟؟
* شينة والله ..
* خوف مجلس المريخ السابق من إعلان مرض كونلي أهم من سلامة راجي ورمضان وبكري ..
* متين نصدق مع أنفسنا ونتعامل بضمير … متييييين ؟
* حاجة تكسف والله ..
* سافر شيبوب إلي القاهرة من أجل إجراء عملية إزالة مسطرة ..
* وشيبوب رغم أنه (لعااااااب) إلا أنه لم يقدم شيئاً للهلال وبالتالي الهلال غير مجبور على إنتظار شيبوب شهور قادمة ..
* الزول ده لو بقدر يلعب أوكي ما بقدر ما يمسك بينا زمن ساكت ..
* أصلاً نحن ما ناقصين والله ..
* بالمناسبة..
* أتمنى إنو شيبوب يكون شال معاهو مصاريف لنزار حامد في القاهرة ..
* نزار حامد يحتاج لوقفة معنوية ومالية ..
* حسب علمي إن مجلس الهلال لم يقصر مع نزار طوال الفترة الماضية وحقيقة دي حاجة كويسة ..
* الزول لما يكون مصاب وبتعالج بره البلد أي سؤال ببقى ليهو سمح وبيساعد في تخفيف آلامو وأوجاعو..
* ونزار يستاهل كل خير ..
* في المريخ قالوا في واحد عرض (كليتو) للبيع من أجل المساعدة في التسجيلات ..
* الخبر مؤثر لكن (كلية) واحدة ما بتسجل ليها لاعب ..
* كلية واحدة دي ياداب بتلحق لمرتبات بكري المدينة والتكت ..
* أما مشكلة فييرا عايزة ليها بنكرياس عديييييل ..
* وتبكو بس.. عين قطرة وعين مس ..
* ونركب صافنات ونجيبة (شكرية) وأصلو الزول بيموت والذكرى تفضل حية ..
* و..و..
* وباسم الحب بقدم ليك حياتي ومعاها..( علبة تونة) ..
